إللى أوله هراء أخره هبل

بص يابنى و بصى يابنتى ......

المدونة دى أنا عاملها علشان دماغى ، علشان متجننش ، علشان زى ما هو باين

من إسمها أصرف فيها الشحنات الكهربية و الأفكار و الكلام إللى لو إتحبس 

دماغى هتضرب و أتجنن 

و إنت أكيد ميخلصكش إنى أتجنن ......مش كدا ...

يعنى إنت هنا ــ و أنا معاك برضه متزعلش كدا ــ فى شبكة صرف عقلية 

فأهلا بك فى عالم الصرف و  المجارى و الهراء .......الذى لا داعى له .

الاثنين، 17 مايو 2010

منك لله يا مصر






يا جدعان خلاص كفاية بقى
أنا عايز أنسى إن فى حكومة و إن فى شعب
و إن فى مصر أصلا
مش عايز أقرا حاجة توجع القلب تانى
أنا خايف يجيلى ضغط قبل ما أوصل التلاتين !!
أنا خايف على صحتى الإنجابية !!
أنا خايف من أعراض الإضطراب النفسى إللى بلاحظها لما ببص للمراية !!
أنا خايف على دماغى الغالية المتكلفة إللى تعبت كتير فى تربيتها و تسمينها !!
أنا خايف من كتر الحاجات إللى المفروض أخاف منها !!!!

طب أعمل إيه ؟؟؟!!!!


أنا عايز حشيش فكرى
اه صح
هو دا الحل
التحشيش الفكرى
مالها ميلودى تتحدى العقل ؟
ماله وديع و تهامى و بوبى
مالها الكليبات الراقصة
مالها قنوات الإعاقة الذهنية ؟؟؟
إمسك الريموت و أقعد طول اليوم قلب ..... و إنسى
إنسى ...
إنسى ....
إنسى......
إنسى........
صدقنى هتستريح ....و هتبقى سعيد
حمار ........بس سعيد
و مين قال إن الحمير مش سعيدة ؟؟!!
فلتحيا الحمورية ــ لو صح التعبير ــ
اه صحيح
بس فى مشكلة
صحيح الحاجات دى بتريح الدماغ
بس للأسف بتودى النار
و أنا الصراحة مش عاوز أخش النار

يكفينا نار الدنيا إللى إبتلينا بالعيش فيها
مش هيبقى لا دنيا و لا أخرة
ما هو أصل الحاجات دى كلها عرى و سفالة و محرمات
دا غير إن ربنا خلقك علشان تبقى إنسان و تعيش كإنسان و تفكر كإنسان و تتصرف كإنسان
و لو إنت بدلت نعمة ربنا عليك و جحدت بيها و حولت نفسك بإرادتك لحمار ......سيحق عليك العذاب
فاهمنى يا حمار


طيب إيه الحل

أيوة بالظبط كدا
أنا خلاص عرفت الطريق الصح و السهل
أنا هقصر الجلبية و أربى دقنى و أستعمل السواك قبل الصلاة و أقول إن الأغانى و المظاهرات ضد الحكام الظالمين حرام
و هقفل بابى على نفسى و ليذهب الجميع من بعدى إلى الجحيم
صح كدا


بس فى مشكلة .....
صحيح دا طريق مريح نفسيا و بجد هتبقى كويس و أفضل لو مشيته
بس للأسف دا برضه مخالف لتعاليم الإسلام !!!!!!!!
أصل الرسول و صحابته معملوش كدا
و أكيد الدين من الناحية العقائدية و السلوكية بناخده عن الرسول و صحابته
و هما مبنوش المسجد و قعدوا فيه و قفلوا بابهم على نفسهم و قالوا مالناش دعوة بالمجتمع ولا بالبشر ولا كانوا أبدا بيرضوا لدينهم بالدنية ولا كانوا بيخافوا من كلمة الحق ولا من الجهاد فى سبيل الله


طيب هو إحنا مسلمين أصلا و لا إحنا بنتشبه بس بيهم طيب لو مسلمين
ليه فيه بون شاسع بينا و بين ال standard society المجتمع المثالى ــ مجتمع الرسول و الصحابة فى المدينة ــ إللى المفروض بيتقاس عليه أى مجتمع مسلم عايزين نقيمه
ليه مش شايف تشابهات كتير بينما الإختلافات فى أغلبية مظاهر الحياة ؟؟؟
طيب هو إحنا أعداء اليهود زى ما بابا و ماما الوحشين ضحكوا عليا و قالولى كدا و أنا صغير و لا إحنا حبايب و لا هو إيه بالظبط
طب لو أعداء ليه بنبوسهم و نحضنهم ، طب لو حبايب ليه بيقتلونا و كنا ليه حاربناهم و ليه أدهم صبرى كان بيزيقهم من قبضاته الحديدية ...ما كنا نحارب الفلسطينين أحسن ، ولا إحنا تداركنا غلطنا و دلوقتى فعلا بنعمل كدا ؟

