إللى أوله هراء أخره هبل

بص يابنى و بصى يابنتى ......

المدونة دى أنا عاملها علشان دماغى ، علشان متجننش ، علشان زى ما هو باين

من إسمها أصرف فيها الشحنات الكهربية و الأفكار و الكلام إللى لو إتحبس 

دماغى هتضرب و أتجنن 

و إنت أكيد ميخلصكش إنى أتجنن ......مش كدا ...

يعنى إنت هنا ــ و أنا معاك برضه متزعلش كدا ــ فى شبكة صرف عقلية 

فأهلا بك فى عالم الصرف و  المجارى و الهراء .......الذى لا داعى له .

الأحد، 13 يونيو 2010

يوميات مواطن مهزوم





يوميات كأس العالم ....
الصراحة أنا سعيد بخسارة الجزائر......و لتذهب القومية للجحيم ما بين المسلمين و بعض رابط الدين ....و دا ممكن يتضح ساعة حرب ولا ساعة جد ......لكن الصراحة فى الكورة مش قادر أسامحهم و فرحت فيهم
فريق عويل و معندوش كورة و لا حتى أخلاق ......لو منتخب الرجالة كان صعد مكانهم كان أبدع و علم فى كأس العالم دا علامة كبيرة
طبعا أن مازلت بكره مصر ........... بس أنا بحب المنتخب و بحب لعيبته
***
النهاردة برضه زعلت علشان منتخب بلدى أستراليا خسر بنتيجة كبيرة صحيح فى ماتشنا مع غانا هشجع غانا ...بس دا راجع لرغبتى فى مشاركة المصير الثورى المشترك مع إخوانا الأفارقة فى مواجهة الجل الأبيض المحتل و دا ميأثرش فى إنتمائى لوطنى أستراليا

***********************
برامج كتير ، فيديوهات على النت و كلام يقطع القلب من ناس كتير محروقة و مكتئبة
دا بيرجعنى تانى من جو كاس العالم والناس المحترمة النضيفة السعيدة لجو بلدكم مصر

إحنا كدا بنوصل للحظة الذورة فى فيلم الرعب إللى إحنا عايشين فيه و مسمينه بالغلط مصر
تخيل .......
إنت عايش طول حياتك خروف ساكت و فى حالك
لا خرجت فى مظاهرة ، ولا طالبت تغيير ، ولا إنت من الكفرة الفجرة إللى بيدعوا لتغير الحاكم ، و لا حتى حطيت صورة البرادعى على أكونت الفيس بوك بتاعك
و رغم ذلك برضه إنت و إنتى و أنا مش عاجبينهم

بس قبل كدا كانوا بيضربوا إللى بيطلعوا فى مظاهرات أو كانوا بيقلعوك لما تعدى بالصدفة على الكمين لو شكلك معجبش البيه الظابط
لكن دلوقتى إنتقلنا لمرحلة جديدة دلوقتى و لفترة غير محدودة و من غير أى سبب و بدون ما تكسر أيا من قواعد حياة الخرفان و الفراخ بقوا ممكن يخشوا يجيبوك من أى حتة من محل من مكتب من بيتك
يعنى بقى عندهم خدمة التوصيل للمنازل
إفرحوا يا سادة...........


وياريت بس هتتظلم و تتاخد غدر ......دا إنت كمان بعد ما تموت هتتهم بإنك بتاع مخدرات و حرامى و متحرش و مأدتش الخدمة العسكرية زى تامر حسنى و مخبى دبابة تحت السرير و بتنفخ نار من فمك و إن الشياطين بتحتسى معاك الخمر كل مساء



أنا حانق و غاضب و مستهلك من كتر التفكير
أنا مش هشتم ولا هسب و لا هلعن علشان مارست هذه الأنشطة كتير الفترة إللى فاتت لحد ما تعبت و شيلت ذنوب على الفاضى
رغم إنى من فترة بسيطة كنت ذلك الشاب الأهبل الساذج إللى جتته بتقشعر و قلبه بيدق مع مصر هى أمى و يا حبيتى يا مصر و هذا الهراء المفرغ من معناه
شوية الكلام الأهبل إللى إنضحك بيه علينا
شيء صعب و صادم لما تعرف أو تدرك إنك مكتوب عليك تكمل حياتك فى بلد بالشكل دا
الحكومة فاسدة و ظالمة و الشعب هو كمان فاسد و ظالم

و هنا .......
ترارارارار .........
عندك خيارين :
الأول : إنك تتدروش و تزهد الدنيا و مش إشكال يعنى الأربعين و لا الخمسين إللى هتقضيهم فى الدتيا ...هيعدوا بسرعة و مش هتحس بيهم
المهم الأخرة

لكن الصراحة دى تبقى السلبية بأجل صورها و مش عارف أعتقد إن ربنا فى شريعته إللى نزلهالنا فى كتابه و سنة رسوله و هدى صحابته و تابعيه فى القرون المفضلة كلها كانت ضد السلبية
يعنى ممكن حتى تتدروش و مطولش الأخرة كمان الحقيقة انا مش عارف ممكن يكون حكم الدين فى كدا إيه ؟!!!

