إللى أوله هراء أخره هبل

بص يابنى و بصى يابنتى ......

المدونة دى أنا عاملها علشان دماغى ، علشان متجننش ، علشان زى ما هو باين

من إسمها أصرف فيها الشحنات الكهربية و الأفكار و الكلام إللى لو إتحبس 

دماغى هتضرب و أتجنن 

و إنت أكيد ميخلصكش إنى أتجنن ......مش كدا ...

يعنى إنت هنا ــ و أنا معاك برضه متزعلش كدا ــ فى شبكة صرف عقلية 

فأهلا بك فى عالم الصرف و  المجارى و الهراء .......الذى لا داعى له .

الاثنين، 15 مارس 2010

لقد عملت حادثة !!!





تييييت .......تيييييييييييييييييييييت

إييييييييييييق .......... كرااششششش .....بووووم ، طااااااخ ، تكككككككك


تن تن



دى كانت تفاصيل الحادثة ........ 

بعد حوالى دقيقة عرفت أخرج من العربية من الباب الورانى إللى على اليمين

كان الجنب بتاعى مهشم تماما مع مقدمة السيارة بينما الشيفروليه الدبابة
إللى خبطتنى من الجنب كانت مقلوبة على جنبها من فرط السرعة
و من الحمل إللى كانت شايلاه 


العربية  خدتنى فى سكتها بتاع 5 متر كدا قبل ما سور صغير
على جنب الطريق يوقف عربيتى قبل ما تقع فى الغيط و دفع هذا البطل
حياته ثمنا لذلك إذ تسببت عربيتى فى إنهياره .

 طبعا بما إننا كنا على طريق زراعى فسرعان ما إتجمع الناس فى ثوانى 

ــ و إنت كويس ...فيك حاجة ، طب إشرب ميه 



خرجت مش حاسس غير بجرح صغير فى إيدى بينزف نزف بسيط 

التلاتة إللى كانوا فى العربية التانية خرجوا سلام تماما 





سوسوسوسوسوسوسو......

لأ دا جرس الباب ...متخافوش 

دا أكيد بابا ..... شوية وراجعلكم 















سورى إتأخرت عليكم ..........

أصل بابا لسة جاى من المنصورة حالا كان هناك فى المستشفى
علشان يعمل عملية ، العملية إتأجلت و هو رجع تانى يدوبك 
من شوية لما الجرس رن ... طبعا هو مكانش يعرف حاجة 
عن حادثة إمبارح ...لسا قايلينله أهو ....





 نرجع تانى لما بعد الإستطدام ......

كلمنا النجدة و عملنا محضر 

يمكن متعبتش فى الحادثة قد ما تعبت من القاعدة فى المركز
... إنتظار طويل و روتين فعلا أسطورى

بعدها إتحطت الكلابشات فى إيدينا ــ اه ما هو حوادث المرور جنح ـــ

و إترحلنا على النيابة 

أخيرا حققت أحد أحلام حياتى بإنى أركب عربية الترحيلات
ــ أيوة ........هى الزرقا الكبيرة إللى ليها شبابيك حديد صغيرة دى ـــ

بس أنا كنت بدأت أتعب مع بداية الإحساس بالكدمات و الرضوض 

روحنا النيابة و قعدنا هناك مستنين و فى الأخر دخلنا كدا لشاب
صغنون و حبيب ماما خالص دا كان وكيل النيابة ،
سألنا سؤالين كدا على الماشى و صرفنا 

قبل ما أدخل النيابة خالى اللذيذ ــ أصل أنا عندى خال لذيذ ــ
لقاها مناسبة سعيدة فقرر يصورلى فيديو و أنا لابس الكلابشات فى إيدى
، و أنا برضه تجاوبت معاه و عملت علامة النصر و صرخت فى وش الكاميرا
كل شيء يهون فى سبيل مصر 



الولد إللى خطبنى مش معاه رخصة و لا بطاقة و العربية بتاعتهم
 مش مرخصة و كمان عليه قضية !!!!!



رجعنا تانى المركز فى عربية الترحيلات ــ يا للروعة مرتين فى يوم واحد ....كم أنا سعيد ـــ 


و هناك فكيت الكلابش ــ كنت طول عمرى منتظر يوم الكلابش دا ــ
و أخيرا بعد حوالى 7 ساعات من الحادثة 

روحت البيت 




العربية بتاعتى كويسة ...بس كل حتة فيها لوحدها .....

