إللى أوله هراء أخره هبل

بص يابنى و بصى يابنتى ......

المدونة دى أنا عاملها علشان دماغى ، علشان متجننش ، علشان زى ما هو باين

من إسمها أصرف فيها الشحنات الكهربية و الأفكار و الكلام إللى لو إتحبس 

دماغى هتضرب و أتجنن 

و إنت أكيد ميخلصكش إنى أتجنن ......مش كدا ...

يعنى إنت هنا ــ و أنا معاك برضه متزعلش كدا ــ فى شبكة صرف عقلية 

فأهلا بك فى عالم الصرف و  المجارى و الهراء .......الذى لا داعى له .

الاثنين، 5 أبريل 2010

الأفراح فى بر مصر





منذ حوالى العامين إتخذت قرارا بمقاطعة الأفراح المصرية بشكلها المتعارف 
عليه حاليا و قد مر تنفيذ هذا القرار بمراحل علو و إنخفاض حتى نكاد حاليا 
أن نتم عاما كاملا بدون كسر أو خرق لهذا القرار الحميد الرشيد ،
و هو الصراحة واحد من قرارات  حياتى التى سأفتخر بها لنهايتها 

أعلم أن ذلك القرار لم يجعل أصحاب الأفراح يبكون و لم يجعلهم يسهرون الليالى
داعيين الله أن أحيد عما برأسى و لكن كل الفكرة أن الأفراح المصرية تتميز 
بقدر فظيع من السفالة و الحماقة و العته الذى لم تعد مرارتى المسكينى قادرة 
على التعامل معه أو تحمله .



ــ يالا كدا عايزين كل أصدقاء و صديقات العروسة و كل أصدقاء
و قرايب العريس ....يطلعوا معانا هنا على المسرح  ....كل إللى بيحب 
دينا و هيثم يطلع معانا هنا علشان نحتفل بيهم 

دى عادة بتبقى الجملة الإفتتاحية للأخ إللى ماسك الدى جى فى الأفراح 
بعد ما بيكون العريس و العروسة خلصوا النمرة بتاعتهم فى الإستعراض
المسمى بالفرح .و الجميل إن النمرة دى بتبدأ بأسماء الله الحسنى إمعانا 
فى تأكيد إننا شعب متدين و إن ربنا راضى عن الفرح
و عن العريس و العروسة . 

الموضوع كله أصلا من أوله يثير الغثيان 
و صورة الأفراح المعتادة الحالية فى بر مصر ما هى 
إلا واحدة من الصور إللى بتعبر عن إنسلاخ الهوية و مسخ الذات 
و لا عقلانية المجتمع المصرى 

مش قادر أتخيل كيف يتفق أن يصف هذا المجتمع لنفسه بالمجتمع المسلم
و معظم عاداته هى مما يتعارض بقوة و بشدة مع أبسط مفاهيم
و قواعد الإسلام 

تدخل الفرح من دول تلاقى 
فساتين سواريه و رجول و صدور و شعور باينة 
و أغانى هنرقيها شوية و نقول عليها بس إنها منحطة
و الكل بيرقص ....

على المسرح و فوق المسرح 

كله بيرقص فى كل الإتجاهات 

كل بينفس عن الكبت المدفون جواه فى صورة الرقص 


حاجة غريبة و متناقضة 
يعنى إيه نربى عيالنا من صغرهم على تقاليد و قيم معينة 
و إحنا بإيدينا بنكسرها قدامهم بمنتهى الغباء و التناقض 

يعنى إيه يبقى الرقص و الخلاعة مباحين فى قاعة الفرح و قدام الأهل
و قدام الكاميرا و قدام العالم 

زيييييييطة

حاول كدا و إنت فى قلب فرح من دول تمد إيدك على سماعات 
عقلك و تطفى الصوت 

شوف الصورة بس مع خلفية صامتة 

و كمان حاول تظبط عينيك على التصوير البطيء

شوفت المسخرة تخيلن المشهد 



ناس كتير من مختلف الأعمار

الكبار قاعدين تحت على الكراسى يتمنظروا على بعضهم و يكدبوا 
و يخادعوا 

و الشباب من الجنسين على المسرح بينفسوا الكبت إللى مجتمعهم
القاسى غرسه فيهم  بتربيته  القمعية و السلطات الفوقية إللى تم
ممارستها عليه منذ الصغر ، بيرقص ضد سلطة البيت ، و سلطة
المدرسة ، و سلطة الدكتور فى الجامعة و سلطة الظابط فى الشارع

بيرقص ضد الكبت الجنسى و تأخير سن الجواز عن الحد الطبيعى 
لبنى أدم عنده حواس و غرائز 

بيرقص علشان النهاردة أجازة من الدين 
و الملاك إللى على الشمال ميقدرش يسجل ذنوب فى يوم مفترج زى دا !!!