الخيار الثانى :
إنك تناضل و تعمل فيها راجل ....تناضل ضد الحكومة الفاسدة الظالمة و ساعتها لازم تتحمل الضرب و التعذيب و الأهانة و العصيان الطويلة و الأغرب إن دا ممكن يتعدى تأثيره عليك دا كمن ممكن يطول أهلك و إخواتك و عيلتك و دا ياما حصل


مش كدا و بس ...... دا إنت كمان تناضل ضد الشعب الفاسد الظالم يعنى تقعد تتجمع مع القلة القليلة الكويسة و تبقى تصرفاتكم مخالفة و شكلكم مخالف و أفكاركم مخالفة ....و تحاولوا تصلحوا فى المجتمع البايظ المقلوب الممسوخ اللاعقلانى و اللامنطقى و لازم ساعتها تتحمل النفى الإجتماعى إللى ممكن يحصلك من مجتمع بيرحب بالمغنيين و الرقاصين و الحرامية و بيضعهم على قمة الهرم الإجتماعى فوق رقاب المحترمين و المتفوقين و المفكرين



مش كدا وبس .......... دا إنت كمان لازم تتحمل أمراض الضغط و الإكتئاب إللى بتيجى للفاهمين و بيرحم منها الأنعام

هتقولى مفيش خيار تالت
اه فيه طبعا .......... إنك تنخرط فى صفوف الغنم و تلقط الحبوب من الأرض زى باقى الفراخ و تعيش حياتك عادى متظاهر إن دى طبائع الأمور و إن دا العادى بتاع الدنيا و إحنا إتولدنا لقينا العالم كدا و ربنا يخرجنا منها على خير بس و تنسى و تتناسى إنك المفروض ترفض أو تنكر و لما حاجة تحصل و تفكرك و تشعل مراكز التفكير و النقد جواك تلحق تجرى تطفيها علشان متعكرش صفو حياتك بتفكير أو تكدير
هتعيش زى إللى عايشين و تفتكر نفسك إنك أحسن بنى أدم فى الدنيا و إن ياريت العالم كله يبقى إنسان رائع زيك .......هتشتغل شغل على ما يقضى و تتجوز على ما يقضى و تخلف على ما يقضى ....و التربية ....برضه على ما يقضى
و أنا راجل طيب وفى حالى .....


مبروك أيها الغنمة السعيدة




**************************


الأحد 13 يونيو 2010 يوميات الإمتحانات ..........النهاردة إمتحنت قانون دستورى الصراحة بغض النظر يعنى عن الواحد بيتعصب فى الساعة إللى بيستناها قبل دخول اللجنة من كمية الباديهات و الميك أب و الغباء إللى بتطل من العيون حواليه بس حقيقة ...قرار دخول حقوق هيظل من أفضل قراراتى مؤخرا


الواحد عرف معلومات كتير مهمة


و إتفتحت فى ذهنه مدارك و أفاق كان صعب يوصلها فى مسار قراءاته و حياته العادية

طبعا مش محتاج أقول إن الدستور بتاعنا دا مش حلوو إن التعديلات إللى جرت فى 2007 كانت أغلبها فى مصلحة النظام و دا الصراحة بيحطنى قدام تساؤل محيرنى من زمان و هو ...طالما النظام يقدر يحكم البلد زى ما هو عايز يمين و شمال فوق و تحت و فى الإتجاهات الفرعية و من غير ما أى حد يقدر يحاسبه و التجارب الطويلة أثبتت ذلك ....ليه بقى بيوجع دماغه بدستور و تعديله و هذا الهراء ؟؟

و لا دا من قبيل الدعابة و التسلية مش أكتر ؟؟

هناك 6 تعليقات:

  1. اصل النظام راكبه عفريت ..
    والشعب في الأقمقم ..
    والعالم مدروش بهمومه
    ولو قلولك انتي مصر قولي ايه
    وايه هنا استنكار وليس سؤال