و بعدين تحس كدا إن النص القدمانى بالجنب بتاع السواق عندى
تعرضوا لعملية تبطيط مبرحة 


و رغم منظر العربية المخيف إلا إنى الحمد لله بأعجوبة كل إللى
عندى كدمات و رضوض فى جنبى و كتفى الشمال 

و ورم فى رجليا الإتنين 


و هنزل النهاردة أكشف على my internal organs 



السبت، 13 مارس 2010

من مذكرات حمادة ...( مضيق ثرومبوبلاى )


من مذكرات حمادة .....

كنت دايما ولد شطور  و أمور و بسمع  الكلام و بشرب اللبن و بغسل
سنانى زى الشاطرين علشان الساحرة الشريرة متحولنيش  لكانغرو !!

يعنى من الأخر كدا كنت طفل و مراهق مثالى ....و إستكمالا لهذه المعطيات 
فأنا كنت بالتبعية من الولاد الشطاطير إللى دايما فى فصل المتفوقين فى مرحل
ة الإعدادى و الثانوى، و طعا كان أغلبية الناس إللى بتدخل مثل هذه الفصول
سيئة السمعة عادة بيبقوا مشتركين فى كثير من الصفات السابق ذكرها و بالتالى
كانت ألعابنا أن و إصحابى تميل إلى إنها تكون بنانيتى أحيانا .... 

يعنى لو ملعبناش كورة مع الولاد الوحشين من الفصول التانية إللى ــ ياى ـــ  مش 
بيذاكروا ولا بيستحموا كنا بنلعب ألعاب لطيفة و هادية زى الحجلة أو اللعبة الجميلة 
( ولد ، بنت ، جماد ، حيوان ) ..... أنا مش عارفلها إسم محدد.....بس هى معروفة للجميع  
طبعا و بتعتمد على  إن المجموعة كلها بينطلب منها حرف ، و على الحرف دا مطلوب
نجيب أسماء حاجات من السابقة دى بتبتدى بالحرف موضع الطلب

كنت دايما بتمتع بذهن نصف حاضر ، يعنى الصراحة مكونتش ببقى من سريعى البديهة 
إللى بيجيبوا الكلام بسرعة ، بس يمكن طبيعة إطلاعى و قرايتى من الصغر خلت عندى 
مساحة أوسع  و مخزون أكبر من الكلمات و إللى عادة كانت بتبقى غريبة عليهم 

و من أكبر الحاجات إللى دايما كنا بنختلف عليها كل مرة 

هى حرف ال ( ث ) 

حرف صعب قوى و ثعبانى كدا و مفيش كلام كتير فى العربية و لا العامية بيبتدى بيه 

و بخاصة عنصر ( البلد ) 

دور كدا فى مخيلتك .....هتلاقى صعب إنك تلاقى بلد بحرف ال ( ث ) 

بس أنا كنت بلاقى ......

( ثرومبوبلاى ) 

!!!!!!!!

أول ما نقول رفع القلم و يبدأ كل واحد يقول إللى كاتبه نيجى عند البلد كله يقول ملاقيتش
و أنا أطلعلهم كدا بكل هدوء و لطافة بالكلمة دى 

طبعا لكم أن تتخيلوا ردود الفعل ــ الغير مؤدبة ــ من مجموعة المراهقين الأوغاد حيال 
واحد بيقولهم كلمة مش عارفين ينطقوها 

بس أنا كنت دايما بعد عاصفة الإحتجاج ما تعدى بهديهم و أبدأ أحكيلهم حكاية ( ثرومبوبلاى ) 


تحبوا تعرفوها ............





هى لحظة رومانسية أخرى فى التاريخ الإغريقى ....  