طيب هى البلد دى بتاعتنا و لا بتاعة الحكومة
طيب هو مين الحكومة دى أساسا ...من عندنا ولا من بره
طب لو من عندنا ليه بيتصرفوا زى ما يكونوا من برا ، طب لو من برا ليه بنقول إنهم من عندنا
طب أنا ليه عديت ال23 سنة و لسا متجوزتش ؟
طيب ليه أبويا يجيله سرطان كبد و ميعرفش يتمتع بخدمات التأمين الصحى إللى هو بيدفعه من مرتبه بقاله 30 سنة خدمة فى أم البلد الوسخة دى ؟
طيب ليه تامر يطلع فى التلفزيون و البنات تحبه هو و متحبنيش أنا ــ رغم انا عندى شعر فى صدرى زيه برضه ــ ؟

طيب ليه مرات وزير الصحة تتعالج على نفقة الدولة و الراجل النهاردة الصبح لما كنت فى صيدلية المستشفى كان فاضل شوية و يطلع من جلبيته علشان مش عارف يصرف شريطين دوا عمى بكام ملطوش و باين إن دماغه فعلا لسعت و أول ما شافنى لابس كرافتة أنا و زميلى راح مفتوح فينا زعيق بدون سبب (( إنتوا بعتونا .... إنتوا بتاجروا فينا ...، نروح فين بعد كده ......، دا لو إسرائيل إحتلتنا يبقى أحسن لنا )) و واضح برضه إن فكرته عن الناس إللى لابسين كرافتات إنهم أوغاد لا خلاق لهم و بيتاجروا فى الأخرين إللى مش لابسين كرافتات
طيب أنا ليه كنت موافقه فى كلامه فى موضوع إسرائيل دا ؟

بس عامة ...............كل دا يمكن التعايش معاه بس المشكلة الكبرى لما حصة المية تقل هستحمى إزاى أنا يعنى كل يوم الصبح بعد كدا ؟؟؟
أنزل الشغل من غير حمى !!!
يا للهول !!



أبطل تفكير أزاى ؟؟؟
قولنا الحشيش حرام
و الحشيش الفكرى بأنواعه حرام
طب أعمل إيه ؟؟؟
أروح أستراليا فعلا !!!!و أعيش وسط الخرفان و الكناغر ــ جمع كنغر ــ
و لا أستنى هنا و أستعوض ربنا فى شبابى و صحتى و عقلى

ربنا ينتقم منك يا مصر و يورينى فيكى يوم
روحى يا شيخةو أنا مش مسامحك


هناك 11 تعليقًا:

  1. زعلان اوي انك 23 سنة ومتجوزتش لسه؟؟
    طب منا زيك .. بس واقعي واقصي طموحي اتجوز قبل التلاتين... ههههههههههه...

    ردحذف
  2. ثم هوا كل مصيبة هتقعد تدعي علي البلد؟؟؟!!!!
    طب متدعي علي الحكومة اسهل... اهو علي الاقل منتش عارفلها مله...

    ردحذف
  3. هراااااء

    انا ماليش دعوة لو سمحت متغيرش الموضوع
    فييييين الجزء التانى يااا استااذ

    يعنى انت مختفى اسبوع عشان تيجى بالبوست ده !!!!

    ردحذف
  4. أولا تحياتي لك .. ثانيا البلد مش السبب ، السبب اهلها اللي عايزين ياكلوا ويشربوا ويعملوا بي بي ، ثالثا شفا الله اباك وعافاه ، رابعا حاول السيطرة علي جانبك الحموري شوية ، وابدا في عملك ، وانصح زمايلك ، ماهو للاسف انا لما أكون مضايق شوية بطلعه علي قفا الشعب .
    حاول تغير اللي حوليك ، أما الحكومة فهي أصلا حكومة بنت .... ( علي فكرة النقط مش كلمة أبيحة )
    حتة الجماعة اللي قفلها علي نفسها المسجد دي ، انا عارفهم علي قدي وهما بيشتغلوا بس بيعبدوا ربنا ، وكون انهم بيقولوا الخروج علي الحاكم الظالم حرام فده في اعتقادي خللل فيهم ...