طب يا عم الحاج يالى قاعد إنت ...مش بنتك دى إللى
بترقص فوق المسرح ؟؟؟ ، و إنتى يا ست إنتى إبنك المراهق إللى بتحاولى 
تربيه أحسن تربية ــ زى ما بتقولى ـــ مستنية منه إيه لما يتربى
فى وسط الجو دا ، طيب إنت يا حبيبى يا عريس يا شاطر ياللى بتتجوز
مش إللى لابسة فستان فرح ضيق و دراعها مكشوف و الميكب ملون وشها 
مش دى يا بابا بقت مراتك ؟ ... ليه يا حبيبى تستعرضها قدام مخاليق ربنا كدا ؟
ليه تشاركهم فى حاجات المفروض تكون ليك إنت لوحدك ؟ !!!

إنتوا يا جماعة يا عاقلين ...ما ترحموا الشباب دول 
و تستروهم و تجوزوهم يمكن يقدروا يصرفوا طاقاتهم فى حاجات أحسن 
لما بالهم يستريح بالجواز إللى هو جزء من الفطرة لأى كائن حى فقارى كان 
أم لا فقارى طالما وصل سن البلوغ 

بصراحة سلوك المصريين فى أفراحهم فعلا جدير بالدراسة 
محتاج خبراء نفسيين و إجتماعيين علشان يفسرولنا فى كتب مطولة 
أسباب و إنعكاسات و مدلولات السلوكيات الغريبة التى يأتيها المصريون
فى أفراحهم 

حالة من الجنون الجماعى تنتاب الجمع الحاضر فى قاعة الفرح 
حالة من التسيب و الإنفلات الدينى و إللى لو واصلت بخيالك هتلاقى إن 
نفس الناس دول هيقوموا تانى يوم يروحوا يصلوا الجمعة فى الجامع
و قاعدين مدلدلين دماغتهم و متنحين و الخطيب قاعد بيهرس
فى أى كلام ( عن طاعة ولاة الأمور و فجور و خروج من يحلم
 بترشيح نفسه للرئاسة ) طبقا لتعليمات وزارة الأوقاف 

 طب إزاى يا جماعة !!!!

دا إيه النفاق دا !!!!!!!!

ليه يا حبايبى فى بلد الفقر واكل أهلها و المتسولين مالين شوارعها ، 
ليه أروح أصرف ألاف على إيجار قاعة لمدة كام ساعة و دى جى 
و تجهيزات و مصاريف فارغة هتتحط فى ميزان سيئاتك يوم القيامة
يضاف إليها زنب كل من يفتن بالمشاهد و الأفكار المبثوثة داخل الفرح
بتاعك 

ليه يا جماعة بنبالغ فى حاجة مش مستاهلة مبالغة !!!!

ليه منعملش أفراح تتفق مع دينا و مستوى بلدنا الإقتصادى و الإجتماعى
ليه ميبقاش الفرح فعلا للإشهار و الفرح 

مش حفلة وثنية شهوانية قبائلية للمنظرة و التفاخر و زرع الفتن فى مجتمع
تمتليء خزائنه و تفيض بالفتن و المشاكل 



بالنسبة لقرارى فهو ادنى على المستوى الشخصى بإنى بقيت مستريح 
نفسيا أكتر و أنا بعيد عن هذا الهبل 

كما إنى بساهم فى عدم تشجيع الغلط 

لإنك لما بتروح تحضر الفرح حتى لو مجاملة و حتى لو بتسلم و تمشى
فإنت كدا بتشجع صاحب الفرح و بتوصله رسالة إنه شاطر و حلو 
و الناس بقى تحاول تقلده علشان تبقى شاطرة زيه 

و أنا قد سئمت من هذا الهراء الفارغ .........








هناك 13 تعليقًا:

  1. بصراحه قرار احييك عليه

    انا كل اللى قدرت اعمله هو انى احضر للمقربين جدا بس و الباقى بكتفى بحضور كتب الكتاب

    بس فى ناس كتير بدأت تبعد عن الاسلوب ده على فكرة و عملوا افراحهم بطريقه راقيه و شيك
    موسيقى هادئة و الناس تتصور مع العروسه و العريس و ياكلوا طبعا ههههههه و يمشوا

    ردحذف
  2. اول ما يعرف كل راجل يجيب شقة في زمن لو جبت شقة يقولوا تهييس
    الله يكون في عون العريس
    ساعتها صدقني كل كائن فقاري ها يرجع لتوازنه الطبيعي
    والهطل اللي عامل زي الزار ده ها يقف

    الزار اللي في الأفراح وادعاء الفرحة المبالغ فيها بتكون نتيجة للآتي

    عريس ثلاثيني مش مصدق انه دخل دنيا وها يلحق فيها اخر رمق قبل ما يغادر
    عروسة بتحمد في سرها انها لحقت قبل الحصول على اللقب اياه
    ابو العريس مش مصدق انه زاح ابو طويلة اللي كان بيخبط فيه في الشقة
    ابو العروسة مهييس مش مصدق انه لحق يجوز البت قبل ما يبيع البنطلون والقميص
    بنت خالة ام اللي جابوا العروسة بتقول اديني اعمل حركتين والليلة عيد والعريس بيتجوز يمكن انا كمان اتنيل الاقي حوت صغنن فقاري يجازف ويتجوز
    ابن عم ابو اللي جابوا العريس بيدور على اي سمكة ملونة يخدعنا بطروخها :)

