إللى أوله هراء أخره هبل

بص يابنى و بصى يابنتى ......

المدونة دى أنا عاملها علشان دماغى ، علشان متجننش ، علشان زى ما هو باين

من إسمها أصرف فيها الشحنات الكهربية و الأفكار و الكلام إللى لو إتحبس 

دماغى هتضرب و أتجنن 

و إنت أكيد ميخلصكش إنى أتجنن ......مش كدا ...

يعنى إنت هنا ــ و أنا معاك برضه متزعلش كدا ــ فى شبكة صرف عقلية 

فأهلا بك فى عالم الصرف و  المجارى و الهراء .......الذى لا داعى له .

السبت، 10 سبتمبر 2011

فاضل خازوق الإنتخابات بقى

فاكر أنا من شهور طويلة من بعد تنحى حسنى و أنا قاعد بشتم فى المجلس العسكرى و بقول عليه كلاب و ديول مبارك و قاعد بلطم و أقول للناس فوقوا


و ساعتها كل الناس إللى كانت تعرفنى قالولى إنت مش فاهم حاجة و كنت بشوف حماقات المصريين على النت تجاه الناس القليلة الفاهمة إللى عارفين طبيعة الموضوع من أوله و الناس إللى بدأت تفهم الليلة بعدها بشوية


دلوقتى أنا فرحان فيكوا يا مصريين ..........D:

فلتلبسوا


لإن أنا إتخانقت كمية خناقات غير طبيعية على موضوع المجلس دا و ضغطى على و خلقى ضاق



أخر خازوق منتظر و معتبر هيبقى فى الإنتخابات علشان السلفيين و الإخوان يفهموا إن المواقف الغير أخلاقية مبتفتحش بيت


و بكدا يبقى السيناريو الأمريكى إتنفذ بكفاءة

شتت قوى الثورة

إعزل القوى الثورية عن الشارع و أخلق وعى عام لدى الغير منتمين سياسيا بإنتهاءها

أضرب الإسلاميين بغيرهم و إعزلهم عن ركب الثورة بالإر\غرءات و الوعود

واجه باقى القوى بإستخدام قانون الطواريء و بتأييد الشارع ليك ضدهم


و لما تخلص منهم


حط الإسلاميين فى فرن و أعملهم هولوكوست كبيرة






فى مرحلة قادمة فى هذه الثورة ستسيل فيها أنهار الدماء و سيدفع هذا الشعب ثمن الحرية هذه المرة غاليا


لكنه سينالها أخيرا

و لكن بثمن أغلى مما كان يمكن أن يدفعه و فى وقت أقل لو كان عنده عقل أو أخلاق أو بيفكر بالمنطق

الأحد، 21 أغسطس 2011

دى ثورة ...






أهى دى الثورة بجد على فكرة

المشهد فى ليبيا الليلة دى يفرح

و هو دا المشهد المثالى و الستاندرد للثورات على فكرة

إنتفاضة شعبية قمع سلطوى .....كفاح مسح ...تقدم خطوة بخطوة

كر و فر

لحظات ألم و حزن و شك

ثم حماسة ثم إستعار للقتال ثم هدوء

ثم تقدم ثم تقهقر


قتلى و ضحايا و دماء و أشلاء

رصاص و مدافع

بطولة و خيانة

ملاحم و عبر للتاريخ

و قصص يحكيها الأجداد لأطفال غدا يجلسون و نضرة المستقبل المشرق الذى يصنعه الحاضر على وجوهم

