إللى أوله هراء أخره هبل

بص يابنى و بصى يابنتى ......

المدونة دى أنا عاملها علشان دماغى ، علشان متجننش ، علشان زى ما هو باين

من إسمها أصرف فيها الشحنات الكهربية و الأفكار و الكلام إللى لو إتحبس 

دماغى هتضرب و أتجنن 

و إنت أكيد ميخلصكش إنى أتجنن ......مش كدا ...

يعنى إنت هنا ــ و أنا معاك برضه متزعلش كدا ــ فى شبكة صرف عقلية 

فأهلا بك فى عالم الصرف و  المجارى و الهراء .......الذى لا داعى له .

الثلاثاء، 30 مارس 2010

( إخترناه إخترناه )





أنا مش بهزر لما أقول إنى فعلا بحب الأغنية دى 


بجد فعلا ...

سيبك إنت من شوية الأغانى الركش إللى نزلت اليومين دول

و الأغنية التعبانة بتاعة شيرين

فعلا مستوى الإنتاج المصرى بينخفض حتى فى تصنيع النفاق
الجودة بقت قليلة حتى فى أحسن منتجاتنا

أنا عايزك كدا بحيادية و موضوعية تسمع إوبريت إخترناه

شوف الكلمات و الألحان و كمان الأداء



بجد حاجة حلوة فعلا

سيمفونية رائعة

أنا بحب الأغنية دى لدرجة إنى عاملها رنة موبايلى بقالى بتاع أربع شهور


تسمع كدا أداء صفاء أبو السعود و لطيفة تحس بالإنشراح
ولا شفيقة ....يا سلااام
و لا محمد ثروت و العزبى و حسن الأسمر 
إيه الحلاوة دى !!

أنا شخصيا مش بقدرأنزل الشغل الصبح من غير ما أسمع 3أغانى
إخترناه و هم النم يا روحى بتاعة عفاف راضى و كعب الغزال بتاعة
محمد رشدى


و علشان أشارك الكل فى المتعة دى

أدى الكلمات ......

حاول تنزل الأغنية و إسمعها بدون تحيزات مقولبة و بدون ما تشتم أو تسب
و تذوق مواطن الجمال فيها


بجد .....( هتستمتع )






إخرتناه إخترناه
يوم ما عبر وقلوبنا معاه
إخترناه إخترناه
من اول كلمه سمعناه
إخترناه إخترناه
من اول عهده فهمناه
إخترناه إخترناه
وعلى حياتنا إستئمناه

وده تكليف مش تشريف ولا فخفخه ولا ملك وجاه
حمل تقيل وهموم جيل جاي واجيال جايه وراه

اخترناه اخترناه


اخترناه اخترناه
من غير لجنه ولأ و اه
اخترناه اخترناه
رأينا حر واعلناه
إخترناه اخترناه
فى رجوع طابا وعاهدناه
اخترناه اخترناه
والدنيا كلها عارفاه

وده تكليف مش تشريف ولا فخفخه ولا ملك وجاه
ده ابن بلدنا وهوه قائدنا وبدانا المشوار وياه
واحنا معاه لمشاااااااااء الله


اخترناه اخترناه


لا هيدينى ولا يرقينى ولا فيه مصلحه بينه وبينى
الا بلدنا وحب بلدنا وبقلها ورزقى على الله
علشان كده احنا اخترناه

اخترناه وبايعناه واحنا معاه لمشاء الله

إخترناه إخترناه

بعد سلامنا ورفع علمنا كان نص العالم مخاصمنا
حتى الاخوه أهل النخوه جه وصل الود وصفاه
علشان كده احنا اخترناه

إخترناه و بايعناه و إحنا معاه لما شاْ الله


اخترناه اخترناه



قولنا وقالوا وطول باله مقفلش لكاتب جرناله
واما يحاسب حد يعاند مسمعناش عن حد اذاه
علشان كده احنا اخترناه
اخترناه وبايعناه واحنا معاه لما شاء الله

إخترناه إخترناه

اول مره يا مصر يا حره نقفل باب الحرب المره
بعد ما حرر طابا وقرر يبدا عهد سلام وحياه
علشان كده احنا اخترناه

اخترناه وبايعناه واحنا معاه لما شاء الله


إخترناه إخترناه


وفى لقاءاته ببلدياته بينسى معاهم رسمياته
يفتح قلبه كان حبايبه قاعدين على المصطبه وياه
علشان كده احنا اخترناه

اخترناه وبايعناه واحنا معاه لما شاء الله


إخترناه إخترناه


كله صراحه وزوق وسماحه ويحل المشكله براحه
وبيحكلنا عن مشاكلنا ويقلنا على البير وغطاااااااااه
وعشان كده احنا اخترناه

