إللى أوله هراء أخره هبل

بص يابنى و بصى يابنتى ......

المدونة دى أنا عاملها علشان دماغى ، علشان متجننش ، علشان زى ما هو باين

من إسمها أصرف فيها الشحنات الكهربية و الأفكار و الكلام إللى لو إتحبس 

دماغى هتضرب و أتجنن 

و إنت أكيد ميخلصكش إنى أتجنن ......مش كدا ...

يعنى إنت هنا ــ و أنا معاك برضه متزعلش كدا ــ فى شبكة صرف عقلية 

فأهلا بك فى عالم الصرف و  المجارى و الهراء .......الذى لا داعى له .

الأربعاء، 20 أكتوبر 2010

هراء مسترسل و كوب شاى





الخميس 21  أكتوبر 2010 

كنت دايما مش مقتنع بفكرة إن الواحد يعمل مدونة 

يعنى إيه يعنى إن الواحد يقتطع جزء خصوصى على النت لسيادته 

علشان يضيع جزء من وقت الناس فى الحديث عن مواقف حياته أو تأملاته أو مشاعره 

ولا حتى عن معاناته من الإسهال أول إمبارح 

و إن لازم يبقى فى حاجة مفيدة أو جديدة أو تستحق السرد و عناء تضيع الوقت 


بس فى الحقيقة هى دى فعلا ألمعية المدونات 

إنك تضيع جزء من وقت الأخرين فى الحديث عن حياتك و أراءك العظيمة فى الحياة 

و إزاى إنت إنسان حلو و شاطر و أمور 

أى هراء .......

بس حلاوته إنه هراءك الخاص 

و على رأى المثل  ( روج لهرائك بثقة .......يشتريه الناس بسعادة ) 

 حتى لو كان الكلام فعلا عن إن عندك إسهال أو ضرسك بيوجهك 


و أنا الحقيقة دلوقتى ضرسى بيوجعنى 

أخيرا

أصبحت التهديدات التى كانت تلمح بها أسنانى على فترات فى وجهى أقصد فى صدغى حقيقة


هاهو أول ألم أسنان حقيقى ربما ينذر بزيارة لطبيب الأسنان



مش إحساس ظريف إن سنانك توجعك

و فى الحقيقة يعنى

مش إحساس ظريف إن أى حاجة توجعك


و أنا ضرسى بيوجعنى و قلبى بيوجعنى وروحى بتوجعنى


ضرسى بيوجعنى و بكره مصر

و مش طايق تواجد الجنس البشرى معايا على نفس الكوكب

و دا دليل على حالة فظيعة من تضخم الذات و إنتفاخ الروح


اه فعلا زى الفسيخ البايظ كدا


أحس بإنتفاخ و إمتلاء

ربما يعلق بعض المتحذلقين أنه بسبب زيادتى فى الوزن

و لكنى أقصد الروح و النفس لا الجسد و البدن



أشياء قليلة هى التى ما زالت تعنى لى شيئا


سأم و ملل و تشيؤ عاطفى و تصحر معنوى و قفر حسى


مصحوبين بإنتحار فكرى بطييييييء


و إنهيار أخلاقى متموج مثل الحمى المالطية على ما أذكر إن لم أكن مخطئا

ياللإستطردات


أى هراء هو ذلك



تبا و سحقا بل و اللعنة أيضا


ليست خطا ولا سطرا ولا طريقا

بل إنها حتى ليست دائرة

إنها ...إنها ....

إنها شيئا يشبه العقل

فالعقل مساراته متشابكة و صعبة الوصف و هى كذلك

فهى نتاجه


عما اتحدث ؟!

لا دخل لكم

إنه هراء مسترسل

و قد إحتار العلماء من قبل فى تحديد ما إذا كانت الأحبال الصوتية قد

نضجت كإستجابة صوتية لنضوج مسارات العقل

أم أن مسارات العقل قد نضجت إستجابة لنضوج الأجبال الصوتية




هل صحيح

أن العقل التجريدى هو أصل حضارة الإنسان ؟

هل التجريدية مهمة لهذا الحد ؟


إذا فعقل الطفل هو عقل مصور  و عقل الناضج هو عقل يتجه للتجريد كل حسب درجاته 


إذا فالتلفزيون و السينما و غيرهم يرتدون بنا لمرحلة الطفولة الجماعية كما حذروا


لن أستعجب فنحن نحبو و تسيل سوائلنا اللزجة من أنوفنا و أفواهنا رغم التقدم فى السن



( قصة قصيرة )

ذهب محسن إلى السوق ليشترى بعض البرقوق ...فلم يجد أحدهم يبيعه فعاد لمنزله دون أن يشترى

( تمت )


بيقولوا إن تحول الإنسانية على يد المصريين و السومريين إلى مرحلة الكتابة من حوالى 6000 سنة كانت نقلة نوعية و مرحلية فى مسيرة تطور البشرية
لإن هو دا التجريد