لما الفرس حاولوا يحتلوا بلاد الإغريق للمرة التانية فى التاريخ


المدن الإغريقية إللى كانت دايما متناحرة و متعادية

و بيحتلوا فى بعض و بيشردوا فى بعض 

المرة دى إتحدوا جميعا فى مواجهة الخطر المشترك و أحسوا لأول مرة

فى تاريخهم بالأصل المشترك و الخلفية الثقافية و العرقية إللى بتجمعهم


و لأول مرة تم تكوين جيش موحد من كل المدن الإغريقية للدفاع عن أنفسهم

و جعلوا قيادتهم فى إيد المدينتين الأكبر و الأكثر عداوة فى تاريخ مدن البشر

أثينا و إسبرطة


أثينا خدت قيادة الأسطول البحرى الموحد لكل المدن نظرا لشهرتها

فى ميدان البحر


أما إسبرطة فتولت قيادة الجيش البرى لإن معروف إن محاربى إسبرطة من

أصلب و أشجع المحاربيين فى التاريخ البشرى كله


************






نرجع الأول كدا لبداية الموضوع سنة 500 قبل الميلاد ــ تاريخ سهل خالص اهه ــ

نعرف بقى إن الفرس كانوا محتلين ساحل تركيا  الحالية

و الساحل دا أصلا كان الإغريق محتلينه و مسيطرين على السكان الأصليين فيه قبل مجيء الفرس و كانوا مورينهم الويل و لما جه الفرس و إحتلوا تركيا عملوا فى الإغريق أبشع مما كانوا بيعملوا فى الناس ــ ما هو التاريخ عبارة عن أبدان راكبة أبدان و ربنا بيخلص حق المظلوم من الظالم ــ


سنة 500 ق. م

هؤلاء الإغريق إللى فى المستعمرات  ثاروا على الحاميات الفارسية و طلبوا مساعدة من 

إخوانهم الإغريق إللى ساكنين فى اليونان بلادهم الأم 

و بالفعل جاتلهم مساعدات من ( أثينا ) أكبر مدن الإغريق فى الوقت دا


**********

إنتقام الفرس :


كانت النتيجة إن ( داريوس الأول ) إمبراطور الفرس جرد حملة إنتقامية

إستعادت تانى أسيا الصغرى ( تركيا حاليا ) و كمان قرر إنه يأدب
إغريق اليونان و عبر بالسفن بتاعته و نزل بيها على الساحل اليونانى
و إحتل مجموعة من المدن الإغريقية فى طريقه للوصول لأثينا


الإغريق أدركوا إن الفرس مش هيقفوا عند أثينا
و بالتالى أسرعت بعض المدن و على رأسها ( إسبرطة ) أكبر أعدء أثينا
إلى نجدتها

لكن اللى حصل إن الجيش الإسبرطى وصل المعركة متأخر
ودخل مدينة أثينا و أهلها بيحتفلوا بالإنتصار على جيش الفرس

طب إزاى رغم الفرق الهائل فى العدد و الإمكانيات !!!!!


الحقيقة إن جيش الفرس واجهته كتير من المشاكل
منها إن العواصف دمرت جزء من الإسطول بتاعه
دا غير إنهم كانوا بيحاربوا على أرض غريبة عنهم مش معتادين على جغرافيتها الصعبة
كما إن قائد جيش أثينا كان أزكى من قائد الفرس
داغير إن المحارب الإغريقى كان ليه أفضلية على المحارب الفارسى

إللى حصل إن الإثينين هزموا الفرس فى المعركة لكن مدمروش قواتهم
و فى فرق بين الحاجتين  

 لكن رغم بقاء القوة الضاربة من قوات الفرس إلا  إنهم فضلوا يرجعوا بلادهم
على أن يعيدوا الكرة مرة أخرى حينما تسنح الظروف 

*************************


سنة 480 ق.م

إكسرسيس إمبراطور الفرس و إبن داريوس الأول


قرر إنه ينتقم لخسارتهم الأولى

و جرد أكبر حملة حربية فى التاريخ

مليون محارب فارسى لإحتلال اليونان !!!!!!!!

لكم أن تتخيلوا ضخامة هذا العدد فى هذا العصر 

لكم أن تتخيلوا مدى الرعب إللى أصاب الإغريق ، قد إيه الدنيا ضلمت

فى عينيهم و قد إيه دا كان بالنسبة ليهم نهاية العالم  


لكن ....................

فى اللحظات العصيبة ..... عند الأمم العظيمة .... بيطلع رجال عظماء
كتبلهم القدر إنهم يكونوا محوريين فى حياة أمتهم

ملك إسبرطة ( ليونايدس ) إنطلق ب 300 جندى هما الحراسة الشخصية بتاعته
و خرج من مدينته لحد مضيق ( ثرومبوبلاى ) ــ محور كلامنا ــ  علشان يوقف جيش الفرس لوحده 
لإن مجلس المدينة إتأخر على ما خد قرار المشاركة فى  الحرب 
( لاحظوا إن الناس دول كانوا ديموقراطيين و مكانش الملك يقدر ياخد قرار من دماغه ) 

300 محارب .........

أمام جيش من مليون محارب

!!!!!!!!!!!!!!!!

و رغم ذلك كذا يوم ورا بعض مقدرش الجيش الفارسى يخترق مضيق
( ثرومبوبلاى ) نتيجة دفاع ال 300 جندى عنه !!!!!!!!!!

طب إزاى دى !!!!!