اخترناه وبايعناه واحنا معاه لما شاء الله


إخترناه إخترناه


كنا فى زنقه وعوزه وخنقه وديونا تكتيفه وشنقه
رسم الخطه الف محطه فات نصها والباقى وراه
وعشان كده احنا اخترناه

اخترناه وبايعناه واحنا معاه لما شاء الله


إخترناه إخترناه



بدأ السكه وفكها فكه باقى علينا شويه فكه
وهنتحمل لما نكمل المستقبل واحنا معاه
علشان كده احنا اخترناه

اخترناه وبايعناه واحنا معاه لما شاء الله


إخترناه إخترناه

لابيخدعنا ولا يطمعنا بكلام إنشاء ملهوش معنى
ولا يوعدنا غير بجهودنا هى الهنا والغنا والجاه 
وعشان كده احنا اخترناه

اخترناه وبايعناه واحنا معاه لما شاء الله


إخترناه إخترناه


روحه السمحه ادب ومصالحه صافى القلب يا كفر مصيلحه
مش متكبر ولا متجبر هادى وابسط خلق الله
علشان كده احنا اخترناه

اخترناه وبايعناه واحنا معاه لمشاء الله




إخترناه إخترناه

















السبت، 27 مارس 2010

( زرادشت ...يرحب بعودة فخامتك )






وضع ( زرادشت )  مقعده الخشبى على حدود ظلال إحدى الأشجار الوارفة 
بحيث يكون المقعد فى تلك المنطقة بين حدود الظلال و حدود أشعة الشمس الدافئة
فى تلك الغابة التى قرر أن يسكنها بعد أن إنهار منزلة و لم يجد مكانا
فى مساكن الإيواء ، ثم أخرج الريشة و المحبرة و بدأ بتسطير فقرة جديدة
فى كتابه الذى يعكف على تأليفه مؤخرا بعنوان ( سيكولوجية الشعوب المتخلفة ) 
و لم ينسى طبعا أن يفتح الراديو المضبوط دائما على إذاعة نجوم إف إم 
مزيكا على كيف كيفك ، ثم كتب يقول ((  أن اليوم يتكون من ليل ونهار،
نور وظلام، والعالم أيضا يتكون من خير وشر؛ لذلك فالخير
لا يمكن أن يصبح شرًا، والشر لا يمكن أن يصبح خيرًا،
وإن الكهنة والسحرة الذين يعبدون الأوثان والأصنام لا بد أن يكونوا
على خطأ؛ لأن معتقداتهم كانت أن الآلهة والأوثان التي يعبدونها
هي آلهة الشر، وأنهم يتقربون إليها اتقاء لشرها ودفعًا له،
وهم كذلك يتقربون إلى إله الشر ليصنع لهم الخيرو هذا
مما ينافى العقل و المنطق ))


 أنهمك الفيلسوف الإيرانى فى تدوين أفكاره فى الكتاب الذى 
يتوقع له أن يحقق مبيعات عالية فى الأسواق ترضى عنه بها
دار النشر التى يتعامل معها كما يمكن أن توفر له شقة إيجار جديد 
فى أى حى متوسط المستوى بالقاهرة يمكنه من ترك تلك الغابة المنعزلة 
و بينما هو منهمك فى أفكاره و أماله فوجيء بجلبة و أصوات تتصاعد
قادمة بإتجاهه ثم ما لبثت هذه الأصوات أن تجسدت فى صورة لحشد حافل
من مختلف حيوانات الغابة و طيورها تجرى مسرعة بإتجاه الشرق
إنتابته دهشة شديدة فقد إعتداد على الهدوء و الركود و عدم التغيير منذ
إضطر لسكنى هذه الغابة و هكذا فقد إستوقف  ( محروس )
ذلك القرد ثقيل الظل الذى كان يمشى فى أخر الموكب بتثاقل و كأنه 
لا يعنى باللحاق به ، فبادره زرادشت :
ــ صباح الخير يا محروس
فرد عليه القرد مشاكسا : 
= صباح الخير يا زر زر 
 كان ( زرادشت ) يتضايق كثيرا من طول لسان هذا القرد و خاصة
عندما يناديه ب ( زر زر ) اللعينة هذه ، فقد كان يرى فى ذلك
تطاولا على مقامه الفكرى و الأدبى مما يزيد من معاناة السكن فى غابة 
لا تفتقر للحيوانات ذات الألسنة الطويلة إلا أنه إبتلع ذلك ليعرف 
الأخبار متسائلا : 
ـــ هو الجماعة دول مالهم كدا بيجروا ليه ؟
نظر ( محروس ) بتهكم للراديو قائلا : 
ما هو إنت طول ما  بتسمع نجوم إف إم و إنت فى سنك دا مش هتفلح 
الناس دى يا سيدى بتجرى علشان تلحق اللحمة 
= هما بيوزعوا لحمة هناك ؟ 
قالها ( زر زر ) و قد إبتهج متذكرا أنه لم يشم رائحة اللحمة منذ عهد الملك 
( كاشتاسب ) .
ــ بيوزعوا حاجت كتير هناك لو روحت هتاخد 
= أكيد يعنى هاخد ؟
ــ بص .........هو كل إللى بيروح هناك بياخد 
= طيب هو كل سكان الغابة راحوا 
ــ إللى عايز ياخد بس هو إللى بيروح 
= طب أنا هروح معاهم يمكن أخد .....سلام يا محروس 
ــ سلام يا زر زر .

