إللى أوله هراء أخره هبل

بص يابنى و بصى يابنتى ......

المدونة دى أنا عاملها علشان دماغى ، علشان متجننش ، علشان زى ما هو باين

من إسمها أصرف فيها الشحنات الكهربية و الأفكار و الكلام إللى لو إتحبس 

دماغى هتضرب و أتجنن 

و إنت أكيد ميخلصكش إنى أتجنن ......مش كدا ...

يعنى إنت هنا ــ و أنا معاك برضه متزعلش كدا ــ فى شبكة صرف عقلية 

فأهلا بك فى عالم الصرف و  المجارى و الهراء .......الذى لا داعى له .

الأربعاء، 21 أبريل 2010

أنا عايز أسيبك يا مصر








أنا خلااااااص ....خلاص

زهقت و قرفت و جالى ملل من كتر الإكتئاب
أكيد فى حاجة تانية فى البلد ممكن الواحد يعملها بدل الإكتئاب
مش معقول كدا أكيد البنى أدمين فى أى حتة تانية بيكتئبوا شوية
و يفرحوا شوية و يزعلوا شوية و يتبسطوا شوية ...أكيد
أنما كدا مش نافع .....عندى 23سنة و منهم 7إكتئاب !!!!

أنا عايز أغير الوطن دا ....................
يا مصر ....
يسعدنى أقولك إن خطتط نجحت يا مصر
إنتى نجحتى تزهقينى منك ...... رغم إنى كنت فاكر إن دا لا ممكن يحصل أبدا
بس فعلا أهنيكى ..... إنتى بلد شاطرة و زكية
و انا فعلا معدتش عايزأعيش فيكى
أنا بس بطلب منك وحياة العشرة و السنين إللى ما بينا تسيبينى أطلع منك
بالجزء إللى فاضل من عقلى و من سلامى النفسى
سيبينى بس أمشى و أنا أوعدك مش هضايقك تانى بإقامتى التقيلة على قلبك

و كمان هوفر عليكى تمن الرصاص إللى إنتى عايزة تضربينى بيه
و هسيبك بقى مع ولادك إللى إنتى بتحبيهم و هما بيحبوكى تامر و شيرين و حماقى
ليهم حق يحبوكى و يقولوا مشربتش من نيلها ؟ كما قالت الفاضلة الطاهرة
و إن كنا بنحبهاااا كنا نتهرب من جيشها كما شدى بها أبو شعر صدر يجنن
معلش أعذرينى لإن أنا كلب مركب فلتر عندى فى البيت علشان ميجيليش سرطان كبد
معلش أعذرينى لإن أنا شعر صدرى مفيهوش إللى يكفى علشان أطلعه من القميص
أنا أسف والله مكانش قصدى
بس أبوس إيدك سيبينى أطلع منك
و لو تعملى فيا معروف ..... تشوفيلى تأشيرة لأستراليا
علشان تبقى المسافة بعيدة هناك و مش كل يومين بقى أنطلك أجازات
زى العيال السيس إللى بيهاجروا الخليج
و إن كان على فلوس التعليم إللى صرفتيها عليا
هبعتهالك حوالات من هناك متخافيش....بس إبقى قوليلى قبلها لو تحبى
أبعتهالك على بنك مصر و لا على بنوك سويسرا معنديش مانع
بس سيبينى أمشى
صدقينى أنا شاب فاسد و ضايع و تربيتك منفعتش فيا
ضيعت حياتى كلها فى القراية و التاريخ و الفلسلفة و الأدب
و الهبل إللى ميأكلش عيش دا ، و قال إيه كنت بذاكر و بعمل الواجب
و الأبلة تدينى نجمة و ضيعت سنين شبابى الغالى علشان أخد بكالوريوس
طب بيطرى!!! ..................ياللعار
تخيلى ....دخلت كلية إقتصادية بتزود الإنتاج !!!!
أنا مش عارف أودى وشى منك فين يا مصر
إنتى قعدتى تفهمينى مرة بالتلميح و مرة بالتصريح إن المستقبل للإستهلاكيين
و المغنيين و الرقاصيين و المرتشين و الفاسدين و الطبالين و الزمارين
لكن أنا ....