    وان شاء الله تتجوز قريب .. وانا بعدك ، وصدقني ان شاء الله لم اامسك الحكم ، ولاد ..... ( برضه مش كلمة ابيحة ) هيتنفخوا وهتشنبروا

    تحياتي

    ردحذف
  5. حبيبي في ناس وصلت 40 و لسة متجوزتش

    ردحذف
  6. سمع هوص (Abo 3li)

    ،

    Sharm



    بس دى يا جماعة مكانتش طموحاتى

    و بعدين أنا ماليش دعوة العرف الفاسد السايد

    أنا ليا بما هو الأصل فى الأشياء

    ردحذف
  7. Sarah Sobhi


    والله يا سارة أنا لو عندى جزء تانى مش هستغلاه عليكى :D

    بس أصلها سلسلة غير متصلة و جوليا و روبرتس زوجين لطاف عادة و حياتهم هادية و إعتيادية فى أغلب الأحيان

    كنت كاتبلهم كذا حلقة كدا زمان لو لقيتهم عندى هحطهمعلطول ورا بعض



    و بعدين مين قال إن طالما فى جزء أول يبقى لازم فى جزء تانى D:

    ردحذف
  8. MR.PRESIDENT


    أى بلد فى الدنيا هى عبارة عن سكانها

    يعنى مصر دى مش هى النيل و الأهرامات و لا الموقع الجغرافى ولا التاريخ


    لإن أنا أكيد مش هتجوز النيل ولا هصاحب الأهرامات و لا هجاور الموقع الجغرافى ولا هزامل التاريخ


    مصر دى هى الناس


    إللى لو كانوا عايشين فى موقع جزر فيجى و مسمين نفسهم المصريين و ليهم نفس الصفات و نفس الحال الكائنة دلوقتى

    كانت هتبقى جزر فيجى إسمها مصر و كانت برضه هتبقى وحشة



    أنا عارف إن فى ناس كويسة و حلوة

    بس النسبة

    النسبة قد إيه فى وسط الوحشين !!!

    مما لا شك فيه عندى إن الأغلبية هى الوحشة

    و الكلام عادة لما بيطلق على وجع العموم بدون تفاصيل بيطلق للأغلبية

    و حتى الحكومة بنت ال(......) ما هى برضه من الناس و إلى الناس و بالناس و على فكرة الكلام إللى ما بين القوسين مش كلام أبيح D:


    و بعدين الصراحة الواحد بقى بيستريح نفسيا و لو قليلا لما بينفس عن غضبه و سخطه و أنا الصراحة الوقاية من الضغط بيحتل قائمة أولوياتى حاليا

    ردحذف
  9. بجد الموضوع رائع جدا

    ولكن اقول ( حسبنا الله ونعم الوكيل )



    اول مرور لى


    نرجو زيارتك الى مدونتى


    وجزاك الله كل خيرا .

    ردحذف
  10. أنا خايف من أعراض الإضطراب النفسى إللى بلاحظها لما ببص للمراية !!
    أنا خايف على دماغى الغالية المتكلفة إللى تعبت كتير فى تربيتها و تسمينها !!

    شوف يا هراء تمالك نفسك واهدأ
    وبلاش الكلام اللى فات
    عشان اللى بيخاف من الجن يطلعله

    بوست ملئ بالصدق
    بس يا صديقى انتبه لزمن القهر الطويل
    الذى عانته الناس لعله يقدم بعض العذر
    لمواتهم وتخاذلهم وسلبيتهم
    ما فقد فى قرون لا يأتى فى سنين
    وحالة الوعى الان احسن من عشرين سنه فاتت
    وكل المخلصين اللى نورونا زمان بكتاباتهم
    صنع بعض الوعى وبعض التغيير فى الافهام
    .......
    والباقى تكمله الاجيال الحالية

    اقدر مشاعرك الفياضة وروح الشباب
    .....
    لا تقلق حتتجوز ان شاء الله ...هههه

    تقبل تحيتى وتقديرى

    ردحذف
  11. ع نوتة


    متشكر جدا ليك


    ***************

    sal


    الحقيقة أنا مقتنع جدا بإللى حضرتك قولته

    بس الحقيقة ساعات بنساه

    متشكر ليك

    ردحذف