**************

أسرع فيلسوفنا الوقور يهرول خلف الجمع أملا فى بعض الطعام و الهدايا 
التى توقع أنهم يوزعونها و إن لم يكن يعلم ماذا و لماذا يوزعون 
و لما وصل لمكان التجمع فوجيء بمشهد غريب 
كانت العصافير تحط فوق أكتاف مبارك بينما الأرانب و الغزلان تلهو 
ببراءة و رقة بين أقدامه بينما هو يتقدم مبتسما بين حشد من الوزراء
و الصحافيين و الفنانين و كبار ــ رجال ــ الدولة 
مشهد رائع ذكر ( زرادشت ) بمشهد ( سنو وايت ) فى كارتونه المفضل
الذى كان يتابعه على قناة قبيلة ( سبتياما ) الفضائية فى طفولته حينما 
كانت ( سنو وايت ) تغنى بصوتها الملائكى و جمالها الخارق بينما العصافير
الملونة و الأرانب و الغزلان تلهو ببراءة و رقة بين أقدامها 

حركت تلك المشاهد و الذكريات مشاعر بطلنا فإهتز قلبه من داخله و إنتقلت 
إليه عدوى الإثارة و الحماس فلم يستطع كبح جماح نفسه من أن يتحرك 
على أنغام موسيقى تشريفة ( حسب الله ) التى صاحبت الموكب القادم
من المطار ، و رغم سنوات عمره و هرمه إلا أنه فوجيء بنفسه و قد تناول 
العصا و أخذ يرقص بلدى على إيقاع التشريفة أمام الموكب و قد بدأ السادة
الوزراء و المحيطين بالرئيس فى التفاعل معه و التصفيق له لتزداد حماسته
و يتحسن أداءه ، و بعد إنتهاءه أشار له الرئيس بالإقتراب و سأله عن إسمه 
فرد قائلا : 
ــ إسمى زرادشت يا ريس ...و إصحابى بيقولولى ( زر زر ) 
إبتسم الرئيس و ربت على كتفه بحنان أبوى و عطف من يبلغ الثمانين من العمر
على من يبلغ فقط الستين من العمر قائلا: 
= إنت شاطر يا زر زر 

*************

عاد ( زر زر ) مرة أخرى إلى مقعده و طاولته ليجد أوراقه ما زالت فى مكانها 
فنظر إلى ما كان يكتبه ثم مد يده فى جيبه يتحسس الخمس بواكى التى سكنت 
جيبه منذ فترة وجيزة و لم تفرش عفشها فيه بعد ، و وقف لحظة شاردا كأنه
يفكر فى أمر ما إلا أنه سرعان ما بدا كمن قد حسم أمره فمد يده يمزق الصفحات 
التى كتبها ثم جلس و بلل ريشته من المحبرة و أسرع بكتابه فقرة جديدة تقول فى 
أولها ( حمد الله عالسلامة يا جاى من السفر و حشانا الإبتسامة وشك ولا القمر
، و إخترناه إخترناه ....يوم ما عبر  و قلوبنا  معاه )

أما ( محروس )  الذى كان يتابع المشهد الأخير من فوق فرع الشجرة فقد 
هز رأسه أسفا على ( زر زر ) و على الغابة التعيسة .




( تمت ) 



*******************

الفقرة إللى ما بين قوسين فى الأول  من ويكيبديا ...

الخميس، 25 مارس 2010

عذابات طائر الرخ الأخير




طار (( الرخ )) و هو غاضب بشدة  حتي لحق (( بالنسر )) و صرخ في وجهه بصوته الأجش 

الذي يشبه صوت ببغاء مبحوح :

ـــــــ أنت أيها النسر الحقير كيف تجرؤ علي إهانتي ؟؟؟

رد (( النسر )) بهدوء و هو يستند علي فرع الشجرة التي يقف عليها
معتمدا علي قدم واحدة بينما الأخرى مثنية تحته :

= إهانتك ماذا يا رجل ألا تنظر لنفسك ............ إنك طائر منقرض
و صوتك الأجش يشبه صوت الببغاء المبحوح .


