إللى أوله هراء أخره هبل

بص يابنى و بصى يابنتى ......

المدونة دى أنا عاملها علشان دماغى ، علشان متجننش ، علشان زى ما هو باين

من إسمها أصرف فيها الشحنات الكهربية و الأفكار و الكلام إللى لو إتحبس 

دماغى هتضرب و أتجنن 

و إنت أكيد ميخلصكش إنى أتجنن ......مش كدا ...

يعنى إنت هنا ــ و أنا معاك برضه متزعلش كدا ــ فى شبكة صرف عقلية 

فأهلا بك فى عالم الصرف و  المجارى و الهراء .......الذى لا داعى له .

‏إظهار الرسائل ذات التسميات المجتمعات المجنونة ...لا تعرف إنها كذلك بالفعل. إظهار كافة الرسائل
‏إظهار الرسائل ذات التسميات المجتمعات المجنونة ...لا تعرف إنها كذلك بالفعل. إظهار كافة الرسائل

الثلاثاء، 14 ديسمبر 2010

( النظام العالمى لحياتكم الأمورة )







تعالوا يا ولاد لما أشرحلكم النظام العالمى الحالى


إنتوا غلابة و تستاهلوا تفهموا


( الكلام دا ينطبق على العالم كله مش على بلدكم مصر بس .....الفرق الوحيد هو فرق نسبى
و درجات صعودا و هبوطا فى سوء الوضع بين كل دولة و التانية و كل شعب و التانى )



بصوا ......



العالم دا مقسم ل3 طبقات رئيسية بتنقسم فيما بينها لعدة شرائح فرعية




الطبقة الأكبر عددا :

هى الطبقة الوسطى

إللى هى إحنا يعنى و أهالينا


و دى الطبقة إللى بتقوم بكل العمل و بتقبض فلوس قليلة

يعنى طبقة الدكاترة و المهندسين و المحاميين و المحاسبين و المدرسين و حتى التجار الصغيرين

و المتوسطين

( الطبقة البرجوازية يعنى ) و الكلمة دى معناها الإيتمولوجى ( يعنى الأصل اللغوى )

بمعنى مدنى أو مدينى ...يعنى من سكان المدن

لإن كلمة برج ( BURG ) كانت عند الأوروبيين بمعنى مدينة



الطبقة دى بتعمل عدد ساعات كتير يوميا

و حياتها كلها عبارة عن دوامة شغل لا تنتهى

و فى المقابل بتحصل على قدر مادى كافى إنها تعيش حياة زى حالتها ما بتقول ـ متوسطة ـ

مع إختلاف شرائح و درجات هذا التوسط طبعا

و الطبقة دى هى عماد المجتمع الحقيقى و قلبه و قوامه

و هى المكنة الإنتاجية الرئيسية فيه





بعد كدا


الطبقة الدنيا أو الكادحين

و دول بقى ملح الأرض زى ما التعبير الأوروبى بيقول

بيجوا فى الترتيب من حيث العدد بعد الطبقة المتوسطة


و دول بيحصلوا على أقل قدر ممكن من الماديات و الغير كافية فى أغلب الأحيان
لعيش حياة كريمة




أخيرا .....



الطبقة الحاكمة

و دول ملاك العالم الحقيقين و أصحاب الكوكب


و دول عددهم قليل جدا مقارنة بالطبقتين التانيين

و رغم ذلك فإحنا كلنا ساكنين عندهم بالإيجار فى كوكبهم الجميل



و رغم ذلك فوجودهم و ثرواتهم و إستمرار طريقة حياتهم معتمدين على الطبقتين التانيين



و علشان نبقى واضحين

فالطبقى الحاكمة دى مش مقصود بيها الحكام و الرؤساء و الحزب الوثنى و حزب العمل و الديموقراطيين و الجمهوريين و الكونجرس و هذا الهراء بس


لأ


السياسيين و الرؤساء دول مجرد عرايس لعبة و واجهة بيتخفى وراها الحكام الحقيقين للعالم




حاجة كدا بتترمى قدام الجموع و الشعوب علشان تتلهى فيها

تقوم بعض الشعوب ـ إللى عندهم ديموقراطية ـ تعتقد إنها بتختار بحريتها
و البعض الأخر ـ زينا كدا ـ ينشغل فى الحصول على حريته


و دول ينشغلوا فى دول و دول يتخانقوا مع دول بينما أصحاب الضيعة منشغلين
بالتمتع بثرواتهم و قوتهم و نفوذهم و سيطرتهم



مين بقى ملاك العالم

دول زى أصحاب الشركات الضخمة العابرة للجنسيات
زى المنظمات السرية ( المافيا ـ الماسونية ـ منظمات الجاسوسية )


دول ناس فوق الحدود و فوق الدول و فوق الرؤية






إذا ....الطبقة الحاكمة بتتكون من :