تمن حقيقى بيندفع

تمن السكوت و الخنوع لعقود يسدد لكى لا يكون على الأمة دين

الدم طهارة

و الموت شهادة

و الشجاعة و البسالة تجربة حياة كاملة

و الإنتصار فرح ما بعده فرح


و حمل السلاح و القتال مدينة ورا مدينة و شارع ورا شارع و زنجة ورا زنجة

تطهير لروحك من كل دنس و تحميل لملف الرجولة على ديسك توب عقلك


بصراحة دى الثورة إللى بجد فى ليبيا


الثورات السلمية دى الحقيقة مكيفتنيش


و لحد دلوقتى أثبتت إنها بتجيب نتايج مشوهة و نص نص

قيادة بنى غازى

و بسالة مصراتة و شجاعة الزاوية و كر و فر البريقة و راس لانوف و صمود الجبل الغربى

إنضمام عسكريين و تجنيد المدنيين و صلوات جمع و علم غير العلم و خطب هابلة

و توكتوك و زنجة زنجة

و عالم جديد غير العالم

مبروك ليبيا


مبروك لليبين كان نفسى أعيش فى الأجواء إللى عشتوها


واحدة من أغرب الثورات فى التاريخ و أجملها

الثلاثاء، 2 أغسطس 2011

محاكمة إبن الوسخة






يادى السفسطة

كعادة الشعب الأهبل طلعلنا ناس بتسأل هو إحنا عايزينه يتحاكم رغبة فى الإنتقام و التشفى ولا علشان العبرة و الحقوق ؟؟؟؟


يا عم الحاج ...أى واحد بيغلط لازم يتحاكم و يتحاسب


بغض النظر بقى عن رغباتنا الفردية


أنا شخصيا بقى رغبتى الأولى التشفى ثم التشفى ثم التشفى


و على فكرة يوم ما يموت هشمت فيه و على فكرة مش هترحم عليه

و على فكره عفضل ألعنه لحد ما أموت بكل اللغات و فى كل الكتب

و على فكرة بدعى ربنا إنه عمره ما يتوب

و على فكرة نفسى بتعذب دنيا و أخرة



هتسمى دا تشفى و رغبة مرضية سميه براحتك


أنا عاوزه يتعذب عايزه يعانى عايزة يتألم عايزه يتذل و يتهان عايز أشوفه بيتجلد و بيتكهرب و بتتخلع ضوافره و بتستعمل معاه عصاية من غير فازلين

بعد كدا يركبوه حمارة عرجة بالمخلوف و يتربط فيها و يمشوه فى حوارى القاهرة و بيوتها الفقيرة و أحيائها العشوائية و العيال إللى هدومها مقطعة تمشى وراه و تحدفه بالطوب و تقول العبيط أهه

بعد كدا يتشنق و بعد كدا يمثل بجثته ....بعد كدا يتحرق بعد كدا يتقطع حتت

و تتعلق كل حتة منه على باب من أبواب قاهرة المعز القديمة




عايز أفرح فيه ......عايز أحس بكل خلية من خلاياه بتعانى بشكل منفصل عن أختها


كراهية و مقت و غضب العالم متكفنيش فيه












الجمعة، 8 يوليو 2011

إلى الأغلبية الصامتة ...خليكوا على كنبتكوا









بصراحة و أنا بسيب الميدان مضطرا و منكودا صباح يوم السبت 12 فبراير عقب تنحى الخنزير و بعد ما شوفت دور الحمقى إللى مش فاهمين حاجة فى ضرب المتظاهرين الرجالة إللى بيفهموا و إللى قرروا إنهم يكملوا إعتصام و بعد ما شوفت ذكاء الثعالب من المجلس العسكر فى تنفيذ خطة الإنقاذ الأمريكية اليهودية

مكونتش متوقع للثورة دى إنها تكمل 5 شهور كمان

لكن واضح إن الزخم لسا موجود و لسا الثورة هتكمل طريقها بإذن الله

و دا راجع لعاملين :

للناس المحترمة الحرة إللى بتفهم و عندها عقل و مثابرة

و كمان لغباء المجلس العسكرى و قرارات النظام المستفزة إللى بتقول للأعمى يا أعمى أنا لسا موجود مسقطش



الثورة هتكمل رغم حقد الحاقدين و رغم حماقة الحمقى

و دول بيمثلوا أغلبية

الحقيقة أصلا الثورة دى بتديلك فرصة لتشريح المجتمع المصرى

شخصيا شوفت الأتى :

* إن فى حوالى عشرات الألاف بيفهموا كويس و عندهم إختراع إسمه العقل و بيستخدموه
دول إللى نزلوا من أول يوم و كملوا بعد الخطاب التانى و حضروا الجمل و ثابروا و رابطوا و متخدعوش لحظة بالفيلم الهندى بتاع التنحى و مريضوش للحظة عن مجلس العسكر و مكانوش محتاجين كل هذه الإثباتات على مدى شهور علشان يفهموا الحقيقة