 علشان محدش يظلم الفرس فلازم نقول إن مضيق ( ثرومبوبلاى ) دا فى ضعف
إتساع صالون بيتكم كدا تقريبا و هو المدخل الوحيد لبلاد الإغريق 
من الجهة إللى كان فيها جيش الفرس


(( أكيد معظم الناس دلوقتى شافت فيلم 300 و شافت المضيق الصخرى إللى كانت المشاهد فيه 
و قد إيه كان إكسرسيز  دايما مجبر  يبعت عدد قليل جدا من القوات كل مرة علشان المكان مكانش يكفيهم )) 





300 محارب إسبرطى أرخوا لواحدة من أعظم ملاحم البطولة و الشجاعة فى التاريخ
طبعا تم إفناء هذه  القوة الصغيرة  الشجاعة عن أخرها بالإضافة كمان ل 500 محارب 
من قرية صغيرة بجوار المضيق إسمها ( ثيبيا ) كانوا إنضموا ليهم فيما بعد


طيب و إيه تأثير بقى ال800 مقاتل دول فى مسار الحرب 
عادى يعنى كان موقف شجاع و إنتهى 

لأ يا عزيزى .....

القوة الصغيرة دى نجحت إنها تعطل دخول الجيش العظيم دا عدة أيام 
و الأيام دى كانت غالية جدا فى حياة مدن الإغريق إللى كانت محتاجة الأيام دى 
علشان تنظم قواتها و توفق أمورها فى الدفاع المشترك بالجيوش النظامية الكبيرة 

دا غير إن جيش الفرس كان جيش كبييير بس غير متجانس و معظمه من المرتزقة 
و بالتالى لما فوجئوا بهذه المقاومة العجيبة الشرسة من عدد يقل عن ألف مقاتل 
حصهم نوع من الهزيمة النفسية متخيلين كيف تكون ملاقاة الالاف الأخرى من أهل 
هذه البلاد صعبة المراس 


بعد عبور الفرس من المضيق دخلوا فى عمق بلاد الإغريق

و هنا كانت المدن الإغريقية أخيرا إجتمعت و قررت تجمع جيوشها كلها

تحت قيادة أثينا و إسبرطة


*****************************

من الحوادث المدهشة فى التاريخ

ملحمة فداء أهل أثينا


لما الجيش الأسطورى قرب من مدينتهم

إنسحبوا كلهم من المدينة و تم إخلاءها تماما و إتجهوا إلى الجبال المحيطة
علشان ينتظروا الجيوش الإغريقية إللى جاية  فى الطريق لمساعدتهم 

تخيلوا معايا   المنظر دا : 

مدينتهم الجميلة الحلوة .....تحفة الأنظار و جميلة بلاد الإغريق
بتتحرق قدام عينيهم و النار طالعة فيها و شايفينها من مكانهم
فى الجبال المحيطة و مش قادرين يتحركوا للدفع عن معشوقتهم .



لكن الإنتقام متأخرش ........

الأسطول الإغريقى الموحد إنتصر بقيادة أسطول أثينا على الأسطول الفارسى
فى معركة ( سلاميس ) البحرية
أما الجيش البرى بقيادة إسبرطة فأنتصر فى معركة( بلاتيا ) رغم الفرق
المهول فى العدد بين الجيشين 

و لما إكسرسيز رأى إنهزام الأسطول .....خاف لتنقطع خطوط الإمداد اللوجستى 
عن جيش بالحجم دا و هما فى قلب بلاد غريبة عنهم و أهلها شرسين بحق 

فقرر إنه ينسحب بالعدد الضخم المتبقى من جيشه حفاظا عليه 

و نجا الإغريق للمرة التانية من غزو الفرس مرة بقيادة الأب داريوس  و مرة بقيادة الإبن إكسرسيز



و لحد دلوقتى دى تعتبر من عجائب التاريخ

صمود الإغريق قدام جيش الفرس الضخم دا يعتبر من أعاجيب الدنيا


و تحت قيادة ألد الأعداء ( أثينا ) و ( إسبرطة )

إنتصرت مدن الأغريق المتحاربة دائما 

و أصبح الحدث دا من الحوادث إللى مش ممكن تنسى فى تاريخهم



*****

دى كانت قصتى مع ( ثرومبوبلاى ) 

بس أنا الصراحة برضه حاسس إنى كنت نوعا ما بنصب عليهم لإن دا إسم مضيق مش بلدة ...!




