إللى أوله هراء أخره هبل

بص يابنى و بصى يابنتى ......

المدونة دى أنا عاملها علشان دماغى ، علشان متجننش ، علشان زى ما هو باين

من إسمها أصرف فيها الشحنات الكهربية و الأفكار و الكلام إللى لو إتحبس 

دماغى هتضرب و أتجنن 

و إنت أكيد ميخلصكش إنى أتجنن ......مش كدا ...

يعنى إنت هنا ــ و أنا معاك برضه متزعلش كدا ــ فى شبكة صرف عقلية 

فأهلا بك فى عالم الصرف و  المجارى و الهراء .......الذى لا داعى له .

الثلاثاء، 1 يونيو 2010

هانى يكتئب

ـــــ صباح الخير يا بابا

= صباح الخير يا هاني يابني .....إيه ! إنت لسا قاعد في البيت ليه لحد دلوقتي ....مرحتش كليتك ليه ؟

ـــــ إحم .....لا يا بابا.......... الصراحة أنا مش رايح الكلية النهاردة

= هتريح يعني النهاردة .......... و ماله برضه .....مفيش مشاكل لازم برضه الواحد يريح يوم كدا كل فترة

ــــ لا يا بابا الحقيقة أنا مش هروح الكلية لا النهاردة ولا بكرة

= إزاي يعني ....! ..... هتريح فترة يعني ؟

ــــ لا يا بابا الصراحة أنا ناوي مروحش الكلية تاني خالص

= كلام إيه دا ياهاني ؟ ليه حصل إيه ؟

ـــــ الصراحة يا بابا أنا خدت قرار و أتمني إن حضرتك توافقني عليه

= قول يابني قرار إيه ؟

ـــــ أنا ................. أنا قررت أكتئب و أقعد في الييت يا بابا

= بجد يا هاني .....؟.......... طيب يابني و مكسوف ليه بس ؟ ......... هي دي حاجة وحشة
هو أنا فديك الساعة لما تكتئب ......دا يوم المني لأي اب في الدنيا يابني ........و بعدين دا الواجب إللى لازم أى واحد من جيلكم يعمله .............يأم هاني ...... يأم هاني...... تعالي

# أيوة يا أخويا جاية أهه ...خير يا أخويا في إيه ؟

= إبنك هيكتئب يأم هاني

ـــــ و النبي يابني ؟..........بجد يا هاني بجد ؟............ لولولولولولولي .......... يا ألف نهار أبيض
لولولولولولي ....تعالي في حضني يابني ..........

= يا سلام يا هاني .....متعرفشس يابني أنا فرحان و فخور بيك قد إيه دلوقتي

# و النبي يا هاني يابني أنا حلمتلك حلم يارب يكون من بختك و نصيبك .....
.حلمت كدا خير اللهم أجعله خير إنك بقيت مكتئب و حالتك النفسية زي الزفت

ـــــ يسمع من بقك ربنا يا ماما

# يارب يابني .....يالا بقي قوم يالا علشان تتغدا إنت و أبوك أنا عاملالكم فراخ بالأرانب زي الفل

ـــــ اه ...لأ معلش يا ماما مش هقدر أكل معاكوا .........إنتي عارفة بقي إن انا مكتئب و لازم أخش أنعزل
في أوضتي و ماكلش ....

# يوه ....معلش يابني نسيت تقاليد الإكتئاب .......ماشي يا حبيبي ربنا يوفقك

= تحب نقفل عليك من برا ولا حاجة

ـــــ لا بلاش إنت عارف يعني يا بابا ممكن أحتاج الحمام و لا حاجة ..........كون إن أنا مكتئب ميمنعش حاجة زي دي

= ماشي يابني أدخل إنت أوضتك إكتئب كويس و إحنا هنروح ناكل و نتفرج علي التلفزيون

ـــــ ميرسي جدا يا بابا ............




( تمت )

هناك 6 تعليقات:

  1. الف مبروك ..
    الف مبروك ..
    الف مبروك ..

    بس علي فكرة مبقتش حاجة جديدة .. يعني مصر يجي فيها دلوقت 70 أو 75 مليون واحد دماغة مش في راسه

    وقدام الأسرة مبسوطة نديها تحيه عالمية ..

    سلمت الأنامل

    ردحذف
  2. انت راجل موهوب
    خسارة فيك الاكتئاب
    خلص اكتئابك بسرعة وخلينا نشوفك على طول
    تحياتى

    ردحذف
  3. والله فكرة نميسة
    وأهو يا بخته ياخد مضادات الإكتئاب اللي بتنيم
    يابخته
    يابخته

    ردحذف
  4. اكتئب و انبسط يا هانى
    ^-^

    ردحذف
  5. يابن المحظوظة ياهاني.... عندك اب وامن متفتحين... وبيشجعو علي الاكتئاب ... اسرة متنورة بصحيح...
    يبختك ياهاني...

    ردحذف