1 ) هؤلاء الذين يحكمون العالم بشكل فعلى
2 ) و بعد كدا أنظمة الحكم إللى بتسمع كلامهم ـ و دا بينطبق على أغلب أنظمة الحكم و الحكومات فى العالم حاليا ـ
3 ) و بعد كدا الأغنياء المستفيدين






كدا عندنا 3 طبقات



يبقى بإختصار

* الطبقة المتوسطة ....تقوم بكل الأعمال و تحرك عجلة الإنتاج و تحصل على مقابل بسيط
* الطبقة الدنيا ..... موجودة لإخافة الطبقة المتوسطة الأمورة إللى بتخاف على عربياتها و وظايفها و مرتباتها و على مدارس ولادها الخصوصى من الرعاع بتوع الطبقة الأقل

و بالتالى ...
فمن الضرورى بالنسبة للحكام خلق فجوة إقتصادية و فكرية و إجتماعية بين الطبقتين للحفاظ على حالة من الصراع الدائم بين الإتنين

و بالتالى ...

ـ أولا : عمرهم ما يتحدوا أبدا فى مواجهة الطبقة العليا إللى بتتحكم فى فيهم و واخدة ثرواتهم
ـ ثانيا : تفضل دايما الطبقة المتوسطة ـ و خلى بالكم دى الطبقة إللى بتدى الأصوات فى الإنتخابات بالنسبة للدول الديموقراطية و هى برضه الأكثر قدرة على صنع الثورات و الثروات فى الدول إللى محتاجة ثورة ـ فتفضل دايما الطبقة دى مزروع فى ذهنها فكرة مفادها إن لو أنظمة الحكم رفعت إيديها الرعاع هياكلونا و إن وجود الطبقة الحاكمة دى و إحتفاظها بسلطات و قوى متزايدة شيء مهم جدا لردع الرعاع عننا و عن عربياتنا الحلوة و بيوتنا الأمورة و لبسنا الشيك حتى لو كان فيه إنتقاص من حرياتنا أو هضم لحقوقنا و حقوق الفقراء إللى إحنا حاطينهم تحت رجلينا و بيغسلولنا العربيات و بينفضولنا السجاد و بيقولونا مع السلامة يا بيه و إحنا رايحين الشغل الصبح



* الطبقة الحاكمة

زى ما قولت كدا هى عبارة عن مجموعة الشرائح بتبدأ بالأغنياء و كبار التجار و رجال الأعمال و غيرهم من المستفيدين
ثم الحكام و السياسيين
ثم أخيرا ....
حكام العالم الحقيقين إللى مش بيظهروا فى الإعلام و لا حد يعرف بوجودهم






و لكن ....

الطبقة الحاكمة دى ـ بشرائحها الرئيسية الثلاثة ـ عندها مشكلة خطيرة دايما دايما و من أقدم عصور التاريخ و من أول بدء التجمعات البشرية وهى بتؤرق أجفانهم الجميلة و تاعبة أرواحهم الرقيقة


و هى ....

إن ببساطة شديدة عدد المحكومين ـ إللى هما الطبقتين الأولانيين ـ أكتر و بفرق شاسع و ضخم من عددنا ـ الطبقة الحاكمة يعنى ـ


و لو المحكومين دول أدركوا الحقيقة دى و لو أدركوا إللى إحنا بنعمله فيهم و إن إحنا متمتعين بثروات الكوكب على حسابهم و مش بس كدا

دا إحنا بنعاملهم معاملة حيوانات المزرعة ( بنخليهم هما يشتغلوا و يقضوا حياتهم فى تعب و نصب و إحنا فى الأخر إللى بنحلب اللبن و بناكل من لحمهم و بنام على الفرو )

و لو فهموا الحقيقة البسيطة المفزعة دى

هياكلونا بسنانهم


نعمل إيه ؟؟؟؟؟




السؤال المحورى دا


إجابته هى إللى بتحدد شكل العالم من زمان و لحد دلوقتى



( زمان )

كانوا بيعملوا حاجة لطيفة قوى

يقولك إيه ؟



يا جماعة ..... يا شعب .....