    بس يا سيدي
    زي ما انت قلت
    كبت من كل شيء بيتم تفريغه بحفلة زار تحت مسمى فرح

    ردحذف
  3. Sarah Sobhi

    طيب الشكل دا للإحتفال كويس جدا و محترم

    بس النسبة إللى بتعمل كدا قد إيه ؟؟؟

    كالعادة كل حاجة كويسة نسبتها قليلة عندنا

    فى كمان الأفراح الإسلامية

    الحقيقة كنت فى الأول فاكرها خنقة و رخمة

    لكن لما حضرت بعضها لقيتها حلوة قوى و ظريفة


    فى كمان ناس بقت بتتجه دلوقتى لمجرد الإعلان و من غير فرح ولا حاجة العريس و العروسة بيسافروا تركيا أو سوريا يقضوا فيها وقت لطيف و زكرياته مميزة


    أنا بس مش هيجننى قد التناقض

    إزاى !!!!!

    إزاى بنقول على نفسنا ناس مسلمين و تبقى أفراحنا كدا !!!!!


    إزاى نربى ولادنا على عيب يا ولد و إختشى يا بت و فى الفرح نسيبهم قدامنا يكتشفوا مهاراتهم فى الفنون الإستعراضية !!!

    مجتمع متناقض و مجنون

    ردحذف
  4. ستيتة حسب الله الحمش

    هو دا فعلا عندك حق

    بس يعنى بقليل من العقلانية و أقل قواعد المنطق

    كان ممكن يوفروا على نفسهم كل هذا الهبل و كل تعقيدات الحياة السخيفة

    فعلا الإخوة المصريين دول هما إللى معذبين نفسهم


    أنا مش عارف طايقين نفسهم إزاى ؟؟؟؟

    ردحذف
  5. السلام عليكم

    معاك حق فى كلامك

    ربنا يصلح الحال

    مع خالص تحياتى

    ردحذف
  6. ربنا يصلح الحال لما ناخد موقف

    و نقاطع

    اه نقاطع الأفراح المصرية

    زى ما قاطعنا المنتجات الإنجليزية كدا



    ما هو لو أصحاب الأفراح ــ و هما إحنا بالمناسبة ــ بعد ما يكلفوا و يتعبوا و يجهزوا ملقوش حد جالهم فى الفرح هيحسوا على دمهم و يعملوا أفراح محترمة تليق بدينهم و هويتهم و عيشة أهاليهم

    ردحذف
  7. من حق كل مواطن انه يعمل زار.. اقصد فرح... وانت من حقك انك متحضرش...
    انا كمان مبحبش الافراح... بحضر الافرااح لما بتكون افراح حد قريييييب اووووي ليا بس وغالبا بتكون افراح اصحابي بس....
    انا عن نفسي كتر خيري اوي لما هتجوز اني هعزم الناس علي كتب الكتاب.. وفلوس الفرح اقضي بيها شهر عسل محترم... وال مش عاجبها... في الف غيرها..

    ردحذف
  8. من المشاوير
    الكريهة الى قلبى
    وكلاويا وعظامى
    وكمان اعصابى
    الافرررراح
    ياساتر!

    ردحذف
  9. هو حضرتك معندكش
    خبر انى غيرت الرابط
    بتاع المدونة ياريت
    تغيرها عندك كمان وشكراً
    صعبان علىّ حالنا2

    ردحذف
  10. بجد بأحييك علي قرار انت اخدته ونفذته من غير رجعه
    بجد انت كلامك صح وياريت كل حد يشوف الكلام ده يفكر فثيه ولو شويه صغيرين علشان بجد مراجعه اسلوب حياتنا المفروض انه يكون موجود عند كل حد
    ربنا يهدي الجميع يارب

    ردحذف
  11. سمع هوص (Abo 3li


    حلو الرأى دا

    بس أوعى تغيره تحت وطأة التعذيب

    ردحذف
  12. norahaty


    تم يا أفندم

    ************

    sony2000

    شكرا ليكى

    ردحذف
  13. منذ صغرنا وكانت اوامر ابي (والدي ) تطابق قرارك كان يمر علينا بعض الوقت نزمر ونستاء من هذا القرار حيث اننا نتمني حضور فرح واحد ولكن عندما كبرنا واضطررنا للذهاب افراح فقط للمجامله احد المرات علمت لماذا كان يمنعنا ابي من هذه المناسبات وحمدنا هذا القرار وهذه الأوامر فهذه الافراح لم تكن إلا استخفافاً بعقول الناس
    مثلها مثل العديد من العادات السيئه التي يتمتع بها الشعب المصري الذي دائما يغالي ويبالغ في كل اموره فرح كان او حزن حتي يصل به الي السلوكيات المخالفه للشرع
    آسفه علي إطالتي ولكني احييك علي هذا القرار وأشجعك علي الإستمرار فيه

    ردحذف