إللى أوله هراء أخره هبل

بص يابنى و بصى يابنتى ......

المدونة دى أنا عاملها علشان دماغى ، علشان متجننش ، علشان زى ما هو باين

من إسمها أصرف فيها الشحنات الكهربية و الأفكار و الكلام إللى لو إتحبس 

دماغى هتضرب و أتجنن 

و إنت أكيد ميخلصكش إنى أتجنن ......مش كدا ...

يعنى إنت هنا ــ و أنا معاك برضه متزعلش كدا ــ فى شبكة صرف عقلية 

فأهلا بك فى عالم الصرف و  المجارى و الهراء .......الذى لا داعى له .

الثلاثاء، 2 نوفمبر 2010

هراء مسترسل 2












مشكلة الهنود إنهم هنود


بس الحقيقة يعنى هما ناس مسليين

و الأفلام الهندى دى مسلية قوى و الهنديات فيهم ناس حلوين

أقصد هنا الهند إللى هى الهند




لونج شانكس ( يعنى السيقان الطويلة ) كان بيقول فى بريف هارت ( أتعرف ما مشكلة أسكتلندا ....... إنها مليئة بالأسكتلنديين نياهاهاهاهاهاهاهاها )

!!!


عامة وليام والاس نجح فى إنه يقودهم فى ثورة ضد الإنجليز و إتخلصوا من الإمبراطورية الرومانية التانية بدرى قوى قبل ما إنجلترا تستفحل و تستعمر العالم كله فيما بعد

على عكس الأيرلنديين الأغبياء

فضلوا قرون تحت سيطرة الإنجليز و مقاموش بثورات قوية
و لحد النهاردة مازالت تحت الإحتلال و السيطرة

ياللسخافة


و هى دى بقى صفات الشعوب الغبية بليدة الفهم دنيئة الحس

فالغباء و الخيانة و النفاق قبل الخوف و الجبن

و إنهيار الأخلاق يسبق إنهيار الدين

فالأمة إللى من غير أخلاق تبقى من غير دين حتى لو كان عندها جوامع او كنايس أو معابد




غريندل فضل يضايق ملك الدنمارك

بيقولوا إن دا كان فى القرن الخامس الميلادى و دا يديك إنطباع عن مدى تخلف الأوروبيين فالعالم فيما خلف الإمبراطورية الرومانية كان فعلا ظلام و جهل و قذارة و لحد حدود الألفية التانية كمان بل و فى مناطق لحد بداية عصر التنوير ثم النهضة

اه ما هى الأمم بعد مرحلة الغفلة بتمر بالصحوة ثم اليقضة ثم التنوير ثم النهضة


و كلها مراحل مختلطة غير محددة بحدود فاصلة واضحة


نرجع للجريندل

بيقولوا كان وحش أسطورى ضخم كان بيهجم على قاعة الإحتفالات الملكية و يقتل كل إللى فيها أو يخطف حراس الملك أو يقتل المزارعين فى حقولهم


و طبعا لازم يظهر البطل

( بيوولف )

أول ملحمة أنجلو ساكسونية فى التاريخ

بيولف جه من بره البلاد و حل ضيفا عند ملك الدنمارك و قتل الجريندل

و الإسطورة بقت مشهورة جدا فى أوروبا الشمالية و إتقالت بأكتر من صورة و أكتر من صياغة




و فى الحقيقة بقى يعنى

الجنس الأوروبى دا ـ لو صح التعبير يعنى ـ بس هو جنس سخييييف جدا و مدمر و أحمق و قذر


أينما حلوا أعملوا التدمير و الفتك بالأخرين

و دا برضه مش معناه إن بقيت الأجناس دواجن لطيفة مسالمة

لأ

البشر فيهم حاجة مش مظبوطة

يعنى مثلا الهنود الحمر فى أمريكا الشمالية كانت حياتهم قبل قدوم البيض كلها حروب و إغارات و سبى و قتل و عدم أمان

بالظبط كدا كانت أشبه بحياة العرب فى الجزيرة قبل الإسلام


و كانت حضارتهم حضارة بدائية بسيطة


و جه الإنجليز و الفرنساويين و الهولندييين و إحتلوا أمريكا الشمالية على مراحل

و قتلوا فى الهنود

و حاربوا بعضهم و إستعانوا بقبائل الهنود فى حروب غريبة الشكل و التكوين



لحد ما إنجلترا ـ كالعادة ـ علمت على فرنسا و أخدت كل أراضيها فى أمريكا

و علمت على هولندا و أخدت نيو أمستردام و سمتها بعد كدا نيويورك


و أجلت الهولنديين عن أمريكا الشمالية زى بالظبط ما هتعمل بعد كدا بقرنين و تخرجهم من جمهورية الترانسفال و الأورانج الحرة و الكيب من جنوب إفريقيا فى حرب البوير الأولى و التانية