و هنا ..........

نظر له (( الرخ )) غير مصدق و فجأة إنطلق الرخ في البكاء بصوته
الأجش ثم تركه و طار بعيدا .



أحس النسر بالذنب لجرحه شعور الرخ ....... فلام نفسه لحظة ثم قرر اللحاق به .




و بجوار ذلك الجدول الصغير في تلك الغابة الأستوائية  جلس الرخ
يبكي بينما النسر يحاول تهدئته .

ـــــ لا تحزن يا رخ فأنا لم أكن أقصد .

= اهاهاهاهاها .........إبتعد عني ....أنت نسر سيء .....هيءهيءهيء......نفففففف 

ـــــ نعم .....أنت علي حق ....أنا نسر سيء .....لكني لم أقصد ما قلته .

= لا بل تقصد ........أهاهاهاها ..........هيء هيء هيء هيء .

و هنا إقترب النسر منه و وقف علي كتفه و بصعوبة أخذ يربت بجناحه الطويل الذي

برغم أنه يقارب المترين في الطول  إلا انه بدا صغيرا علي رأس ذلك العملاق الباكي و قال :

ـــــــ لا تحزن يا روحي .....فأنت طائر رائع و جميل .

توقف الرخ عن البكاء فجأة قائلا بدهشة حذرة :

ــــــ حقا ؟؟!!!

تشجع النسر و قال محاولا إرضاء ذلك العملاق الطفولى : 

= نعم يا صديقي .....أنت رائع و صوتك جميل جدا أيضا .

ــــــ صوتي انا جميل ؟؟؟!!!!

قالها الرخ بعبط 

= نعم يا عزيزي .....و يمكنك أن تغني و تنتج شرائط ايضا .

تطلع الرخ إلي الأفق في هطل و هو يشاور علي صدره بجناحه الضخم قائلا
بصوته الأجشالذي يشبه صوت ببغاء مبحوح :

ـــــــ أنا !!.......أنا أغني ..........!!!! .........

= نعم ... و لم لا ؟؟....... إن لك صوتا جميلا .

و هنا إحتضن الرخ النسر بقوة و هو يهتف في سعادة طفولية :

ــــــ أنت نسر رائع ........و ظريف .

جاهد النسر ليلتقط أنفاسه ثم قال من بين ضلوعه المختنقة :

= حسنا يا صديقي ...........تكاد تخنقني .

تركه الرخ بغتة فسقط الأخير علي الأرض بقوة .

ـــــ اه أسف يا صديقي

هكذا قال الرخ و و يضع ريشة جناحه في منقاره الضخم خجلا .

قام النسر من سقطته و هو يجمع شتات وقاره  النسرى  قائلا :

لا عليك ......اه ........أنا بخير ........... اه اه ...........

ثم إبتسم قائلا :

ــــــ ما رأيك بجولة صباحية فوق منطقة الشلالات ؟؟

صاح الرخ بصوته الأجش الذي يشبه صوت الببغاء المبحوح :

= سيكون هذا رائعا ..........


و أنطلقا من فورهما ................


*****************************

علي حافة ذلك الجدول الصغير الذي يؤدي إليه الشلال وقفت مجموعة (( الخراتيت ))

تنفض عن نفسها بقايا الماء العالقة بجسدها إثر قفزهم في الشلال كنوع من التغيير

بناء علي إقتراح أحدهم ، و قد فوجئوا بظل عظيم قادم نحوهم ، بعدها حط الرخ العملاق 

علي الأرض و حط النسر علي شجرة كبيرة مجاورة و هنا قال الرخ و هو يحيهم بجناحه :

= مرحبا يا رفاق .............. أنا الرخ و هذا هو صديقي النسر و هو يقول أنني طائر رائع

و جميل .

وقفت مجموعة الخراتيت تنظر لبعضها البعض لوهلة ثم إتجهوا بأنظارهم إلي الرخ الذي

إبتسم ببلاهة و إلي النسر الذى نظر للأرض فى حرج .

و هنا صاح الخرتيت صاحب فكرة القفز في الشلال :

__ ما هذا ؟؟.......... من هذا الطائر المنقرض .......و ما هذا الصوت الأجش
 الذى يشبه صوت ببغاء مبحوح ؟؟؟؟






الاثنين، 15 مارس 2010

لقد عملت حادثة !!!





تييييت .......تيييييييييييييييييييييت

إييييييييييييق .......... كرااششششش .....بووووم ، طااااااخ ، تكككككككك


تن تن



دى كانت تفاصيل الحادثة ........ 