فى ألهة فى هذا الكون خلقتنا و خلقت الأرض .....حلو كدا ؟

= حلو

و الألهة دول يا جماعة لو زعلوا مننا ...هتبقى سنتنا طين ...حلو كدا ؟

= حلو


طيب ما إنتوا حلوين أهه ...يالا بقى إحنا هنبقى الكهنة بتوع الألهة و هنضحى برفاهيتنا و وقتنا علشان نخدم الألهة علشانكم علشان متزعلش منكم و إنتوا كل إللى هتعملوه هو إنكم هتشتغلوا طول السنة و هتتعبوا و هتجيبولنا قرابين و أكل و لبس و فلوس علشان نقدمهم للألهة ...حلو كدا

= حلو

و على فكرة كمان ..... شايفين الراجل إللى هناك دا ....دا هيبقى الحاكم إللى هيمشى أموركم الدنيوية و على فكرة هو إبن الإله أمون و طاعته واجبة مهما قالكم و مهما كان فاسد و بايظ و ظالم و إبن كلب علشان بس أمون ميزعلش و هنحطه قدامكم كدا برافان و عروسة علشان يسيطر عليكم و العجلة الإنتاجية و المجتمعية تمشى ، لكن برضه إحنا إللى هنبقى مسيطرين عليه فى الواقع حتى لو مكانش هو فاهم كدا و لو حاول يخترع أو يحركنا من مكانتنا الجميلة دى هنقلشه و نطلع عينه زى ما عملنا كدا مع إخناتون لما قل عقله معانا ....حلو كدا


= حلو





( دلوقتى )

إللى كان بيحصل زمان هو إللى بيحصل تانى دلوقتى بس مع إختلاف الطرق و الألوان لكن الهيكل الفكرى الرئيسى ما زال ثابت


و بما إن العالم دلوقتى أصبح قرية صغيرة

فأصبحت عملية السيطرة الفكرية دى أسهل بكتيييير عن الأول


كل إللى محتاجه


1 ) هو إنك تبنى للعوام نظام تعليم نقاوة

إزاى

نعلمهم بحيث يبقى عندهم الحد الأدنى من العقل و الذكاء و الثقافة و المعرفة إللى يكفيهم إنهم يشغلوا المصانع و الشركات بتاعتنا و المستشفيات و المحاكم و البنوك ـ بتاعتنا برضه :D ـ ...إلخ

علشان دورة راس المال تدور و الحياة تستمر

لكن حذارى إن نظام التعليم يبقى متطور بشكل كافى إنهم يتعلموا التفكير النقدى أو الحر أو الإبداعى أو إنهم يتعلموا يبصوا خارج الصندوق أو خارج الإطار إللى إحنا حطيناهم فيه


2 ) رضاعة التسلية :

الجموع دى لو متسلتش و لو مديتهاش سهاية فى بقها علشان تنام .....هتفتح عينها و تشوف و دا خطر علينا
إعملهم أفلام و سينما عالمية و محلية تملا دماغهم بأفكار متعلقة كلها بالماديات و المتع الحسية و بتنمى عندهم المشاعر الطبقية و النرجسية و النزعات الفردية ، طلعلهم جرايد بتقولهم إللى إحنا عايزين نقوله ، إعملهم دوريات كورة عالمية علشان يتخانقوا و يتحزبوا عليها ، إعمل من الهايفين و الرقاصين و حثالة البشر نجوم مجتمع ، نمى ثقافة الإستهلاك و الشراء عندهم بحيث الأجور الزهيدة إللى بياخدوها مننا يروحوا يشتروا بيها بضايعنا إللى هما بينتجوها فى مصانعنا و شركاتنا بحيث تزيد ثرواتنا ـ إللى هما بيصنعهولنا ـ و كمان نمنع تراكم رؤوس الأموال عندهم بحيث ماينفسوناش فى عملية الإنتاج أو يبقى عندهم وقت للتفكير و إللى هو أخطر شيء علينا و لازم نحاربه بكل الطرق ، إعملولهم بلاى ستيشن و فيس بوك و كنتاكى و كوكاكولا و مسابقات فى التلفزيون

إعملوا كل حاجة من شأنها تملا دماغهم بالترهات و الهراء الفارغ إللى بيخلى عقل صاحبه زى كيس القطن


3 ) إنحسار الأديان :

الدين دا شيء خطير ممكن يكون اداة بناء و ممكن يكون أداة هدم

حاربوا الأديان و دمروها
و إللى متقدروش تدمروه سيطروا عليه من جوة و فرغوه من معناه

خلوا أتباع الديانات ينقلبوا ضد أديانهم و يحاربوها و يعتقدوا إنها هى المسئولة عن أوضاعهم المزرية و إن حياتهم من غيرها أفضل ـ و إللى زى دول بالمناسبة ياريت تحطوهم فى المراكز الكبيرة و فى طبقات النخب و المشاهير علشان يبقوا قدوة للجموع ـ
و إللى هيتمسكوا بالدين خلوهم ميفهموش معنى الدين إللى بيتبعوه أو هدفه إيه بحيث يبقى الدين فقد هدفه







و بالتالى هنعيشهم فى ماتركس كبيرة قوى

و لو حصل و كان فى فلتات و شواذ عن هذا الإطار العام للماتركس إللى عيشناهم فيها و طلعلنا ناس بتعرف تفكر و بتفهم

هنعرف نتصرف معاهم بطرق كتير

* إما نقضى عليهم و نستأصلهم قبل عدواهم ما تنتشر
* أو نقول للناس إنهم مجانين و الإعلام بتاعنا هيساعدنا فى كدا
* أو لو كانوا هيفيدونا و عندهم إستعداد للتعاون مفيش مانع نضمهم لينا فى شريحة المستفيدين



و بكدا يا ولاد نفضل مسيطرين على هذا الكوكب و على سكانه الحمقى






نخبكم يا رفاق ....