أنا أستاهل ضرب الجزم إنى مسمعتش كلامك يا مصر
كان زمانى دلوقتى من أبناءك البررة تامر و حماقى إللى إنتى بتفخرى بيهم
و الفلوس و البنات بتترمى عليا زى الرز
بس تقولى إيه .....
أنا دلوقتى بجنى جزاء ما إقترفته يداى ......
لا و إمعانا فى الغباء
بعد ما خلصت طب بيطرى بشهرين روحت قدمت أوراقى فى كلية حقوق !!!!!!
شوفى البجاحة بتاعتى !!!
قال عايز أعرف القانون و الدستور علشان أعرف حقى و حق الناس !!!!!!
مش بقولك أنا مثال للشاب الفاسد إللى ميستاهلش يعيش تحت سماكى و يتنفس
هواكى و يتمرمرط بوز أهله فى ثراكى
اه والله يا مصر........... أنا مستاهلش يتمرمرط بوز أهلى فى ثراكى
*******************
فاكرة ....
فاكرة يا مصر لما كنت أخرج مع العيال صحابى و يشتروا حاجات و يجوا يرموا
الورق فى الشارع أنا أزعقلهم و أقولهم يبقوا نضاف
و نتيجة لكدا كنت بروح لأمى جيوب البنطلون مليانة من كل أصناف الزبالة إللى كنت
بفضل تترمى فى جيبى بدل ما تترمى فى شوارعك ــ الوسخة ــ
فاكرة لما كنت أشغل الأغانى الوطنية فى قلب المدرج و أسمعها للعيال غصب عنهم
فاكرة لما كنت بثور على أى واحد بيشتم فيكى و أديله محاضرة فى التاريخ و الجغرافيا
فاكرة أنا حاولت قد إيه أصلح فى نفسى و فى إللى حواليا
أنا أسف على كل دا يا مصر
سامحينى يا غالية مكونتش أعرف إنك أصلا عايزة كدا
أنا محدش إدانى الكتالوج و الله ....
أو هما إدونى كتالوج غلط ....منهم لله
قالولى مصر دى أمك ....حبها و خاف عليها
و قالولى مصر هى كمان بتحبك و بتراعيك
قالولى مصر معاك
قالولى إن إسرائيل دى عدوتنا الوحشة الكخة إللى بتعض العيال الصغيرين
شوفى الناس المفتريين إللى ربنا مش هيكسبهم لا فى سما ولا أرض
بيفتروا على الناس بالباطل...منهم لله
قالولى إن العمل و الصدق و الإحترام و الإيجابية و الإلتزام بالمباديء و الأخلاق
دى حاجات حلوة و هتخلى حياتك سعيدة
للأسف أنا صدقتهم و كدبتك
معلش سامحينى يا أمة .....قصدى
يا مصر
أنا مكسوف منك جدا و مش عارف أودى وشى منك فين
دا كفاية بس إنك سايبانى عايش فوق ضهرك 23سنة و بتقطعى من قوت
ولادك الأبرار و بتدينى أنا و شوية الأوغاد إللى زيى ...رغم إن إحنا مش ولادك
و لحد دلوقتى و رغم إن إحنا نستاهل الشنق ....لسا مضربتيناش بالرصاص زى الكلاب
كتر خيرك يا مصر
و صدق إللى قال عليكى أم الدنيا
بس وحياة غلاوة أبو دنيا عندك يا شيخة
تشوفيلى أى سفرية برا إن شاء الله حتى لهندوراس علشان تريحى ضميرى إللى بيأنبنى كل
شوية إن انا متقل عليكى و ضيافتى مسببالك قلق
سيبينى أروح أستراليا و هناك هعيش وسط الأستراليين أمن على سلامى النفسى
و على دماغى و تفكيرى و حريتى و على دينى




و هناك هربى الخرفان و هصاحب حيوانات الكانغرو






























هناك 14 تعليقًا:

  1. Australia fat7a bab el hegra we e3lanat-ha malia el grayed wel web sites
    el kangaro ammor we 7abbob fe3lan
    bas ennak t7afez 3la amn deenak henak..mazonesh el muslemeen el australian aslan by3ano
    fa la2 fokak

    ana bfaddal canada bsara7a
    lakn momken kman Newzealand law 3ayz 7aga ab3ad ma yakoon we orayba mn el batareek kman amameer we a7la mn el konger


    moser tfakarny enta -ana 3amla nafsy nasya aslan- 5sosan ''zebalet-ha'' bas makontsh bamla beha shonaty 3ashanha bas howa kan 3shany akter


    Ghallaaaaaab

    ya reet tsafer 3shan t7afez 3la salamak el nafsy we salmna e7na kman -lamma ne2ra kol da :( -