بعد حوالى دقيقة عرفت أخرج من العربية من الباب الورانى إللى على اليمين

كان الجنب بتاعى مهشم تماما مع مقدمة السيارة بينما الشيفروليه الدبابة
إللى خبطتنى من الجنب كانت مقلوبة على جنبها من فرط السرعة
و من الحمل إللى كانت شايلاه 


العربية  خدتنى فى سكتها بتاع 5 متر كدا قبل ما سور صغير
على جنب الطريق يوقف عربيتى قبل ما تقع فى الغيط و دفع هذا البطل
حياته ثمنا لذلك إذ تسببت عربيتى فى إنهياره .

 طبعا بما إننا كنا على طريق زراعى فسرعان ما إتجمع الناس فى ثوانى 

ــ و إنت كويس ...فيك حاجة ، طب إشرب ميه 



خرجت مش حاسس غير بجرح صغير فى إيدى بينزف نزف بسيط 

التلاتة إللى كانوا فى العربية التانية خرجوا سلام تماما 





سوسوسوسوسوسوسو......

لأ دا جرس الباب ...متخافوش 

دا أكيد بابا ..... شوية وراجعلكم 















سورى إتأخرت عليكم ..........

أصل بابا لسة جاى من المنصورة حالا كان هناك فى المستشفى
علشان يعمل عملية ، العملية إتأجلت و هو رجع تانى يدوبك 
من شوية لما الجرس رن ... طبعا هو مكانش يعرف حاجة 
عن حادثة إمبارح ...لسا قايلينله أهو ....





 نرجع تانى لما بعد الإستطدام ......

كلمنا النجدة و عملنا محضر 

يمكن متعبتش فى الحادثة قد ما تعبت من القاعدة فى المركز
... إنتظار طويل و روتين فعلا أسطورى

بعدها إتحطت الكلابشات فى إيدينا ــ اه ما هو حوادث المرور جنح ـــ

و إترحلنا على النيابة 

أخيرا حققت أحد أحلام حياتى بإنى أركب عربية الترحيلات
ــ أيوة ........هى الزرقا الكبيرة إللى ليها شبابيك حديد صغيرة دى ـــ

بس أنا كنت بدأت أتعب مع بداية الإحساس بالكدمات و الرضوض 

روحنا النيابة و قعدنا هناك مستنين و فى الأخر دخلنا كدا لشاب
صغنون و حبيب ماما خالص دا كان وكيل النيابة ،
سألنا سؤالين كدا على الماشى و صرفنا 

قبل ما أدخل النيابة خالى اللذيذ ــ أصل أنا عندى خال لذيذ ــ
لقاها مناسبة سعيدة فقرر يصورلى فيديو و أنا لابس الكلابشات فى إيدى
، و أنا برضه تجاوبت معاه و عملت علامة النصر و صرخت فى وش الكاميرا
كل شيء يهون فى سبيل مصر 



الولد إللى خطبنى مش معاه رخصة و لا بطاقة و العربية بتاعتهم
 مش مرخصة و كمان عليه قضية !!!!!



رجعنا تانى المركز فى عربية الترحيلات ــ يا للروعة مرتين فى يوم واحد ....كم أنا سعيد ـــ 


و هناك فكيت الكلابش ــ كنت طول عمرى منتظر يوم الكلابش دا ــ
و أخيرا بعد حوالى 7 ساعات من الحادثة 

روحت البيت 




العربية بتاعتى كويسة ...بس كل حتة فيها لوحدها .....

و بعدين تحس كدا إن النص القدمانى بالجنب بتاع السواق عندى
تعرضوا لعملية تبطيط مبرحة 


و رغم منظر العربية المخيف إلا إنى الحمد لله بأعجوبة كل إللى
عندى كدمات و رضوض فى جنبى و كتفى الشمال 

و ورم فى رجليا الإتنين 


و هنزل النهاردة أكشف على my internal organs 



السبت، 13 مارس 2010

من مذكرات حمادة ...( مضيق ثرومبوبلاى )


من مذكرات حمادة .....

كنت دايما ولد شطور  و أمور و بسمع  الكلام و بشرب اللبن و بغسل
سنانى زى الشاطرين علشان الساحرة الشريرة متحولنيش  لكانغرو !!

يعنى من الأخر كدا كنت طفل و مراهق مثالى ....و إستكمالا لهذه المعطيات 
فأنا كنت بالتبعية من الولاد الشطاطير إللى دايما فى فصل المتفوقين فى مرحل
ة الإعدادى و الثانوى، و طعا كان أغلبية الناس إللى بتدخل مثل هذه الفصول
سيئة السمعة عادة بيبقوا مشتركين فى كثير من الصفات السابق ذكرها و بالتالى
كانت ألعابنا أن و إصحابى تميل إلى إنها تكون بنانيتى أحيانا .... 