الخميس، 11 مارس 2010

( أفراس النهر )

Image and video hosting by TinyPic





سأل فرس النهر أقرانه و هو يتحرك في خفة مؤديا بعض حركات الباليه الإيقاعي :

ـــــ و لماذا لا نتزحلق سويا علي الجليد يا رفاق ؟

قال أحدهم و هو يرفع قدمه من فوق رأس التمساح  البائس :

ـــــ لأننا ببساطة أفراس نهر .............. كيف لنا أن نتزحلق علي الجليد ؟

قال أخر و هو يرقد في الماء :

ـــــ كما أننا في أفريقيا ...........من أين لنا بالجليد لنتزلج عليه ؟


توقف الأول عن الرقص و بدا كمن جائته فكرة ثم قال في سعادة : 

ـــــ إذن ................نسافر إلى  السويد يا رفاق .



توقفت أفراس النهر عن مزاولة أي شيء كانت تقوم به و نظروا

جميعا لبعضهم العض و فجأة .............. تصايح الجميع بسعادة

و صفق  البعض إستحسانا للفكرة و رمي أخرون قبعاتهم في الهواء

و أخذوا يرقصون ...........و في أحد الأركان لم يجد أحدهم قبعة ليقدفها 

فأحضر قلم و ورقة و أسرع برسم واحدة ثم إرتداها و لكنه لم يقذفها

إذ أن لونها قد أعجبه كثيرا فقرر الأحتفاظ بها .

و سعدت أفراس النهر جميعا بإقتراح صديقهم الراقص فرفع إثنين

منهم مؤخرته البدينة فوق أكتافهم و طاف القطيع خلفه في أرجاء الغابة
يرددون جميعا :

ـــــ إلي السويد .....تشا تشا .........إلي السويد ..........تشا تشا .


بينما  وقفت جميع حيوانات الغابة تنظر إلي أفراس النهر ــ  المخبولة ــ  بإندهاش حقيقي


!!!!!
 


Image and video hosting by TinyPic

الأربعاء، 10 مارس 2010

شيخ الأزهر مااات ...الله أكبر

82 سنة .........!!!!

هو ليه كل الفاسدين و الخونة و الصامتين و والمنتفعين و الظلمة و الطبالين و الزمارين عندنا أعمارهم طويلة كدا


سنين طويلة من تبرير الظلم و موالسة نظام الحكم الفاسد

و خيانة الأمة لحساب اليهود  



يا ترى هينفعوه دلوقتى !!!!!!!!!!!!!!

بياع

و أسوأ شيء فى الدنيا العالم إللى يبيع دينه بدنيته 

خاين 

و أسوأ أنواع الخيانة خيانة الدين 

منافق 

نفاق على كل لون ...لنظام الحكم الفاسد و لليهود و الأمريكان و لكل أعداء الأمة 


فيك كل العبر يا شيخ الأزهر 

و متفتكرش إن الدفن فى البقيع هيفرق مع من كتب الله عليه العذاب بأعماله  الفاسدة 



الصراحة دا من أسعد الأخبار إللى سمعتها مؤخرا


يا أخى شيء نادر إنك تسمع عن موت واحد من الزمرة الحاكمة

و أدى واحد من زمرة الحكم الفاسد

و دى علامة سعيدة

يااااارب


عقبال الكلب الكبير

عقبال كل المسوخ يارب

الثلاثاء، 9 مارس 2010

( المستذئبة )



Image and video hosting by TinyPic



خرج محمود من سيكشن الألبان و هو سعيد بإنتهاء هذا الملل أخيرا
و قد قرر أن يعود لمنزله سريعا لينعم  ببعض الدفء في فراشه
مع كوب اللبن اللذيذ  إلا أنه تذكر أنه قد نسي معطفة الأبيض في المعمل
فقرر العودة إلي هناك ليلتقطه و عندما عاد للمعمل سمع جلبة خفيفة
فأندهش كثيرا لوجود أحدهم في المعمل في ذلك التوقيت بعد أن إنصرف
معظم الطلبة و أصبحت الكلية شبه خاوية 

و عندما دخل محمود  المعمل فوجيء بزميلته مروة و هى في سبيلها للتحول إلي مستذئب 
فأجفل محمود و أخذته الصدمة و لم يستطع مبارحة مكانه

أكملت مروة تحولها ثم هاجمت محمود المسكين و قضمت رأسه في حركة واحدة
ثم خرجت من المعمل تبحث عن مزيد من الضحايا ..........!!!!!