إنجلترا دى فعلا سخيفة


لا بجد يعنى سخيفة سخيفة




لكن معاناة الهنود الحمر الحقيقية بدأت مع قيام أمريكا وتكوين الجيش الأمريكى

ظهرت شغلانة جديدة إسمها صيادين الهنود الحمر

كانوا بيصطادوهم و يعلقوا تذكارات من أجسادهم زى فروة الراس أو الأنوف أو الودان أو الأعضاء التناسلية فى قبعاتهم

و كان الراجل و العسكرى الأمريكى بيتباهى بعدد التذكارات الجسدية إللى جمعها من الهنود الحمر إللى قتلهم


عملية إفناء


دا غير طبعا البطاطين إللى كانوا بيلوثوها بالجدرى و يدوها للهنود فى المخيمات بتاعتهم علشان يموتوا

الهنود مكانش عندهم مناعة لأمراض الرجل الأبيض

و الأمراض موتتهم مع الحروب مع الغباء




لكن فى الحقيقة مفيش فى الدنيا غباء زى غباء الهنود فى أمريكا الجنوبية و المكسيك

كانوا أصحاب حضاة حقيقية و متطورة على عكس هنود أمريكا الشمالية إللى معرفوش غير النظام القبلى و الحياة البدائية



إمبراطورية الإنكا كانت الأعظم فى أمريكا الجنوبية



و كان تحت سيطرتهم حوالى 10 مليون روح


لكن ربنا بيهلك الظالمين بالظالمين

تجبروا على كل من جاورهم و كانت أسهل حاجة عندهم إنهم يقدموا ضحايا بشرية من الأماكن إللى بيحتلوها من جيرانهم و يدبحوهم على المدبح الصخرى بأعداد رهيبة و بطرق بشعة



علشان كدا ربنا سلط عليهم من لا يخافه ولا يرحمهم الأسبان



الغريبة و إللى محيرنى فى تفاصيل إحتلال أرض الإنكا إن بيزارو كان معاه فقط 150 عسكرى أسبانى


و رغم ذلك تنغلب على أتاهولبا إللى كان معاه ألاف المقاتلين الأشداء فى تفاصيل مثيرة للضحك و السخرية


و كرر بيزارو مع أتاهولبا نفس إللى عمله كورتيز مع مونتزيوما

و مونتزيوما دا بقى إسم زعيم الأزتك و دى الحضارة إللى قامت فى المكسيك بصورة موازية لحضارة الإنكا فى بيرو

و قضى عليها كورتيز ب 500 عسكرى أسبانى و مدفع واحد بس !!!!

قتل الألاف من الأزتيك و إحتل عاصمتهم و دمرها و إللى كانت أكبر مدينة فى العالم كله وقتها حسب بعض التقديرات !!!!

و أعتقل مونتزيوما إللى فدى نفسه بمليء حجرة إعتقاله ذهب

و رغم ذلك بعد ما خدوا الدهب قتلوه





كذلك فعل بيزاروا بعدها بسنوات قليلة مع أتاهولبا




عامة الهنود هما إللى عملوا فى نفسهم كدا

سواء فى الشمالية أو الجنوبية

لإن لما بيحين معاد إنهيار الحضارات بتنتحر قبلها علشان تبقى جاهزة لأى حانوتى يكفنها



عامة

الإنكا كانوا ظلمة و فسدة و سافكى دماء

و الأسبان كانوا هما كمان ظلمة و فسدة و سافكى دماء



محدش ظالم و محدش مظلوم




************

قام فوزى من نومه سعيدا و مشرقا

و مبتسما للحياة الجميلة و الطبيعة الخلابة


و أيقظ زوجته برقه طالبا منها أن تعد له الإفطار

فرفضت

فأخرج مسدسه من الدرج المجاور و قتلها


و ذهب ليعد طعام الإفطار بنفسه

هناك 6 تعليقات:

  1. wonderful and more

    ردحذف
  2. السلام عليكم

    هرائك لذيذ وأسلوبك أجبرنى على المتابعه
    يبقى مش هراء
    ومتابعين

    ردحذف
  3. بقى اخرج المسدس وأطلق النار
    وبعد كده راح عمل كوب الشاى
    ماكان من الأول وبلاش قتل!
    كما قال واحد من العمال
    هرئك لذيد يجبر القارىء
    له على أكماله.

    ردحذف
  4. المهم ولا أقولك الأهم:)
    كل سنه وانت طـــيب
    وعيد سعــيد عليك
    يارب

    ردحذف
  5. eToro صفقات التداول المفتوحة في 227,585,248

    حكمة الجموع المتداولون الذين يستخدمون CopyTrader™ من eToro يزيد احتمال أن يحققوا أرباحًا بنسبة 60%

    ردحذف