يعنى لو ملعبناش كورة مع الولاد الوحشين من الفصول التانية إللى ــ ياى ـــ  مش 
بيذاكروا ولا بيستحموا كنا بنلعب ألعاب لطيفة و هادية زى الحجلة أو اللعبة الجميلة 
( ولد ، بنت ، جماد ، حيوان ) ..... أنا مش عارفلها إسم محدد.....بس هى معروفة للجميع  
طبعا و بتعتمد على  إن المجموعة كلها بينطلب منها حرف ، و على الحرف دا مطلوب
نجيب أسماء حاجات من السابقة دى بتبتدى بالحرف موضع الطلب

كنت دايما بتمتع بذهن نصف حاضر ، يعنى الصراحة مكونتش ببقى من سريعى البديهة 
إللى بيجيبوا الكلام بسرعة ، بس يمكن طبيعة إطلاعى و قرايتى من الصغر خلت عندى 
مساحة أوسع  و مخزون أكبر من الكلمات و إللى عادة كانت بتبقى غريبة عليهم 

و من أكبر الحاجات إللى دايما كنا بنختلف عليها كل مرة 

هى حرف ال ( ث ) 

حرف صعب قوى و ثعبانى كدا و مفيش كلام كتير فى العربية و لا العامية بيبتدى بيه 

و بخاصة عنصر ( البلد ) 

دور كدا فى مخيلتك .....هتلاقى صعب إنك تلاقى بلد بحرف ال ( ث ) 

بس أنا كنت بلاقى ......

( ثرومبوبلاى ) 

!!!!!!!!

أول ما نقول رفع القلم و يبدأ كل واحد يقول إللى كاتبه نيجى عند البلد كله يقول ملاقيتش
و أنا أطلعلهم كدا بكل هدوء و لطافة بالكلمة دى 

طبعا لكم أن تتخيلوا ردود الفعل ــ الغير مؤدبة ــ من مجموعة المراهقين الأوغاد حيال 
واحد بيقولهم كلمة مش عارفين ينطقوها 

بس أنا كنت دايما بعد عاصفة الإحتجاج ما تعدى بهديهم و أبدأ أحكيلهم حكاية ( ثرومبوبلاى ) 


تحبوا تعرفوها ............





هى لحظة رومانسية أخرى فى التاريخ الإغريقى ....  


لما الفرس حاولوا يحتلوا بلاد الإغريق للمرة التانية فى التاريخ


المدن الإغريقية إللى كانت دايما متناحرة و متعادية

و بيحتلوا فى بعض و بيشردوا فى بعض 

المرة دى إتحدوا جميعا فى مواجهة الخطر المشترك و أحسوا لأول مرة

فى تاريخهم بالأصل المشترك و الخلفية الثقافية و العرقية إللى بتجمعهم


و لأول مرة تم تكوين جيش موحد من كل المدن الإغريقية للدفاع عن أنفسهم

و جعلوا قيادتهم فى إيد المدينتين الأكبر و الأكثر عداوة فى تاريخ مدن البشر

أثينا و إسبرطة


أثينا خدت قيادة الأسطول البحرى الموحد لكل المدن نظرا لشهرتها

فى ميدان البحر


أما إسبرطة فتولت قيادة الجيش البرى لإن معروف إن محاربى إسبرطة من

أصلب و أشجع المحاربيين فى التاريخ البشرى كله


************






نرجع الأول كدا لبداية الموضوع سنة 500 قبل الميلاد ــ تاريخ سهل خالص اهه ــ

نعرف بقى إن الفرس كانوا محتلين ساحل تركيا  الحالية

و الساحل دا أصلا كان الإغريق محتلينه و مسيطرين على السكان الأصليين فيه قبل مجيء الفرس و كانوا مورينهم الويل و لما جه الفرس و إحتلوا تركيا عملوا فى الإغريق أبشع مما كانوا بيعملوا فى الناس ــ ما هو التاريخ عبارة عن أبدان راكبة أبدان و ربنا بيخلص حق المظلوم من الظالم ــ


سنة 500 ق. م

هؤلاء الإغريق إللى فى المستعمرات  ثاروا على الحاميات الفارسية و طلبوا مساعدة من 

إخوانهم الإغريق إللى ساكنين فى اليونان بلادهم الأم 

و بالفعل جاتلهم مساعدات من ( أثينا ) أكبر مدن الإغريق فى الوقت دا


**********

إنتقام الفرس :


كانت النتيجة إن ( داريوس الأول ) إمبراطور الفرس جرد حملة إنتقامية

إستعادت تانى أسيا الصغرى ( تركيا حاليا ) و كمان قرر إنه يأدب
إغريق اليونان و عبر بالسفن بتاعته و نزل بيها على الساحل اليونانى
و إحتل مجموعة من المدن الإغريقية فى طريقه للوصول لأثينا


الإغريق أدركوا إن الفرس مش هيقفوا عند أثينا
و بالتالى أسرعت بعض المدن و على رأسها ( إسبرطة ) أكبر أعدء أثينا
إلى نجدتها

لكن اللى حصل إن الجيش الإسبرطى وصل المعركة متأخر
ودخل مدينة أثينا و أهلها بيحتفلوا بالإنتصار على جيش الفرس

طب إزاى رغم الفرق الهائل فى العدد و الإمكانيات !!!!!