كان سمير  يشاهد ما حدث من الطابق الرابع حيث قسم الطفيليات 
فأخذه الرعب و تراجع لما خلف شرفة الطابق حتي لا تراه مروة

و أخذ ينظر إلي الهدوء المخيم علي الكلية و علي أخر أفراد الطلبة
و هم يغادرون  و نعي حظه العاثر الذي جعله يبقي وحده في هذا
الطابق المنعزل حتي ذلك الوقت و فكر في عاثري الحظ من مختلف
الدفعات الذين ما زالت سكاشنهم مستمرة حتي السابعة مساءا ..........


إلا أنه طمأن نفسه بإن الوحش من المؤكد سينجذب للأصوات الصادرة
من الأسفل و لن يفكر  في صعود ذلك الطابق الذي يفصله عنه 

إلا أنه لسوء الحظ كان مخطئا ..........

فقد قررت مروة الصعود لأعلي و وجدت عبد الله ينظر لها
و قد شحب كالموتي من شدة رعبه  و بضربة واحدة من المخالب القوي
ة للوحش المتحول طار عنق عبد الله و أرتمت رأسه في الهواء 
حتي سقطت بالأسفل في فناء الكلية الذي كان به أخر المغادرين

و لدي رؤية الرأس المخضبة بالدماء صرخ الجميع في فزع و نظروا للأعلي ليجدوا
الوحش العملاق ذو الشعر الأسود الثائر و هو ينظر بإتجاههم و أسنانه تقطر دما

بينما يرفع جثة زميلهم السابق في الهواء  و مزقها بكلتا يديه .............


صرخ الجميع في رعب و تسابقوا نحو بوابة الكلية المهدمة أساسا .........
بينما خرج من كانوا بالمعامل في الدور الأرضي ليروا ما أصاب الأخرون
فوجيء الجميع بذلك الوحش العملاق و هو يهبط درجات السلم قفزا ............

و الوحشية و جنون الدم يكادان يقتلانه

ساد الصراخ و الرعب وسط الطلبة و الدكاترة و الحرس

و أسرع الجميع إلي الخارج بينما كانت مروة قد وصلت لهم في الأسفل و أخذت

تعمل فيهم القتل و الخمش و العض ...........


(( كانت مذبحة مروعة تلك التي تعرض لها طلبة كلية الطب البيطرى بمحافظة كفرالشيخ
حيث ظهر لهم فجأة و قبيل مغادرتهم مباني الكلية أحد المستذئبين ......... في سابقة
هي الأولي من نوعها و قد تسبب ذلك الوحش في قتل و إفتراس 20 طالبا و طالبة
و جرح ما يزيد عن خمسون أخرون و قد تم إيقافه علي يد قوات الأمن المركزي
مدعمة ببعض ظباط الشرطة ، هذا وقد عبر الدكتور ـــــــــ لجريدتنا عن إندهاشه
الشديد من هذه الحادثة اعجيبة واصفا إياها بأنها الأغرب  في تاريخ مصر الحديث
،و تعليقا علي الأحداث صرح اللواء ـــــــــــ بأن ................. ))




( تمت ) 



الجمعة، 5 مارس 2010


Image and video hosting by TinyPic




بالأمس فقط إكتشفت إنى قد تجاوزت الثالثة و العشرين من العمر !  

أعلم أن ذلك قد حدث فعليا منذ حوالى 10 أيام ،و لكنى لم أدرك فداحة الأمر
و عظم الخطب إلا بالأمس بينما كنت أتأمل ، حياتى فى ظلام الحجرة 

لقد قضيت على ظهر هذه الأرض ربع قرن إلا قليل



ربع قرن بلا إنجازات ....فلم أدرك شيئا مما كنت أحلم به و آمل فيه



فقد مضى ربع قرن إلا قليل و لم أصبح بعد رائد فضاء

ربع قرن إلا قليل و لم أرشح نفسى بعد لرئاسة الجمهورية

ربع قرن و لم أتزوج بعد و لم تدخل كروموسومات ال xx حياتى
بشكل جدى و مازالت ترتع و تمتليء بكروموسومات ال xy 

ربع قرن و لم أصبح عالم براكين و لم أكتشف عنصر جديد فى
الجدول الدورى و لم أصور فيلما عن حياة البطاريق 

ربع قرن إلا قليل و لم أكتشف بعد مواهبى فى الغناء و
لم يعرف العالم مدى روعة موهبتى فى الباليه الإيقاعى 

ربع قرن إلا قليل و لم ألعب بعد للأهلى أو أحترف فى مانشستر
يونايتيد أو حتى أحصل على الدورى مع ريال مدريد 