إنك تجرد الصورة الذهنية إللى عايز تعبر عنها أو الصوت إللى عايز تقوله و تختصره و تختذله و تهشتكه و تبشتكه و تدلعه و ـ تجرده ـ على هيئة رمز معين مخصوص ليه على ورقة بردى أو صخرة أو لوح طين نصف مجفف من طين الفرات

و بالتدريج توغلت اللغة فى التجريد و قلت الصور و الرسومات فيها لحد ما وصلنا لمرحلة الحروف

و كل دا كان إختصار و تجريد


حتى لغة الكمبيوتر و البرمجة إللى بنستخدمها دلوقتى ما هى إلا مرحلة جديدة من التجريد و الإختصار



( قصة قصيرة سخيفة )

كان بهاء سلطان جالسا يواسى إبراهيموفيتش عندها دخل محمد و سألهم عما بهم فطفق بهاء يغنى شارحا الموقف فى أغنية تتحدث عن أن الواد قلبه بيوجعه و يريد أحدهم أن يدلعه
و فجأة خرج الكورال من خلف الستار مكونا من مجموعة من الرجال و الفتيات تظهر عليهم ملامح المرح و الحمق و الصفاقة
ليكرروا وراءه فى تناغم جميل و هم يصفقون
إندهش إبراهيموفيتش كثيرا ثم قرر أن يقوم و يتحزم و يرقص !!

( تمت )



و لكن مش دايما الإختصار حلو

لأاااااااااااا

إيه الغباء دا

بعض الأشياء إختصارها بيؤدى لضياعها 

لأ مش بعض

أغلب



ااااااااااه


ضرسى بيوجعنى

مش لازم أشرب شاى

على فكرة الإنجليز دول شعب عجيب جدا !!!

اه والله من الشعوب المثيرة للإهتمام

و على فكرة كمان

عندى إعتراف خطير


القرن التسعتاشر هو قرنى المفضل


اااااه


شربت شاى تانى


مش لازم أشرب شاى

مش لازم أنزل البير

مش لازم تنزل فى الزحمة

مش لازم تعيش فوق السطح

مش لازم أقتل الواد إبن الجيران الصغير جزاء وفاقا على مضايقاته

مش لازم يبقى فى لازم أو حتى مش لازم

مش لازم أشرب شاى

قولت كدا قبل كدا

مش لازم نقول كل دا

هو مين قال كدا ؟



( رسالة إلى ضرسى )

ضرسى العزيز ....

تحية طيبة و بعد

نود أن نوجه عناية سيادتكم إلى أنه لو أوجعتنا مرة أخرى لنزعلن منك

كتير خالص أخر حاجة ، و لسوف نسميك بالوحش الكخة و لن نكلمنك بعد

اليوم ، كما نخبركم بأن زوجتك و الأولاد بخير و يبعثون إليكم بالقبلات

تحياتى لجميع من عندك من البيض الفتاكين .



مصلحة البريد \ قسم الأرشيف \ خطابات لم يستدل على عنوانها





( قصة قصيرة أكثر سخافة )

فتح فوزى الكتاب عند الصفحة التى توقف عندها بالأمس ففوجيء بأن الصفحة بيضاء تمام خالية من أى كتابة ، فقلب الصفحة التالية ووجدها
ليست أحسن حالا ، و كذلك كانت الصفحات الماضية و القادمة

مما جعله يطلق تنهيدة إرتياح ..... فلم يكن يعجبه هذا الكتاب على أى حال

( تمت )



هذا الهراء المسترسل مثل إسهال (الجارديا لامباليا) تعنيته صعبة

إنتهى كوب الشاى أيها الضرس الأحمق ... توقف عن الألم

هناك 10 تعليقات:

  1. روح يا شيخ ربنا يسامحك
    انا تهت بجد
    بس الحقيقه الوحيده اللى بشاركك فيها
    ان انا ضرسى بيوجعنى زيك بالضبط
    و الموضوع زاد اما قريت البوست
    روح يا شيخ منك لقسم الدرب الاحمر
    و مفيش سلامو عليكو

    ردحذف
  2. ممكن أحط خريطة على أول البوست D:


    بالنسبة للضرس فبلاش تشربى عليه شاى

    ردحذف
  3. ع فكره انا قررت قررت ان اجبلك دوا للاسهال الفكري دا و غالبا هتكون فله او سده عشان نخلص من ال ستول بتاعك دا :S ‏

    ردحذف
  4. فلتطلق العنان لاسهالك الفكرى يا عزيزى

    ردحذف
  5. احمد

    http://www.gethandbag.com/images/186-an-idiot.gif

    ردحذف
  6. hhhhhhhhhhhhhhhhhhhhhh
    mawdoo3 mofeeeeeeeeeeeeed gedan 3all fekra we fhamt 2sadk ya ghallab

    ab2a 7ywana law da5lt el mdowana de tany

    ردحذف
  7. ana mo7mmed ebn 5alak ya ghallab

    ردحذف
  8. بالتوفيق
    تقبل مروري

    ردحذف
  9. اعتذر عن تأخر التهنئه بالعيد لعطل بشبكة النت بالمنطقه التي اسكن بها
    خالص تحياتيِ

    ردحذف