الحقيقة إن جيش الفرس واجهته كتير من المشاكل
منها إن العواصف دمرت جزء من الإسطول بتاعه
دا غير إنهم كانوا بيحاربوا على أرض غريبة عنهم مش معتادين على جغرافيتها الصعبة
كما إن قائد جيش أثينا كان أزكى من قائد الفرس
داغير إن المحارب الإغريقى كان ليه أفضلية على المحارب الفارسى

إللى حصل إن الإثينين هزموا الفرس فى المعركة لكن مدمروش قواتهم
و فى فرق بين الحاجتين  

 لكن رغم بقاء القوة الضاربة من قوات الفرس إلا  إنهم فضلوا يرجعوا بلادهم
على أن يعيدوا الكرة مرة أخرى حينما تسنح الظروف 

*************************


سنة 480 ق.م

إكسرسيس إمبراطور الفرس و إبن داريوس الأول


قرر إنه ينتقم لخسارتهم الأولى

و جرد أكبر حملة حربية فى التاريخ

مليون محارب فارسى لإحتلال اليونان !!!!!!!!

لكم أن تتخيلوا ضخامة هذا العدد فى هذا العصر 

لكم أن تتخيلوا مدى الرعب إللى أصاب الإغريق ، قد إيه الدنيا ضلمت

فى عينيهم و قد إيه دا كان بالنسبة ليهم نهاية العالم  


لكن ....................

فى اللحظات العصيبة ..... عند الأمم العظيمة .... بيطلع رجال عظماء
كتبلهم القدر إنهم يكونوا محوريين فى حياة أمتهم

ملك إسبرطة ( ليونايدس ) إنطلق ب 300 جندى هما الحراسة الشخصية بتاعته
و خرج من مدينته لحد مضيق ( ثرومبوبلاى ) ــ محور كلامنا ــ  علشان يوقف جيش الفرس لوحده 
لإن مجلس المدينة إتأخر على ما خد قرار المشاركة فى  الحرب 
( لاحظوا إن الناس دول كانوا ديموقراطيين و مكانش الملك يقدر ياخد قرار من دماغه ) 

300 محارب .........

أمام جيش من مليون محارب

!!!!!!!!!!!!!!!!

و رغم ذلك كذا يوم ورا بعض مقدرش الجيش الفارسى يخترق مضيق
( ثرومبوبلاى ) نتيجة دفاع ال 300 جندى عنه !!!!!!!!!!

طب إزاى دى !!!!!

 علشان محدش يظلم الفرس فلازم نقول إن مضيق ( ثرومبوبلاى ) دا فى ضعف
إتساع صالون بيتكم كدا تقريبا و هو المدخل الوحيد لبلاد الإغريق 
من الجهة إللى كان فيها جيش الفرس


(( أكيد معظم الناس دلوقتى شافت فيلم 300 و شافت المضيق الصخرى إللى كانت المشاهد فيه 
و قد إيه كان إكسرسيز  دايما مجبر  يبعت عدد قليل جدا من القوات كل مرة علشان المكان مكانش يكفيهم )) 





300 محارب إسبرطى أرخوا لواحدة من أعظم ملاحم البطولة و الشجاعة فى التاريخ
طبعا تم إفناء هذه  القوة الصغيرة  الشجاعة عن أخرها بالإضافة كمان ل 500 محارب 
من قرية صغيرة بجوار المضيق إسمها ( ثيبيا ) كانوا إنضموا ليهم فيما بعد


طيب و إيه تأثير بقى ال800 مقاتل دول فى مسار الحرب 
عادى يعنى كان موقف شجاع و إنتهى 

لأ يا عزيزى .....