ربع قرن إلا قليل و لم أنشر كتابى الأول و لم أتصدر بعد أعلى
قائمة المبيعات 

ربع قرن إلا قليل و لم أصبح عالم أثار و لم أرمم أطلال قصر التيه
و لم أكتشف بعد أطلنطس

ربع قرن إلا قليل و لم أفعل شيئا حيال مشكلة التصحر ولا الإحترار العالمى
و لا الحرب الأهلية فى سيراليون 

ربع قرن من الزمان و لم أتسلق إفرست و لم أجوب سيبري
ا و لم أتيه فى كالهارى 

ربع قرن من الزمان و لم أجمع المليون الأول و لم أدخل قائمة
الأغنى فى العالم 



بالأمس تسلقت سنوات عمرى البائسة ، بعضها قديم بال ،
و بعضها مكسور الدرج تسبب فى تعثرى ، بعضها وردى اللون
و البعض أسود ، حتى إذا ما وصلت للأعلى تطلعت لما تركته أسفلى 

يا إلهى ....

كل هذا العمر و أنا بعيد عنك ، كل هذه السنوات و أنا لا أستمتع كثيرا
بحياتى ، كل هذه السنوات و أنا أفعل ما لا أرغب كثيرا بفعله ، 
كل هذه السنوات و أنا أقول لنفسى ( غدا هو يوم جديد ) .

و بينما هذه الأفكار تتداعى لخاطرى إذا بفرس النهر ( مسعد )
قد خرج من خلف المكتب مرتديا تنورتة وردية اللون و حذاء باليه
رقيق و أخذ يرقص بخفة و رشاقة متناهية مبعثرا أغراضى
فى أنحاء الغرفة و التى .....

ما هذا العته !!

فرس نهر بتنورة ! و باليه !

يبدو إننى أهذى من تأثير إقتراب النوم


حسنا كنت أقول أننى لم أصنع بعد ما كنت أريده بحياتى ،
بل أراها بعيدة تماما عما خططته أو على الأقل حلمت به و أننى لابد أن ....

ــ أهلا نابليون ....نعم يا عزيزى لقد ترك الروس لك موسكو
و أخلوها عن بكرة أبيها فى حادثة لم تتكرر كثيرا فى التاريخ
من بعد إخلاء أثينا من سكانها فى وجه الفارسى إكسرسيز
و جيشه المليونى ....لقد توجهوا إلى الحمام ،
عندك فى نهاية الرواق على اليمين ، .........
عفوا عزيزى ــ أنت تأمر ــ و عليكم السلام و رحمة الله و بركاته .

ياللهول !!!.....نابليون !!! ...و عليكم السلام أيضا !!!
....لابد أن أنتهى من هذا المقال سريعا قبل أن أتفاجأ
بديناصورات متجولة فى ظلام الحجرة .

ماذا كنت أقول قبل أن يقاطعنى نابليون ؟

اه..... أننا يجب أن نعيد ترتيب أولوياتنا و التسائل عما إعتبرناه
مسلمات و أبجديات أخذناها دون التفكير فى معناها 

فلقد خلقنا لعبادة الله ، هذا هو الهدف الأساسى من خلقن
ا هكذا نقولها كثيرا و نرددها إذا ما سئلنا و لكننا نقولها
بشكل مبرمج و آلى بدون إدراك حقيقى فلو أدركناها لعملنا بها
و لو عملنا بها لأستمتعنا بحياتنا أيا كانت و لرضينا عما نفعله و لفعلنا ما نرضاه .

هاهو المدير يتصل فى مثل هذا التوقيت !! ، يالهى ماذا
يريد هذا الرجل ؟ ألا يستريح من العمل المتواصل ،
لابد أن لذلك علاقة ما بتقارير العمل عن الأسبوع الماضى ،
يبدو أننى قد نسيت كتابة إسمى فى إحداها إن هذه الأشياء
تثير جنونه بينما أراها أشياء فرعية لا قيمة لها بجوار العمل الأصلى
.......... هاهو يخبرنى أن قسم الحسابات قد خصم لى خمسمائة جنيه
من البدلات لأنى بدلت بعض التواريخ فيها بالخطأ ، هو متعاطف معى
فيما يبدو و هى من المرات القليلة ، أخبره أننى لا أبه حقا بهذه الأشياء
، يصمت و صمته يقول و بماذا تهتم إذن أيها المتحزلق ؟ هل تعمل من أجل إثبات ذاتك ؟ 

