إللى أوله هراء أخره هبل

بص يابنى و بصى يابنتى ......

المدونة دى أنا عاملها علشان دماغى ، علشان متجننش ، علشان زى ما هو باين

من إسمها أصرف فيها الشحنات الكهربية و الأفكار و الكلام إللى لو إتحبس 

دماغى هتضرب و أتجنن 

و إنت أكيد ميخلصكش إنى أتجنن ......مش كدا ...

يعنى إنت هنا ــ و أنا معاك برضه متزعلش كدا ــ فى شبكة صرف عقلية 

فأهلا بك فى عالم الصرف و  المجارى و الهراء .......الذى لا داعى له .

السبت، 24 أبريل 2010

مبروك يا حمادة





لأ .........مخطبتش ولا حاجة .....

بدأت أساسا أعتقد فى أسطورية هذا الحدث الجلل لأسباب عديدة


لكن الفكرة إن أنا نجحت .....


لإن ...فى السنة إللى حمادة خلص فيها طب بيطرى ....دخل كلية حقوق


المفترض إن أنا دكتور بيطرى .......


يعنى الحقيقة ....كونك تبقى خريج كلية طب بيطرى فإن أغلب الظن و بقليل

من المجهود العقلى هنكتشف إنك دكتور بيطرى


يمكن دا مش حقيقى قوى يعنى .....فبعد خمس سنين من البهدلة فى واحدة من

أصعب كليات مصر و أقصد بيها تحديدا ( طب بيطرى كفرالشيخ )

و بعد التخرج بتقدير مقبول ( جدا ) رغم إنى كنت من الطلبة الكويسين إللى بيفهموا

و رغم كل الذكريات إللى معظمها أليمة و غير محببة للنفس عن المكان إللى كرهته أكتر

من أى مكان تانى و عن الخمس سنين الصعبين جدا إللى مروا عليا


رغم كل دا ....

فككل خريجى كليات مصر ........ الكلية عزيزى مش بتعلمك حاجة تذكر

لإن ببساطة مفيش شغل عملى .......

طب بيطرى بدون شغل مزارع وبدون معامل مجهزة و بكوادر تعليمية

غير مجهزة بتاتا للتدريس أو التفكير إلأ من رحم ربى ..........!!!!!


و رغم كدا فبيقولك ترتيبها رقم 2فى مصر ...!!!! شوف بقى الكليات إللى
بعدها فى الترتيب عاملة إزاى


كلية كان دكاترتها بيتباهوا قدامنا و هما سعداء كدا و فخورين إن الكلية من ساعة ما فتحت

و عبر 15سنة من تخريج الدفعات مفيش غير طالب واحد عبر تاريخها هو إللى قدر يجيب

تقدير عام إمتياز عن الخمس سنين


عامة ......

بلاها السيرة دى


نرجع تانى لأيام الثانوية العامة ....قبل ما أدخل الكلية

الصراحة كان نفسى أساسا ....أدخل شعبة أدبى .....علشان أدرس

فلسفة و تاريخ لإنهم عشقى منذ الصغر

بس دى ظلت رغبة مدفونة جوايا ....و الحمد لله إن حماقتى و إعتقادى

فى مثالية الأمور ساعتها مخلونيش أقدم على هذه الخطوة


لإن فعلا البلد دى مينفعش فيها الكلام دا



***


كانت كلية أداب هى معشوقتى منذ أن عرفت بوجود الكليات أصلا فى هذا العالم

و دا للأسباب التى تقدم ذكرها و هى المتأصلة كما قد طرأ عليها بعض الأسباب

الغير أصيلة أثناء مرحلة المراهقة و هى إن ....كلية أداب دى دايما بيتصادف

إن بيدخلها أكثر عدد مزز ممكن فى كل جامعة مقارنة بباقى الكليات سواء

عملية او نظرية

إحم .....

