إللى أوله هراء أخره هبل

بص يابنى و بصى يابنتى ......

المدونة دى أنا عاملها علشان دماغى ، علشان متجننش ، علشان زى ما هو باين

من إسمها أصرف فيها الشحنات الكهربية و الأفكار و الكلام إللى لو إتحبس 

دماغى هتضرب و أتجنن 

و إنت أكيد ميخلصكش إنى أتجنن ......مش كدا ...

يعنى إنت هنا ــ و أنا معاك برضه متزعلش كدا ــ فى شبكة صرف عقلية 

فأهلا بك فى عالم الصرف و  المجارى و الهراء .......الذى لا داعى له .

الأربعاء، 19 مايو 2010

قوليها بصراحة ....أنا متبرجة




الكلام إللى جاى دلوقتى دا أنا لقيته على منتدى من المنتديات و معاه رابطه الأصلى


طب ليه نقلته ...؟



لإن الصراحة الولد إللى بيتكلم دا قال بالظبط كل إللى كان فى دماغى و إتكلم بأسلوبى


و كأن أنا إللى بعبر .......و بما إن حل المشاكل بيبدأ بنشرها و مناقشتها


فالكلام الحلو دا حبيت أنشره :





حجابي أنيق، الحجاب لا يعني عدم الأناقة، أنا محجبة بس ستايل
الكلمات دي بصراحة -وأنا هكون صريح لأبعد الحدود في كلامي ده- منين ما بشوفها أو بسمعها ببقى خلاص مش متخيل!
معقولة احنا وصلنا للدرجة دي لعدم فهمنا لديننا؟ ولا احنا فاهمين ومش واخدين بالنا؟
أتمنى أي بنت بتقرى الكلام ده دلوقتي تحاول تتغلب على أي وسوسة هتخليها تهرب منه، وتحاول تصبر شوية وتقرى الكلام وتحكم عقلها ودينها، لأني بكلم بالكلام ده كل بنت محترمة وعايزة ترضي ربها
دلوقتي يعني ايه حجاب أنيق وشيك وستايل وووو إلخ؟ايه المقصود بالظبط من الكلام ده؟
أنا قلت إني هكون صريح لأبعد الحدودفلما تكون بنت مثلا لابسة بادي ماسك على دراعها وتقول أنا محجبةأو لابسة جيبة ضيقة أو بتوصف حجمها أو بنطلون وتقول أنا محجبة
يا ترى ده فعلا حجاب؟
ده طبعا غير الإضافات، وكل بنت حسب إضافاتها بقىعطور تلاقيشخاليل تلاقيسبانيش تلاقي (عشان الحلق بس)
يا ترى ده حجاب؟
أنا دلوقتي هسألك سؤالالنبي صلى الله عليه وسلم وصف نوع من النساء قال عنهم: كاسيات عاريات، وطبعا كلنا عارفين الحديثالكاسيات العاريات دول النبي صلى الله عليه وسلم قال عنهم: لا يدخلن الجنة ولا يجدن ريحها!!
يعني بالبلدي كدة: مش هيشموا ريحة الجنة
طيب السؤال بقى: هل انتي لما لبستي الحجاب الأنيق ده تبقي خرجتي من الحديث ده؟خرجتي ازاي تحديدا؟ماهو كاسية عارية يعني لابسة فعلا ولكن لبس غير مطابق لشروط الحجاب
هتقولي: بس أنا فين وغيري فين؟ ده غيري بيلبس حاجات بقى لو شفتها هتعرف إني أرحم بكتيرهقوللك: الفرق مش كبير، لا ده حجاب ولا ده حجاب، اللي لبست إيشارب على لبس عادي مش محجبة، واللي مالبستش حاجة برضه مش محجبة.
لأن اللي بيحدد معنى كلمة "حجاب" هو ربنا، مش احنا هنلبس لبس على مزاجنا ونسميه حجاب، لا هو ربنا اللي قال الحجاب مواصفاته كذا كذا، يبقى أي حاجة غير كدة فهي مش حجاب، صح ولا غلط؟
فنرجع تاني: هل لبسك ده مطابق لشروط الحجاب؟هل البادي اللي ماسك على الدراع والجيبة الضيقة دي لبس مطابق لشروط الحجاب؟
لو مش مطابق بشكل كامل يبقى انتي كدة في خطر كبير جدا، لأنك ما زلتي بتنتمي للنوع اللي اسمه كاسيات عاريات
بصي كدة على اللبس اللي بتلبسيه واسألي نفسك: لما أكون يوم القيامة تعبانة وحرّانة وعطشانة وفجأة ألاقي النبي بيسقي الناس، ولما صدقت هشرب، ألاقي الملايكة بتمنعني وتقوللي لأ مفيش شرب، أقول ليه؟ والنبي يقول ليه؟ الملايكة تقول: عشان غيرت وبدّلت ولبست حجاب غير اللي وصيت بيه، فالنبي صلى الله عليه وسلم يقول ساعتها: سُحقا سُحقا وبُعدا بُعدا لمن بدّل وغيّر.
متخيلة الموقف؟موقف صعب جدا مش كدة؟
متخيلة إن النبي صلى الله عليه وسلم قال عن النوع ده (الكاسيات العاريات): العنوهن فإنهن ملعونات!!
ياه، كل ده عشان شوية لبس وشياكة؟نبيع الجنة بشوية لبس؟؟؟؟ولا هي خلاص الجنة مابقيتش مهمة عندنا؟ولا الشيطان خلانا ننسى إن فيه جنة ونار وجزاء وعقاب؟
اسألي نفسك كدة: ايه اللي مانعني من إني ألبس حجاب صح؟ايه اللي هيحصل يعني لو لبست حجاب صح؟ما اللي يقول يقول واللي يحصل يحصل، هيحصل ايه يعني أكبر من النار؟لو على الجواز، فاللي هيرضى بيا وأنا باللبس ده فهو مش فاهم دينه، وأنا مش عايزة واحد مش فاهم دينه، لأن مش هو ده اللي هيوصلني للجنة، ممكن آه نعيش حياة كويسة، لكن في الآخرة هتكون الحياة ايه؟
يا ترى أنهي الأهم؟اللبس ولا الجنة؟
يا ترى أنهي الأصعب؟