أغلق الخط معه و أسمح لنفسى بعدها بالتسائل هل نتهم الروتين
بالسكنى فقط فى أدراج الحكومة دونا عن شركات القطاع الخاص ،
إنه يسكن فى العقول يا سادة حكومية كانت أم خاصة و ـ إيجار قديم كمان ـ
، و بعد التسائل أسمح لنفسى بالصراخ ( و كم خمسمائة جنيه يحتويها المرتب أيها الحمقى !!!! ) 


حسنا ......
أعود مرةأخرى و أقول أنه ينبغى على كل واحد فينا أن يحيا حيات
ه بالشكل الذى لا يندم عليه بعد ذلك عندما يهرم و ينظر إليها و يسترجعها
أو الأخطر عندما يموت و لا ينفع حين إذن الندم أو المراجعة

على ذكر الإسترجاع ، بحكم كونى طبيبا بيطريا ــ مع وقف التنفيذ ــ
أحب أن أنوه أن طائفة المجترات و التى تشمل البقر و الجاموس
و الماعز و الخراف تسمى بهذا الإسم لأنها تلتهم طعامها بكميات كبيرة
و بسرعة بدون مضغ جيد فى الصباح ثم تقضى بعد ذلك فترة
العصر و المغرب فى إجترار طعامها من إحدى معداتها الأربعة
لكى تمضغه مرة أخرى فى فمها و تطحنه جيدا ثم تعيد توجيهه إلى معدة أخرى 

فأحرص عزيزى على أن تكون زكرياتك سعيدة فى مغرب عمرك و إلا فستجتر ما لا يسعدك







Image and video hosting by TinyPic

كيف تقتل مصاص دماء في خمس خطوات ؟

Image and video hosting by TinyPic




عزيزي القاريء ...........

حقا ليست بالمشكلة الكبيرة أن تكتشف بالصدفة أثناء تنظيفك لقبو بيتك
صباحا وجود أحد مصاصي الدماء نائما بإستغراق في تابوت خشبي قديم هناك

يمكنك عزيزي أن تتخلص من هذه المشكلة الصغيرة بنفس سهولة
 عمل فطيرة تفاح بالمكسرات فى مزرعة الجدة بطة .

فقط إتبع التعليمات و نفذها حرفيا ......... و ستكون في أمان تام .







إحتياطات عامة :

* لا تدخل القبو أبدا إلا نهارا ولا تقربه عند الغروب .
* يجب أن يعلم الأصدقاء بما تنتويه قبلا .
* حاول أن تنزل القبو في جماعة فالمشاكل عادة تحدث للمنفردين .


الأدوات :




وتد خشبي ـــ مطرقة ـــــ خوازيق مطلية بالفضة ـــــ كيس من البذور
ــــــ شبكة مليئة بالعقد  ـــ حزمة من الثوم ــــ ولاعة ــــ كيروسين .

الخطوات :


الخطوة الأولي :

عند دخولك القبو يجب أن تكون حزمة الثوم مربوطة حول عنقك و فور دخولك قم

بنثر كيس البذور في أرجاء القبو .

الخطوة الثانية :

إبحث عن التابوت فهو يغير وضعه دائما و خذ الحذر و أمشي و الشبكة في يدك
مستعدا لتلقيها فورا علي الأرض .

الخطوة الثالة :

إفتح التابوت بحذر .

الخطوة الرابعة :

لا تفكر مرتين ثبت الوتد في موضع القلب ثم أطرق عليه حتي النهاية .

الخطوة الخامسة :

صب الكيروسين ثم إحرق ذلك الشيء .

ملحوظة : طالما أن ذلك الشيء لم يصحو أثناء تنفيذ المهمة .......
فيمكنك عزيزى  أن توفر خوازيق الفضة  لإستخدامات أفضل .


Image and video hosting by TinyPic


عزيزي ...........

لا تلومن نفسك كثيرا ..........

و كيف كان لك أن تعرف أن ذلك الشحاذ المصاب بأنيميا حادة تجعله شاحب كالموتي
لم يجد إلا قبو منزلك لينام فيه بعد التشرد في الشوراع طوال الليل ؟

و هل كان بيدك أنه لم يختر إلا ذلك الصباح الذي قررت فيه أن تنظف قبو البيت ؟

و هل كان لك يد في أنه لم يختار لمبيته إلا ذلك التابوت الخشبي الذي تركه
 جدك الحانوتي فيما ترك في قبو بيته هذا قبل أن يموت ؟

يمكنك عزيزي أن تخبر الشرطي الذي يستجوبك حاليا بهذا ........... لا تصمت هكذا

أخبرهم .......

.أخبرهم فإن الشرطة تفهم جيدا في هذه الأمور .