    3aref sa3at mn kotr mana shayfa el donya m2afela 7awalaya bab2a 3ayza aheg 3shan aro7 mkan waaaaase3 we a3raf antalek feeh we a3mel kol el engazat wel ebtkarat we a72a2 kol el a7laam wel klaam da kolo
    bas dayman bas2al nafsy harga3 tany we antashelha walla hatanesh we ha3mel mash3'ola

    kont barod b2akeed hagelha we mn gowaya ba2ol akeed ha3mel mash3'ola bas da tab3an kan bywga3ly dameery shwaya
    we f nafs el wa2t tab law geh 7ad mn elly fedlo feha we entashalha we ba2et 7elwa we gameela hasta7e2 eny arga3 tany?


    ra3'm kol el 3ak da
    7assa eny lessa 3ayza a3od we a3mel 7aga m3a nas homma kman 3yzeen y3melo 7aga

    yemken

    ردحذف
  2. يااااااااه

    كل الحب ده وكل الصدق ده

    إشتـدي أزمـة تنفرجـي
    قـد آذن ليلـك بالبـلـج
    //////
    اشتدّي أزمةُ تنفرجي **

    ما بعد العسر سوى الفَرَجِ

    ردحذف
  3. لو كرهتها ها أموت
    أنا عارفة نفسي
    لو اقنعت داخلي بما يقوله عقلي وأنا عمالة اضربه واقول له عيب
    ها أموت

    لو صدقت مع نفسي وبطلت نفاق نفسي لنفسي
    ها أموت

    فلتذهب انت للكانجرو لو قدرت
    انا مش ها اقدر للأسف
    بحبها البلد اللي كرهاني دي

    آه يا قلبي بوستك نزل نفسيتي 3 درجات وهي كانت نازلة 7 كده بقوا عشرة تحت الصفر

    ردحذف
  4. برضو هغيظك وهقولك انا بموت فيها وفي كل قرفها...
    بحبها بالاكراه .. غصب عنها وعن اهلها... وهتتعدل يعني هتتعدل.. بمزجها او غصب عنها...

    ردحذف
  5. ايه يابنى

    اخص عليك ... مصر يا ولا .. مصر

    ردحذف
  6. بص انا مخبيش عليك انا كمان عايز امشى .. عشان كده اصبر لما اخلص احتمال نسافر سوا (( كده ممكن ناخد تخفيض ع سعر التذاكر ))

    بس السؤال .. مين اللى هيفضل هنا ؟؟

    مين اللى هيغير ؟؟


    لان مش مصر اللى وحشه .. احنا اللى وحشين

    احنا اللى نستحق كل اللى بيحصل لنا واكتر

    حنا اللى أوغاد و سيبنا كل ده يحصل فينا برضانا

    مش مصر اللى وحشه .. احنا اللى وحشين

    ردحذف
  7. Sarah Sobhi


    أنا مش فاكر إذا كنت وضحت قبل كدا ولا لأ إنى بحب طائر البطريق دا بشدة

    بس فعلا أحييكى ..... هو كائن عسول كدا و مبطرق

    و إمبارح كمان عملت سيرش على صور الكانجرو و قعدت كتير أتأمل فيها و إكتشفت إنه فعلا حبوب و دمه خفيف خالص


    بالنسبة لأسترالا فأنا فعلا سمعت عن موضوع الهجرة و فى ناس قالتلى إنهم طالبين شرط لطيف خالص (( تتجوز واحدة أسترالية ))
    الصراحة لو كدا تبقى خدمة خمس نجوم يعنى

    ياريت


    إتهيألى أستراليا فيها حرية دينية

    و طالما دا متوفر يبقى خلاص كل واحد حر بقى فى تصرفاته

    و على فكرة فى المجتمعات الأجنبية يبقى أسهل إن الواحد يلتزم دينيا لإنه هيحس هناك إنه متفرد و لازم يحافظ على دينه و هيبقى دا سهل لو البلد دى فيها حرية دينية ، لكن المصيبة الأكبر لما تبقى البلد إسمها إسلامية و شعبها إسمه شعب مسلم و تلاقى الإعلام و الأفلام و الأغانى بل و تصرفات الشعب و أفكاره و عاداته و قوانين الحكومة معظمها متعارضة مع أبسط مفاهيم و أفكار الدين ــ حتى و إن كانت الجوامع مفتوحة و الناس بتروح تصلى ــ بس دا فعلا كفيل ببلبلة فكر أى حد و دا موضوع يحتاج مجال تانى

    ******************

    معاكى فعلا ..كندا بلد لطيف بس أنا بحلم بخضرة و مراعى مفتوحة فيها خرفان لطيفة بتمرح بسعادة حواليا و فى نفس الوقت مدن فيها أجانب مش مشبعين بحضارة الغرب للدرجة الكافية و دا متحقق فى أستراليا و نيوزلاندا

    و على فكرة أستراليا فيها نت ..... يعنى أنا وراكم وراكم

    ***************

    بصى عامة .....