    ردحذف
  2. الاول.. بغض النظر عن مدلول الصورة بس انا بحب طواحين الهوا

    البوست بقى.... انا مش فاكرة بالضبط كنت عاوزة اقول ايه نسيت عبال ما وصلت لاخره

    بس عموما فى طريقة رابعة
    هى يمكن تبان سلبية بس انا شيفاها ايجابية على المدى الطويل
    دلوقتى انا هستفيد ايه لما كل خبر ميعجبنيش اتنرفز و اهرى و انكت فى نفسى
    كده لا هعرف اشتغل ولا افكر و لا اعيش

    خلينا واقعيين
    مصر عمرها ما كانت يوتوبيا ولا هتكون
    ولا اى مكان فى العالم
    المصايب و القرف و الفتن فى العالم كله و كل مادا بيزيد
    باب الفتن اتفتح من عصر عمر بن الخطاب و مش هيتقفل غير عند قيام الساعه

    كل الحكاية ان وتيرة الاحداث بيجلها وقت و تزيد و تتصاعد و منبقاش ملاحقين عيها زى دلوقتى
    ونفضل نقول عيزين تغيير و بتاع
    طب مهو اللى احنا فيه ده ناتج عن تغيير

    احنا ممكن نتعامل مع كل حاجه بقدر
    يعنى معملش سلبيات
    مخليش اللى بيحصل عكنن عليا دلوقتى و كمان يكون ليه اثر ممتد
    وبعدين مهو معاناتنا دى فى حد ذاتها جهاد ..بنحارب الواقع-نستحمله و نستمر- عشان لما يجى وقت الهدوء النسبى منبقاش متنا من زمان

    ردحذف
  3. MR.PRESIDENT


    هقولك لأ طبعا .....

    أنا مواطن أسترالى سعيد

    عايش فى مزرعة خضرة فى حضن الجبل مع زوجة من الجالية اللبنانية مثقفة و جميلة

    و عندى أغنام كتييير و بتمتع بالحرية و راحة البال

    و مربى 3 كناغر بيحبونى و مش بيناموا غير لما أغنيلهم


    **************

    Sarah Sobhi


    أولا أنا عمرى ما سمعت عن حد بيحب البوا العاصرة و طواحين الهوا !!!

    إنتى محتاجة تعرفى أكتر عن الحاجات إللى ممكن تعجب الواحد فى العالم D:

    لكن دون كيشوت معبر عامة يعنى



    بالنسبة لموضوع نهرى فى نفسنا دا

    المشكلة إننا بننسى

    أنا شخصيا نسيت كتير و بنسى علشان مش بفكر نفسى أول بأول

    أنا عندى يجيلى ضغط بس منساش إللى انا عايز أفتكره


    بالنسبة للعلامات والفتن فإحنا مش مطلوب مننا إن إحنا نغير قدر أو نصنع تاريخ بمفردنا

    و عامة المستقبل دا محدود الأهمية بالنسبة لكل واحد فينا كفرد

    لإننا هنتحاسب على عملنا و رد فعلنا و تجاوبنا مع الفتن و العلامات دى مش مدى تأثيرنا فى وضع العالم الكلى

    ردحذف
  4. ثقافة الهزيمة .. حلوة يا بلدى

    فى كتاب داخل مصر"Inside Egypt": أرض الفراعنة على شفا الثورة الذى صدر عام 2008 يقول كاتبه الصحفي الأنجليزي جون برادلي عن مستقبل مصر أنه على رغم من بعض النجاحات الاقتصادية ألا أن توزيعها تم على من أرتبطوا بالنظام فقط دون أن يصل ذلك لباقي الشعب مما أدى"زيادة الحنق" بين المصريين. ويشير الكاتب إلى رؤيته في زياراته المتكررة لمصر كيف مثلا أن عدة ملايين من الثروة المصرية تنفق لأنشاء المصارف وتقديم المياه للقرى السياحية والفنادق الفاخرة التي يستخدمها السياح الأجانب والأغنياء المصريون فقط "في حين يموت الألاف المصريين كل عام نتيجة تلوث المياه التي تصل لهم"...

    باقى المقال ضمن مقالات ثقافة الهزيمة بالرابط التالى www.ouregypt.us

    و لايفوتك زيارة صفحة من الشرق و الغرب فى نفس الرابط و به الكثير من المقالات الجيدة.

    ردحذف
  5. رمضان كريم

    وكل عام وانتم بخير :)

    ردحذف