إللى أوله هراء أخره هبل

بص يابنى و بصى يابنتى ......

المدونة دى أنا عاملها علشان دماغى ، علشان متجننش ، علشان زى ما هو باين

من إسمها أصرف فيها الشحنات الكهربية و الأفكار و الكلام إللى لو إتحبس 

دماغى هتضرب و أتجنن 

و إنت أكيد ميخلصكش إنى أتجنن ......مش كدا ...

يعنى إنت هنا ــ و أنا معاك برضه متزعلش كدا ــ فى شبكة صرف عقلية 

فأهلا بك فى عالم الصرف و  المجارى و الهراء .......الذى لا داعى له .

الأربعاء، 14 أبريل 2010

الذكرى الشهرية لحادثة العربية







النهاردة 14إبريل2010

و دا معناه إن فات شهر على حادثة العربية
و إن النهاردة الذكرى الشهرية الأولى

شهر كامل فات على هذا الحدث
شهر كان مليان أحداث و أفكار

فعلا ....

الحياة من غير عربية صعبة و مملة و الشغل كميديكال ريب
بدون سيارة هو عذاب شديد

صحيح أنا معترض و مازلت على فكرة إن الواحد يستخدم
المدونة كأجندة مذكرات و إن أكيد مش من أولويات الحياة إنى
أفتح مدونة فوزى ألاقيه بيشتكى إنه عنده إسهال
أو أفتح مدونة فتحى الاقيه بيتكلم على الإكتئاب فى حياته
هستفيد إيه من كدا و هفيد الناس بإيه

لكن الصراحة أنا فعلا مكتئب بشدة و فعلا عندى إسهال

ما زلت منتظر عربيتى المحبوبة ترجعلى من التصليح
و أنا من مكانى هنا بوجهلها رسالة :
إرجعى يا عربيتى يا حبيبتى ....
إرجعى و أوعدك مش هحك بيكى على
المطبات تانى ، و مش هفحط بعجلتك الخلفية على الرمل
و أنا مدى جير أول لمجرد إنى أستمتع بصوت الزحلقة ،
و أوعدك إنى مش همارس عادتى السخيفة فى الضغط
على البنزين مع الدبرياش علشان أعلى صوت الموتور
كل ما أشوف مزة حلوة لابسة هشك بشك ترفعلى ضغطى
و أنا رايح المستشفى الصبح .... إنتى ملكيش ذنب
فى حاجة زى كدا ...هبقى أحاول بعد كدا أسوق
و أنا باصص فى الأرض علشان أغض بصرى،
أوعدك مش هوقعك فى ترعة سنهور تانى ، أوعدك مش
هسيبك شهرين كاملين من غير ما تروحى المغسلة علشان
مكسل ، أوعدك هظبط بملع تابلوه و إير فريشنر من الغالى
أبو خمستاشر جنيه ، و أنا عارف إنك كان نفسك من زمان
فى دبدوب صغير كدا على التابلوه و كمان الكلب السخيف
إللى بيهز دماغه عمال على بطال دا إللى قولتليه عليه لما كنا
فى كارفور فى إسكندرية .....حاضر يا ستى ....كل دا
هجيبهولك إن شاء الله ......
بس أرجوكى

إرجعى بقى ........

الحياة من غيرك صعبة يا عربيتى الحبيبة و بعدين يعنى ....
دا إنتى دلوقتى الحاجة المؤنثة الوحيدة فى حياتى
فى المرحلة الناشفة دى

هيبقى لا جواز و لا عربية ؟!!!
يعنى يرضيكى كدا ؟

************

بقالى فترة فى حالة إكتئاب هرائى متصاعد
أنا بقالى حوالى 7سنين فى إكتئاب مزمن
بس دا يمكن التعايش معاه
أما إكتئابى الهرائى فاخر الجودة فأخر مرة حصل كانت
من سنتين و ساعتها فضلت يومين صايم عن الكلام
بخرج من البيت و بقابل إصحابى و زمايلى عادى خالص
بس لابس إسود و بكلم الناس عن طريق الورقة و القلم
و فضلت شايل فى جيبى ورق صغير كدا
ورقة مكتوب فيها ( السلام عليكم ) ، و ورقة مكتوب فيها
( أنا ماشى ) و هكذا .........مع ورق أبيض للمشاركة
فى مختلف الأحاديث المطروحة !!!!!
طبعا دا ساعتها كان مستغرب حتى مع واحد إللى يعرفوه
عارفين إن دماغه غريبة الأطوار لكن دا زهق ناس كتير
و خنق ناس كتير فى اليومين دول إلا إن فى بعض الظرفاء
بدورهم بدأوا هما كمان يكلمونى بالورقة و القلم !!!


الفترة دى أنا فى إكتئاب متصاعد ....يمكن الشغل هو إللى بينسى
الواحد و بيشغله ....دا غير إن الشغل من غير عربية
كما ذكرت أنفا بيخلى الواحد يرجع تعبان و التفكير ساعها بيبقى
نوع من الترف الزائد


********

خلاص ...... صدرالقول الفصل .....