و هما دول زبد الزبد و طريق الإنقاذ لهذا المجتمع المنهار بعد عهد الإحتلال ما يخلص


* فى مئات الألاف من إللى نزلوا أو تعاطفوا مع إللى نزلوا و متخدعوش بالخطاب التانى و محتاجوش وقت طويل علشان يفهموا الحقيقة بعد التنحى


• أخيرا فى حوالى 7 أو 8 مليون إضافيين فى هذا الشعب أقدر أقول إن دول إللى شاركوا فى الثورة بمختلف مراحلها و دول مش محسوب منهم اللطفاء إللى كانوا نازلين لأول مرة فى جمعة النصر للمشاركة فى العيد و الهيصة
• و دول فى منهم أمل و يجى منهم ببعض الشغل و المثابرة و الإصلاح فيهم

و أقصد بكلمة شارك دى مش لازم يكون نزل يكفى إنه كان مؤيد ...... (( أى حد غزا أو حدثته نفسه بالغزو )) دا كدا يعتبر شارك فى الثورة


و هؤلاء هم أعزائى النسبة إللى صنعت الثورة ....من مختلف الأعمار و الشرائح المجتمعية و الإنتماءات الفكرية فى كل تصنيف من التلاتة
هما دول القلة المندسة إللى نجت من عملية التخريب المنهجى لعقول و أرواح المصريين عبر عقود

هما دول معسكر الخير بدرجاته ....... و دول كانوا بيحاربوا معسكر الشر إللى بيمثله باقى ال85 مليون شاملا النظام القديم و مناصريه و مستفيديه و هؤلاء الأقل شرا فى هذا المعسكر من وجهة نظرى لإن شرهم و إن كان غيرمبرر بس على الأقل ممنطق و براجماتى و يمكنك أن تكتشف مصلحة لكل منهم فى محاربة الثورة سواء إذا كانوا حزب وطنى ولا مجلس عسكرى ولا إعلام ولا أى حد بيستفيد من النظام

أما الأسوأ شرا .....

فهم الأنعام الحمقاء .......... حزب الكنبة

إزاى تعرف إنك واحد من حزب الكنبة ؟؟؟


دا الحزب إللى فى أول أيام الثورة ....قال كفاية بقى البورصة بتقع
و إللى بعد جمعة الغضب ....قال كفاية بقى هما فهموا الدرس ...إرجعوا بقى علشان خربتوا البلد
و دا إللى بعد الخطاب التانى ....قال أبونا و رمزنا و حطله فيديوهات عاليوتيوب و هو بيفتح المترو و ترعة السلام و حط ستيتس على الفيس بوك (( إللى فى التحرير دول حافظين مش فاههمين )) و (( إرحموا عزيز قوم ذل ))

دا إللى لما كان الثوار بيكبروا فى الميدان و بيحاربوا البلطجية كان هو زعلان إنه مش عارف ينزل القهوة يشيش .....

دا إللى بعد التنحى ....نزل يحتفل معانا بكل برود و سخافة و يقول إنتصرنا و إرفع راسك فوق و مسك العلم و إتصور بيه وسط الجموع لشان يحط الصورة على البروفايل ...و أخر الليل قعدوا يقولوا (( الشعب يريد إخلاء الميدان )) و تعاونوا مع الجيش فى إخراج المعتصمين

ـــ دا إللى فين حين إن الثوار بيغنوا أغانى الشيخ إمام .....دا كان بيسمع أغانى الثورة لحماقى و محمد فؤاد ( و فى الغالب أصلا أغلبهم مكانوش يعرفوا الشيخ إمام قبل الثورة )


دا إللى لما كنا بنتظاهر لإقالة شفيق .....قعد يقول إنتوا مش عاجبكوا حد ..دا الراجل حلو و بيقول حضرتك !
دا إللى كان بيشتم فى الأسوانى ....علشان مش بيتكلم بأدب فى حضرة رئيس وزراء بلده !