القوة الصغيرة دى نجحت إنها تعطل دخول الجيش العظيم دا عدة أيام 
و الأيام دى كانت غالية جدا فى حياة مدن الإغريق إللى كانت محتاجة الأيام دى 
علشان تنظم قواتها و توفق أمورها فى الدفاع المشترك بالجيوش النظامية الكبيرة 

دا غير إن جيش الفرس كان جيش كبييير بس غير متجانس و معظمه من المرتزقة 
و بالتالى لما فوجئوا بهذه المقاومة العجيبة الشرسة من عدد يقل عن ألف مقاتل 
حصهم نوع من الهزيمة النفسية متخيلين كيف تكون ملاقاة الالاف الأخرى من أهل 
هذه البلاد صعبة المراس 


بعد عبور الفرس من المضيق دخلوا فى عمق بلاد الإغريق

و هنا كانت المدن الإغريقية أخيرا إجتمعت و قررت تجمع جيوشها كلها

تحت قيادة أثينا و إسبرطة


*****************************

من الحوادث المدهشة فى التاريخ

ملحمة فداء أهل أثينا


لما الجيش الأسطورى قرب من مدينتهم

إنسحبوا كلهم من المدينة و تم إخلاءها تماما و إتجهوا إلى الجبال المحيطة
علشان ينتظروا الجيوش الإغريقية إللى جاية  فى الطريق لمساعدتهم 

تخيلوا معايا   المنظر دا : 

مدينتهم الجميلة الحلوة .....تحفة الأنظار و جميلة بلاد الإغريق
بتتحرق قدام عينيهم و النار طالعة فيها و شايفينها من مكانهم
فى الجبال المحيطة و مش قادرين يتحركوا للدفع عن معشوقتهم .



لكن الإنتقام متأخرش ........

الأسطول الإغريقى الموحد إنتصر بقيادة أسطول أثينا على الأسطول الفارسى
فى معركة ( سلاميس ) البحرية
أما الجيش البرى بقيادة إسبرطة فأنتصر فى معركة( بلاتيا ) رغم الفرق
المهول فى العدد بين الجيشين 

و لما إكسرسيز رأى إنهزام الأسطول .....خاف لتنقطع خطوط الإمداد اللوجستى 
عن جيش بالحجم دا و هما فى قلب بلاد غريبة عنهم و أهلها شرسين بحق 

فقرر إنه ينسحب بالعدد الضخم المتبقى من جيشه حفاظا عليه 

و نجا الإغريق للمرة التانية من غزو الفرس مرة بقيادة الأب داريوس  و مرة بقيادة الإبن إكسرسيز



و لحد دلوقتى دى تعتبر من عجائب التاريخ

صمود الإغريق قدام جيش الفرس الضخم دا يعتبر من أعاجيب الدنيا


و تحت قيادة ألد الأعداء ( أثينا ) و ( إسبرطة )

إنتصرت مدن الأغريق المتحاربة دائما 

و أصبح الحدث دا من الحوادث إللى مش ممكن تنسى فى تاريخهم



*****

دى كانت قصتى مع ( ثرومبوبلاى ) 

بس أنا الصراحة برضه حاسس إنى كنت نوعا ما بنصب عليهم لإن دا إسم مضيق مش بلدة ...!




الخميس، 11 مارس 2010

( أفراس النهر )

Image and video hosting by TinyPic





سأل فرس النهر أقرانه و هو يتحرك في خفة مؤديا بعض حركات الباليه الإيقاعي :

ـــــ و لماذا لا نتزحلق سويا علي الجليد يا رفاق ؟

قال أحدهم و هو يرفع قدمه من فوق رأس التمساح  البائس :

ـــــ لأننا ببساطة أفراس نهر .............. كيف لنا أن نتزحلق علي الجليد ؟

قال أخر و هو يرقد في الماء :

ـــــ كما أننا في أفريقيا ...........من أين لنا بالجليد لنتزلج عليه ؟


توقف الأول عن الرقص و بدا كمن جائته فكرة ثم قال في سعادة : 

ـــــ إذن ................نسافر إلى  السويد يا رفاق .



توقفت أفراس النهر عن مزاولة أي شيء كانت تقوم به و نظروا

جميعا لبعضهم العض و فجأة .............. تصايح الجميع بسعادة

و صفق  البعض إستحسانا للفكرة و رمي أخرون قبعاتهم في الهواء

و أخذوا يرقصون ...........و في أحد الأركان لم يجد أحدهم قبعة ليقدفها 

فأحضر قلم و ورقة و أسرع برسم واحدة ثم إرتداها و لكنه لم يقذفها

إذ أن لونها قد أعجبه كثيرا فقرر الأحتفاظ بها .

و سعدت أفراس النهر جميعا بإقتراح صديقهم الراقص فرفع إثنين

منهم مؤخرته البدينة فوق أكتافهم و طاف القطيع خلفه في أرجاء الغابة
يرددون جميعا :

ـــــ إلي السويد .....تشا تشا .........إلي السويد ..........تشا تشا .


بينما  وقفت جميع حيوانات الغابة تنظر إلي أفراس النهر ــ  المخبولة ــ  بإندهاش حقيقي


!!!!!
 


Image and video hosting by TinyPic