بس دا كان سبب غير أصيل و مش كويس كما سبق و و أضحنا


و كنت بلزق كروت رغبات التنسيق و أنا قلبى بيهفو إلى الكروت إللى مكتوب فيها

كلية أداب و أرنو بنظرى نحوها و أنا حزين على بلد لا يمكن للمرء فيها

أن يدرس ما يحب لمجرد أن الكليات العملية يابنى مستقبلها أحسن

و الكلية إللى إنت عايزها دى هتؤهلك بقوة للجواز بعد سن ال30لو حالفك التوفيق


دا كان كلامى لنفسى .....و أنا حاليا مش ندمان عليه بالعكس ...لقد إتخذت

القرار الواقعى الموضوعى


دخلت طب بيطرى و خلصتها ــ كيفما إتفق إنى أخلصها ــ و إن كنت أكاد أجزم

إنى كنت طالب بيفهم و إنى حبيت العلوم الطبية برضه و وجدتها ممتعة

بل كنت من الناس إللى بيفهموا المواد و يشرحهوها .


لكن حلم أداب كان لسا فى مخيلتى دايما و فكرت و انا فى سنة تانية طب بيطرى

إنى أروح أقدم أوراقى فى كلية أداب و أخد الكليتين مع بعض بالتوازى !!!!!!!


لكن إصطدمت هناك باللوائح إللى بتقول إن مينفعش تاخد مكان فى كليتين حكوميتين

فى وقت واحد ।


صريت فى قلبى و قررت إنى أخلص من طب بيطرى للعودة للمعشوقة القديمة


****


لكن الصراحة لما خلصت و خدت البكالوريوس و بقيت دكتور بيطرى

و كمان إشتغلت فى شركة أدوية بعد ما إتخرجت بأسبوع واحد و الحمد لله


كانت فكرة حقوق بدأت تسيطر على تفكيرى


معرفة حقوقنا أولى

و فى بلد زى دى لازم تعرف ليك إيه و عليك إيه

لإن محدش هيقولك


و هكذا دخلت كلية حقوق جامعة طنطا هذه المرة


واخدها إنتساب ...من منازلهم يعنى ..... بروح على الإمتحانات بس


و لقد وصلنى بالأمس فقط خبر نجاحى فى الترم الأول و إن كان متأخر كتير

لإنى بعتمد على المراسيل بتاعتى هناك




كان عندى ३ مواد بس الترم الأول


نجحت فى مادة واحدة لإنى ببساطة مدخلتش غيرها

لإن من حظى العاثر إن فى وقت إمتحانات المادتين التانيين كانت الشركة

إللى أنا شغال فيها عاملة cycle meeting فى القاهرة و هو من الفعاليات

التى لا يقبل التغيب عنها فى الشركة فأضطريت أضحى بالمادتين


أدعولى بقى ...


لإن الترم التانى فيه 6مواد و محتاج أنجح فيهم كلهم علشان أعدى السنة


أخيرا .......


لو نجحت إن شاء الله فى المواد إللى باقية

هقدم أوراقى السنة الجاية فى كلية أداب و أخدها تعليم مفتوح


علشان مموتش و انا ناقص أداب

هناك 14 تعليقًا:

  1. أستر عليا يسترك ربنا

    إيه يا أخويا نيرد دى ؟؟

    دى حاجة وحشة يعنى ولا ممكن أتعالج ؟

    ردحذف
  2. اولا مبروك ع النجاح يا متر

    ثانيا .. حقوقك ايه ؟ انت متكلبشتش ولا رحت النيابه الا وانت ف حقوق

    ثالثا .. اعذرنى .. بس انت عبيط يا حماده .. يابنى ركز ف شغلك .. ويعنى نفسك هفاك ع المذاكره اوى تعالى ياخويا ذاكر معايا او حضر دراسات عليا ف مجالك


    رابعا ... جينالكوا امبارح بس انت كنت نايم ( كالعاده ) زى البطيخه

    ردحذف
  3. ربنا يبارك لك فى عمرك
    وماتموتش وانت ناقص لا اداب
    ولا حقوووووق

    انت ماشى صح
    ربنا يسعدك

    ردحذف
  4. بما ان حقوق صعبة
    ومعرفة الحقوق اصعب
    والحصول على الحقوق درب من دروب الخيال
    اذا اهنئك عزيزي اللورد على اجتياز مادة في الترم الأول
    وادعو من اجل ان لا يحدث أي ميتنجز تمنع انجاز ستة مواد فقط في الترم التاني :)