    موضوع إنها تتحسن دا هيحصل بس عندى ليكى خبر وحش
    دا مش هيحصل فى حياتنا

    عامة ....
    دى إسمها معيلة و عدم تحمل مسؤلية

    إللى هو إيه دا ؟؟

    إللى هو الهروب و السفر و الهجرة

    دا فعلا شغل عيال صغيرة

    بس أنا فعلا حاولت و لسا بحاول على قد قدراتى و على قد قدر عزيمتى ....بس عند نقطة معينة هتعب و هزهق و هستعيل


    *****************

    ردحذف
  8. sal


    دا حقيقى

    بعد القاع التغيير المرتقب هو لأعلى
    بس الفكرة هل هو دا فعلا القاع و لا لسا فى إنحدار أسفل من ذلك ؟

    ردحذف
  9. ستيتة حسب الله الحمش


    معلش والله أنا عارف إنها ساعات مش بتبقى طالبة كلام زيادة

    بس أعمل إيه .....فاضلى شوية و أكلم نفسى

    ردحذف
  10. سمع هوص (Abo 3li)


    دا حقيقى يا أبو على

    موضوع إنها تتعدل دا حتمية تاريخية و منطقية

    جميل

    بس إللى مش جميل بقى إننا مش هنشهد دا

    أو على الأقل لو شهدنا بدايته مش هنشهد ثماره و نتايجه

    ردحذف
  11. قبلاوى

    يا حمادة ما هى مصر دى عبارة عن إيه ؟؟؟؟

    هى مش أهرمات و أبو الهول و النيل

    أنا مش هصاحب الأهرمات و لا هجاور النيل و أكيد يعنى مش هتجوز أبو الهول

    أى وطن فى الدنيا هو ناسه و البنى أدمين بتوعه

    و علشان كدا هى إحنا و إحنا وحشين ...يبقى هى وحشة

    بالنسبة بقى للجغرافيا و التاريخ فدى حاجات بتيجى فى المقام التانى بعد الخريطة الديموغرافية

    ردحذف
  12. شوف
    انا آخر واحدة ممكن تقولك كلام الشعارات اللي بيتقال ..
    لأن انا اصلا برة مصر ..
    بس عاوزة اقولك ..
    انك لو اتعودت تعيش برة مصر .. هتبقى زيي .. !
    هتنزل مصر تحس بغربة .. الناس هتنساك ..
    محدش هيفتكرك ..
    هيشوفوك .. مش هيعرفوك ..
    هتلاقي الوضع اتقلب ..
    صحابك في الغربة هيكونوا اوفى اوي من اللي انت ممكن تتخيله .. لأن الهم بيجمع القلوب على بعض ..!!
    مش عاوزة احفزك و مش عاوزة انفرك ..
    بس اهم حاجة ..
    تكون الكفة الراجحة هي اللي تستاهل التضحية سواء كانت مصر او غيرها ..
    انا لما سيبت مصر .. سيبتها هربانة من قلبي اللي اتكسر ..
    بقيت كل مابنزل .. اشوف اشباح حتت قلبي مكسرة و مرمية على الارصفة ..!!
    ماعليك مني :)
    انا اهذي !!

    ردحذف
  13. حلو إسم الكتاب اللى إنت مقتبس منه الموضوع


    530 بس


    ده راجل طيب

    (:

    ردحذف
  14. قهوة بالفانيليا


    شوفى و أنا كمان معدتش بقتنع بأى شعارات أو هراء

    و كل الكلام إللى كنت مقتنع بيه سابقا فقد جدواه عندى و أصبح مفرغ من معناه

    أنا لو قعدت فيها يبقى لإنى مش لاقى فرصة للخروج أو بمعنى أصح لإنى مش بدور

    لكن أنا قررت إنى أقعد فيها و أنا غير منتمى

    هحط نفسىجوا صومعة نفسية و وجدانية
    علشان ميجيليش ضغط و أمراض نفسية و عصبية و ضعف جنسى



    *************

    جمعاوى

    الحقيقة مفيش كتاب إسمه كدا

    دا عنوان أنا تخيلته يعنى

    و لو إنتضرت تجمع كل الأسباب مش هتخلص

    ردحذف