الحجاب ولا النار




http://www.facebook....uid=86154061965

هناك 7 تعليقات:

  1. ربنا يهدي بنات المسلمين ويهدي العاصين
    ربنا يحبب قلوبهم في نصايحك
    امين

    ردحذف
  2. خلص الكلام المنقول

    و الصراحة أنا موافق عليه جدااا



    أنا شخصيا خرجت مؤخرا بإحدى قراراتى العنترية الأخرى

    و هى إن انا مش هتجوز واحدة متبرجة من مرتدى البادى و الكارينا و البتطلون ثم الإيشارب

    و دا بعتبره إسهامى فى حل المشكلة دى على قد حدود قدراتى و طاقاتى البسيطة


    مش عارف دا ممكن يخلى قد إيه من بنات مصر يجيلهم إنهيار عصبى و يكلموا أسامة منير و يضربوا عن الجواز بسبب قرارى

    لكن الصراحة قوة المبادرة الفردية فى إنها بتريحك إنت و تخليك تحترم ذاتك داخليا و تتصالح معاها حتى لو كان تأثيرها مش واضح قدام عينيك

    لكن التأصير التراكمى دايما بيبقى هائل

    ردحذف
  3. بسم الله الرحمن الرحيم
    اولا
    احب ان اشكرك على هذا الموضوع الاكثر من رائعه
    ......
    الواحد بيشوف
    العجائب اليومين دول
    دا حتى النقاب يااخويا
    نقاب مش حجاب
    يعنى غطاء الوجه
    اما الحجاب فلا يغطى الوجه
    المهم
    واحده لابسه نقاب وماسكه فى يد واحد فى الكليه
    ويضحكوا بصوت عال
    طبعا ممكن تقولى اخوها
    لالالا
    مش اخوها
    وانا متاكد
    لان واحده قريبتى معاها فى الكليه
    دى حاجه
    الحاجه التانيه
    واحده لابسى نقاب وبتسمع اغانى وهى قاعده فى الجامعه
    مش مصيبه دى
    بالله
    عليك




    لسه
    هيطلع نقاب على الموضه

    ردحذف
  4. thumps up ya fandem -wa fe qawl a5er- a bow of
    respect

    asl bebasata el 7egab aw lebs el moslemeen 3moman howa (la yasef wa la yashef) we tb3an el mo7agaba momken gedan teb2a style w kol 7aga mn 3'eer matetla3 barra el akwas ::D

    el moshkela hena 7agteen
    el ahl elly bywaf2o yshtero el lebs da
    wel shabab el amoor elly byotlob mn merato aw 5atebto el shakl da

    tb3an msh hatkalm 3al T.V. wel nas el darba mn nogom el mogtama3 la2en el mawdo3 mn el awal mas2olyet el ahl  

    ردحذف
  5. عاوزة اسألك سؤال
    هو في بلدنا الغالية
    ان جه زلزال
    او حصلت مصيبة عامة
    او حصل اي شيء يزلزل انسان بحد عينه وبشكل شخصي
    ممكن اسألك ايه أول خطوة بيعملها وخاصة لو كان عمره ما ركعها؟
    لما تعرف بيعمل ايه اول شيء في بلدنا
    ها تعرف ليه الحجاب كده
    وليه لو اجنبي او اجنبية اعتنقوا الإسلام على كبر بيكونوا اكثر التزاما منا مئة مرة

    تحياتي

    ردحذف
  6. ربنا يهدي جميع بنات المسلمين يارب
    ويهدى الجميع الى ما يحبه ويرضاه

    ردحذف
  7. فعلا حاجة تنرفز
    حجاب ومش حجاب
    نقاب ومش نقاب
    صلاة ومش صلاة
    زكاة ومش زكاة
    حج ومش حج

    انفصام شخصية عجيب

    بجد لو البنت عاوزة تلبس حجاب متبرج بالشكل دة يبقي تقلعه احسن علي الاقل الواحد عيعرف ان دى مش محجبة

    تحياتي للموضوع الهام

    ردحذف