    ردحذف
  5. مبروووووووووك
    علي فكرة انا من خريجي اداب تاريخ معشوقتك
    وفعلا ياهراء الاداب من اعظم الكليات وبالرغم من الكل عمال يقولي انت اهبل وعبيط اللي انت دخلت الكلية دي عشان مفيش شغل لها بس انا مش ندمان انا كتبت في رغبات التنسيق اداب اسكندرية وجاتلي وانت عارف ان تجيلك اول رغبة وات عاوزها ضرب من ضروب المستحيل

    وربنا يعينك علي الحقوق بس لو كنت دخلت اداب كنت لاقيت سهوله في المذاكرة عشان هي سهلة الي حد ما بالنسبة لحقوق وربنا يوفقك دايما

    تحياتي

    ردحذف
  6. قبلاوى


    يا حمادة أنا ماليش مزاج أحضر حاجة فى طب بيطرى حاليا

    و بعدين ممكن أبقى أجى أذاكر معاك مفيش مشاكل
    إنت تذاكر جراحة و نسا و أنا أذاكر قانون دستورى

    و لما إنتوا جيتوا مصحتنيش ليه ...مكونتش هعضك يعنى

    *********

    sal

    يارب

    متشكر لحضرتك


    ************

    ردحذف
  7. ستيتة حسب الله الحمش

    حلو التسلسل دا و أنا معاكى فيه ....بس أهو الواحد بيرضى مزاجه فى المقام الأول


    *************

    Haytham Alsayes

    أهو قسم التاريخ دا بالذات إللى أنا عايزه

    الصراحة يابختك

    ربنا يعينا لحد ما نوصله

    ردحذف
  8. اولا الف الف مبرووووووووك على النجاح في الترم الأول

    ثانيا بسم الله ما شاء الله

    ثالثا لسه الوقت موجود وتقدر تدرس الأداب براحتك بس نصيحة متكونش جامعة المنصورة

    ان شاء الله من نجاح لنجاح وبجد سعيدة اني في حد بيحب كليتنا كده لأن كتير بيعتبروها كلية قاع !
    ده بغض النظر عن موضوع المزز

    ردحذف
  9. مبرووووووووووووك وربنا يسهلك امروك وعقبال الباقي يارب
    اللهم امين:)

    ردحذف
  10. ربنا ينجح مقاصدك ويجببببببر
    بخاطررررررررررررررررررررررك
    يارب انت وكل مكافح ومناضل
    فى حقل التعليم فيكى يابر مصر
    المحروسة.لكن فعلا أنا معاك أن
    الطب البيطرى من أصعب الكليات
    والمريض بتاعها(صعب التفاهم معاه)
    لكن كل دا كوم وأنك تدخل حقوق بعد كده
    فده كوووووووم تانى :احيييييك على هذه
    الخطوة الشجاعة جدا جدا جدا جدا

    ردحذف
  11. ربنا معااااااااااااااااااااااك
    حقوق اداب
    المهم حاجة بتحبها تعملها
    وانها مش اجباريه عليك

    ردحذف
  12. انا عجبتنى المقاله دى
    فقولت تلاته بالله العظيم منا ماشيه الا اما ارد
    لسبب
    انا طب بيطرى المنصورة سنه رابعه
    ودياما ولحد دلوقتى بيقولوا لنا بيطرى كفر الشيخ اسهل بيكتير مننا
    دا كذب وافتراء بقى والا الكليات اللى فيها حاجه والا احنا اللى فينا نقص
    ماعلينا
    ربنا يوفقك لما تحب وترضى به الله عز وجل

    ردحذف
  13. ههههههههههه

    طيب ماشى يا ستى

    ربنا يوفقك و تقدرى تخلصى الكلية دى بسلام و بكامل قواكى العقلية

    ردحذف