دا إللى بيقعد على القهوة ماسك الشيشة و مجعوص .......و بيقول البرادعى دخل أمريكا العراق و الإخوان لو حكموا هسيب البلد و البلد محتاجة حد عسكرى علشان يبقى عنده حزم !

دا إللى لما الداخلية ضربت المعتصمين فى ليلة البالون ......قال أيوة إضربوهم دول بلطجية و الداخلية حلوة و جميلة ...و صدق بيان الداخلية و مصدقش كلام المتظاهرين و الناشطين

دا إللى إنتقل من تقديس حسنى ...لتقديس المجلس العسكرى زى ما بيشوف فى الإعلام

دا الحزب إللى مش بيفكر خالص .....إن اليمن بقالهم خمس شهور منقوعين فى الشمس بالملايين و لا جاعوا ولا إتعروا ولا حد قالهم إستكرار و عجلة إنتاج ......و لا بيفكر إن ال200 ألف إللى هيعتصموا عندنا أكيد مش هما دول إللى بيشغلوا عجلة الإنتاج و يأكلوا 85 مليون لوحدهم

دا إللى بيشتم فى المتظاهرين ... و ميهمهوش الشهداء و لا يعرف يعنى حرية ولا يعنى كرامة و لا يعنى إيه بنى ادم أصلا

لإنه أقل من البنى أدم

هو دا بتاع عجلة الإنتاج و الإستكرار .....و حرام عليكم خربتوا البلد .....و كتر خير الجيش إنه مضربكومش بالرصاص زى البلاد التانية


و هو دا أعزائى البنى أدمين .........الحزب إللى مالوش أى قيمة فى الحياة ......دا الحزب إللى لما نحرر بلدنا و نبدأ نبنى فيها وطن .....هينقرض هذا الحزب بمرور جيل و يغور فى داهية و يريح البشرية من عبئه

الأغلبية الغير صامتة

ياريتها كانت صامتة .....لو كل واحد جاهل غبى فاسد الفطرة ,,,كان حط جزمة فى بقه و سكت قدام الأحداث إللى مش فاهمها كان على الأقل هيبقى تحلى بفضيلة الصمت

لكن لأ

لازم يتكلم ...لازم يدلى بدلوه فى الحياة مستغلا خبراته و معارفه الرائعة و تجربته الثرية فى الحياة

مش الأغلبية الصامتة

دى الأغلبية الهابلة

الأغلبية الوسخة



دا الحزب إللى الثورة هتكمل من غيره و هتنجح من غيره و كويس إنهم مش معانا لإن لو كانوا فيكم لزادوكم خبالا


عرفت عزيزى عضو الحزب الموقر نفسك من صفاتك ؟؟؟؟


عامة ....ممكن لا تيأس من رحمة الله ....ممكن تتعالج .......شوية كرامة على شوية ثقافة على شوية عقل و مع الوقت ممكن تبقى بنى أدم زى البنى أدمين




الثورة إن شاء الله هتنجح لإن دى دورة التاريخ .......و زى ما إتكتب للثورة الفرنسية إنها تبقى نقطة محورية فى تاريخ البشر كذلك هتكون الثورة دى ببعدها السياسى و الإستراتيجى و ثراء تجربتها الإنسانية




لإن دا ناموس و سنة ربانية فى الكون ...........الحق دايما و على مدى التاريخ أنصاره أقل من أنصار الشر و مشكلة الفهم و العقل دى مشكلة قديمة فى البشر (( ولكن أكثر الناس لايعقلون
ولكن أكثر الناس لا يفقهون
ولكن أكثر الناس لا يشكرون
ولكن أكثر الناس لا يؤمنون ))


لكن المطلوب فقط من القلة القليلة إللى بتناصر الحق هو الصبر و المثابرة ....و النصر هيجى من عند الله ....و دا شوفناه قبل كدا فى مواقف فى نفس الثورة دى



الثوار و أقصد بيهم إللى بينزلوا و إللى متعاطفين و إللى بيشجعوا فى بيوتهم و بقلبهم ....بإذن الله الخير هيجى على إيديهم ليهم و للحمقى المتحامقين أعضاء حزب الكنبة