أبويا فعلا طلع عنده سرطان فى الكبد
بشكل أو بأخر متفاجئتش

ما هو أصل أمراض الكبد و أمراض الكلى هى شيء
متوقع للغاية فى مسار حياة أى مواطن كفراوى
معدلات الإصابة بيهم فى كفرالشيخ هى الأعلى فى مصر
و هى من ضمن الأعلى على مستوى العالم

سخيف قوى السرطان دا ....
لا منه بيخلص بسرعة على العيان و يريحه ولا منه بيشفى

**************

من مذكرات حمادة ............( كيف إكتئبت ) :


حمادة و هو صغير :



كنت دايما طفل مثالى و مراهق عبيط و شاب زى الكتاب ما بيقول

اه بجد

إرسم صورة كدا فى خيالك لطفل عسول متدلع و حيلة أمه
و العيلة كلها مهتمة بيه لإنه الأصغر فى محيطه
أهو انا كنت كدا ...طفل مرفه لحد لا بأس به

نيجى لما بعد الطفولة و بدايات للمراهقة :

لا حول ولا قوة إلا بالله

أنا ماسك الكتاب من ساعة ما إتعلمت أقرا

كان العيال ينزلوا ذلك المكان الخطير المسمى بالشارع
و يأتوا فيه بالأعاجيب مثل لعب البلى و الكورة و تلقى العلوم
الرفيعة من مختلف أنواع السباب و السفالة

و وسط صرخات أمى ( يابنى إنزل الشارع إلعب مع إللى قدك )
خائفة من أن أكون منعزلا و غير إجتماعى
بينما كان ردى عليها إن دول عيال متخلفين و جهلة و إن ثقافتى
متسمحليش أختلط بهؤلاء الأوغاد متسخى الأنوف
و أسيبها و أرجع تانى للقصة أو الكتاب إللى فى إيدى

عيل لسة موصلش خمسة إبتدائى و قاعد بيقرا فى التاريخ
و علم النفس!!! و قصص كبار الكتاب و محاط بتلال
من الكتب و المجلات و القصص القديمة و الجديدة بتشكل مكتبة
ضخمة جدا لدرجة إن أبويا كان مخصص للكتب أوضة كاملة لوحدها
فيها كل كتبه و كتب العيلة من عشرينات القرن الماضى لحد دلوقتى !!!

و هكذا تركت أواخر الطفولة و دخلت المراهقة و أنا على هذا الضلال

أضعت طفولتى و مراهقتى بين الكتب و المجلات و القصص

و هكذا إتسعت مداركى و تضخم خيالى و لكن ....

زاد الخبال و الجنون بالتبعية مع التصادم مع حقيقة المجتمع
و هكذا أصبت بداء أعتقد إننا كلنا مشتركين فيه لكن بنسب
متفاوتة و السبب فى كدا مجتمعنا

الداء دا هو ( إنفصام الشخصية ) ........

إضطررت لصنع شخصيتين

حمادة الحلو السكر الأمور الشطور

و حمادة الأخر الشاب المتعايش مع المجتمع


و عندما إكتشفت وجود الإتنين حمادة

عندها بدأت رحلتى مع الإكئتاب و بدأت رحلة طويلة من الصراع
بين كليهما

و هذه قصة أخرى طويلة .....نحكيها فى وقت تانى لو إتكلمت
عن نفسى تانى و وضعتها فوق طاولة التشريح




هناك 7 تعليقات:

  1. السلام عليكم

    لا حول ولا قوة الا بالله

    ربنا يخرجك من الاكتئاب ويشفي والدك ويعينك علي عربيتك

    ردحذف
  2. في ذكرى العربية لن أقول لها إلا عودي يا هاميس
    آخناتون يناديكي

    بس حقيقة حزنت على الوالد وكأني اعرفه
    ربنا يشفيه ويعافيه ويخفف عنه ويجعل كل لحظة جاية تتساقط بها الذنوب وتعلو بها الدرجات
    انا عارفة وربنا يعينه ويعينكم

    اما عن طفولتك وشبابك فده مش ذنبك
    ده ذنب اهلك اللي خلوك فسدت وقرأت وهرطقت
    نعمل فيك ايه دلوقت

    واما عن مذكراتك الشخصية فلم تكن سيئة ولا قرائتها مملة بل عرفتنا على شخصية حمادة السكر الشطور الأمور :)

    ردحذف
  3. عندك اسهال م اللى بتعمله

    حد ياكل مربى و سمك بورى وسردين مع بعض

    ايه ده ..

    ردحذف
  4. ربنا يشفى والدك يارب ويخرجك من حالة الاكتئاب دى :(

    ردحذف
  5. يارب يشفي باباك يارب
    اللهم امين

    ردحذف
  6. السلام عليكم
    سلامتك من الإكتئاب
    وألف سلامة على الوالد
    خالص تقديرى

    ردحذف
  7. ربنا يشفى الوالد وىجعل المه ومعاتاته
    كفارة له من كل الذنوب اللهم هون عليه
    واليك اخى ...لا تكتئب ولا تيأس
    فرغم مرارة الواقع يبقى دائما الامل
    وتذكر دائما
    " انه لا ييأس من روح الله الا القوم الكافرون
    وتذكر ايضا
    ما اضيق العيش لولا فسحة الامل
    انت انسان رائع وصادق وتستحق الاحترام
    تحياتى

    ردحذف