الأغلبية الحمقاء ....خلصنا الله منها

الاثنين، 23 مايو 2011

ثورة الغضب ( الجزء الثانى )


هو رحل و هما قرطسونا
فرحنا برحيله لوحده و خدنا الصابونة
و كإن أرضك يا مصر أرض ملعونة
مواعدانا بالفراعين يطلعوا دين أبونا

مغميين و بنلف و نجرى زى الطور فى الطاحونة
لا البير جفت ولا الطور فهم
إن مفيش نهاية يوصلها و كل الطرق لروما غير مضمونة
غير لما الطور يبطل يبقى طور و حجم كرشه يصغر
و دماغه يطلعلها عقل و يفكر فى حياته المجنونة

...
يا طور السكة بتلف و الدايرة مستمرة
حبة حبة بتحوط و بتحبك حوالين رقبتك المصونة
طول مأنت طور مفيش أمل فى حياة كريمة مأمونة

الحرية يا طور للأسود للنسور للجياد البرية المزيونة






الثلاثاء، 15 مارس 2011

هقول ( نعم )







هو أنا شخصيا مش شايف إن التعديلات كافية

و كان الدستور الجديد هيبقى أفضل

بس إحنا دلوقتى قدام أمر واقع هو إن الجيش خدنا على رجليه

و إن مش إحنا بس الاعب الوحيد فى ملعب مصر

لإن معانا الجيش و بقايا النظام و أمريكا و اليهود

و إن الثورة معادتش بالقوة و الجموح بتاع الأول يعنى إحنا الطرف

إللى قوته بتقل مع الوقت

يبقى لازم نمسك حاجة فى إيدينا قبل ما بتزايد إنفضاض الجموع الرئيسية من الناس البسيطة أو إللى مالهومش فى المجاهدة طويلة الأمد و دول كانوا الجموع الأساسية إللى شالت الشباب الناشطين و ساندتهم



فيبقى أحسن نعملها بمزاجنا


كمان أنا معنديش ثقة فى قادة المجلس العسكرى دول

و عندى أسبابى



يبقى كويس إن الجيش يتفضل مشكورا يروح بيتهم و إحنا بقى نجيب رئيس مدنى على مزاجنا

طيب إحتمال إنه يتعوج علينا ....اه دا حقيقى قائم

بس أكيد الأسهل إنك تعدل عوج رئيس مدنى لسا عضمه طرى و ليه أعداء طبيعين

أسهل ما تعدل الجيش لو قرر إنه يتعوج عليك و دا معندوش هزار بقى


و طول وجوده فى البلد أكتر من 6 شهور زى ما الحالمين بيقولوا

مش حاجة حلوة



كمان إللى بيقولوا لأ

أصل الإخوان و الحزب الوطنى


أولا الإخوان دول من وجهة نظرى هما أحسن ناس فى البلد دى و هبقى سعيد لو حكموا بس الناس قصروا السكة و قالوا داخلين على 40% بس


ثانيا :

بتوع الحزب الوطنى كانوا بيترشحوا علشان ياخدوا فلوس من مقاعدهم
طيب فى وقت وحش زى دا مفيهوش فتة و لحمة

أنا كرجل أعمال فاسد هرشح نفسى ليه و أعرض نفسى للتشنيع و التدوير فى الدفاتر القديمة





دى ناس بتتحجج





لكن


الجميل

إن نعم أو لأ


الإتنين كلاهما فيه من الصح


و إنت و رأيك بقى فى دى


نعم قشطة

لأ قشطة برضه




بس لازم تنزل و تنزل أبوك و أمك و أخواتك الكبار


لازم نشهد اللحظة التاريخية دى

و كمان لازم نثبت لجهات بعينها إن الثورة إنتقلت من حالة الهتاف و ميدان التحرير لحالة الصناديق و الحبر الفسفورى

و إننا فى أى وقت ممكن تانى ننقلها للحالة إللى إحنا عايزينها

لو لاحظنا عوج من أى جهة



هو يا جدعان يعنى بغض النظر عن أى حاجة

و بغض النظر عن تفاصيل الثورة و نتايجها و خباياها إللى مش هنعرفها غير فى المستقبل

و بغض النظر عن إنى رايح يوم السبت أقول (( نعم ))

بس يعنى تخيل معايا المنظر من حوالى شهر و نص بس

كنت عمرك تفكر فى حاجة زى كدا

إنت ...!!!

إنت المصرى المعفن

إللى مالوش لازمة فى الحياة

إنت نازل يوم السبت تقول (( رأيك )) !!!!!!

لأ و مش بس كدا

دا كمان رأيك دا هيتحسب

و هيأثر فى مستقبلك و مستقبل عيالك بشكل أو بأخر

يا حلاوة يا ولااااااااد

دا الواد عليوة كبر و بقى ألافرانكا خالص

لا و مش بس كدا

دا إنتوا كمان عمالين تتناقشوا مع بعض

و أنا شايف إن الإنتخابات المش عارف إيه تبقى قبل إيه

و أنا من وجهة نظرى إن المادة الفلانية مش عارف مالها و كان المفروض بتوع التعديل يعملوا فيها مش عارف إيه

يا حلولى يا حلولى

زغرتى يا بت

لولولولولولولولولى

الجمعة، 25 فبراير 2011













فعلا الإستبداد كتاب العرب




بدأت أول صفحات الإستبدا مع معاوية بين سفيان و توريثه لإبنه يزيد مع علمه بما هو عليه من فجر و فسوق و ظلم



و إستمر بعده الخلاء الأمويين يتابعوا خط الظلم و القهر و الإستبداد ـ رغم إن عمر بن عبد العزيز قطع الخط دا ـ و علشان كدا سموه و تخلصوا من سيرة العدل فى بنى أمية


و لما جه السفاح و أسس الخلافة العباسية على أنهار من دماء و أشلاء بنى أمية و بدأ هو الأخر تاريخ أسود من الخلافة العباسية الظالمة المستبدة فى أغلب أوقاتها



و الدويلات المنشقة عنها كمان كانت مستبدة و الحاكم فيها ظالم فاجر لا يخشى الله فى رعيته و إراقه دمائهم أو سجنهم هو أسهل الأشياء عنده



و أخيرا وصولا لدولة المماليك فى مصر


المماليك العبيد القساة إللى زلوا رقاب الشعب و لسا لحد دلوقتى أثارهم السيئة مطبوعة فى نفوس الشعب المصرى


و فكر العبد و روح العبد إللى بنتحلى بيها حاليا جزء كبير من شجرة نمائها تم سقايته و رعايته فى عهد المماليك ثم أينعت و أزدهرت شجرة الظالم و القهر و الإستبداد فى عهد العثمانيين


و أخيرا


من مماليك برجية و بحرية


إلى مماليك القرن العشرين


عبد الناصر و سادات و مبارك



كلهم ظلمة


كلهم مستبدين


فعلا الإستبداد كتاب العرب



و الحكم الجبرى الظالم الفاسد هو ديوانهم



و الشعوب الذليلة الخانعة المستعبدة تعودت على تراث طويل من الظلم و العذاب لحد ما تدنت أرواحهم و حقرت أهدافهم و صغرت أفهامهم



ألا بؤسا لكل الظلمة


ألا بؤسا لكل المستبدين



عبر التاريخ




الأيام دى فرصة غير مسبوقة لإستعادة العدل فى أرض دين العدل


و لازم العقلاء يحاسبوا من السفلة و الأوغاد و من الحمقى و عديمى العقول


و من الغوغاء


إللى هيحاربوا أى تحول حقيقى و جذرى بكل قوتهم سواء عن سوء نية أو عن عدم فهم







لو نجحت الثورة فى تحيد وسائل الإعلام الفاسدة


هتنجح



أو لو نجحت فى خلق منابر إعلامية مختلفة لنشر فكر التنوير



هتنجح




النجاح الحقيقى فى المرحلة الجاية


هو كسب العامة أو الغوغاء



أو على الأقل تحييدهم





لإن دول أقوى سلاح فى إيد الظلمة و المستبدين