نياهاهاهاهاه

نياهاهاهاهاهاه

نياهاهاهاهاهاهاهاه

الأربعاء، 9 يونيو 2010

أنا جيت من الكلية يا ماما





الأربعاء 9 يونيو 2010


النهاردة إمتحنت مباديء إقتصاد سياسى

الإمتحان كان لطيف و حلو
حليته و طلعت أول واحد فى اللجنة إستمرارا لعادة محافظ عليها من أيام طب بيطرى الله يرحمها

***********



الحقيقة من واقع مشاهداتى لطلبة كلية حقوق

بناتا و ولادا

فحوالى خمسة و تسعين فى المية منهم ميستحقوش يتعلموا أصلا


الولاد دول يروحو يشوفولهم صنعة ولا حرفة يتعلموها علشان ميطلعوش صيع و عواطلية و قوة إستهلاكية إضافية للمجتمع
و علشان ميلاقوش وقت يعملوا فيه شعرهم سابيكى و يلبسوا بنطلونات متسقطة و يجمعوا نمر بنات على موبايلاتهم

و البنات دول أحسنلهم فعلا تقتصر مهمتهم فى الحياة على إنهم يتجوزوا و يخلفوا عيال و بس ........ لإن الصراحة أنا مش شايفهم مؤهلين لأى حاجة تانية غير كدا فى الحياة


و هما كمان تقريبا مدركين النقطة دى لإن شكلهم و تصرفاتهم بتقول إن مفيش غير كدا فعلا فى دماغتهم

و ياريت ميربوش العيال بنفسهم كمان .....علشان العيال متبوظش



العيال دى يدوبك تاخد إبتدائية علشان تفك الخط و بعد كدا يتحرم عليهم التعليم ...المفروض يعنى



لو رميت كل النسبة دى

هتوفر نفقات تعليم حكومية و كمان نفقات أهالى

و هتزود الإنتاج بزيادة اليد العاملة فى الأعمال اليدوية

و هتخرب بيت شركات الميك أب و مصانع البدى الكارينا و الطرح الملونة



و أخيرا ....

هتفسح مجال لنسبة 5 % فقط من الولاد و البنات إللى فعلا يستحقوا يتعلموا قانون و إللى يشيلوا مصير السلطة اقضائية فى الوطن

و ساعتها هيتعلموا كويس
و مش هيختلطوا بالناس التانية ولا ياخدوا من أخلاقهم

و هيبقى عندك فعلا خريجين بحق و حقيق ....يستحقوا يتعلموا و يستحقوا يشتغلوا و يستحقوا يبقى عندهم شهادة عليا تتعلق فى الصالة بدل ما تتعلق فوق البوتاجاز


الصراحة أنا شايف إن الكلام دا برضه بينطبق على باقى الكليات المصرية


يمكن فقط بإختلاف النسبة إللى المفروض تترمى برا النظام التعليمى بين الكليات النظرية و الكليات العملية


و دا مش لحاجة برضه أكتر من الوضع الإقتصادى الغريب إللى خلى الكليات العملية تحظى بأفضل العقول المتاحة لإن مستقبلها أحسن و لإن الشاب و البنت المصرية بيختاروا كليتهم على حسب التنسيق و حسب رغبات و إختيارات المجتمع العقيم المحيط بيهم مش بالرغبة و الميول و الطموح و التفضيل

بينما الكليات إللى بتعتمد أساسا على الفكر و الخيال زى أداب و حقوق و تربية

أصبحت فى قاع السلم و بتستقبل نوعية عقول عجييييييييبة علشان مستقبلها وحش و تنسيقها أقل





من ناحية تانية برضه ...تيجى تبص

تلاقى إن العيال دى برضه معذورة

ما هو إحنا مش نفضل ننقد فى الشباب و نقطم فيه وخلاص

يعنى إنت أى مشروع فى العالم إنت لازم تديله معطيات in put علشان يديلك مخرجات out put

فين بقى المعطيات إللى إنت إديتهالهم ؟؟

قولى كدا العيال دول إتربوا على إيه ؟؟؟

سعاد حسنى ، حسين فهمى ، نانسى ، هيفا ، تامر

أغانى، أفلام ، هيافة ، عبط ، هبل ، قرف ، زفت

هراء فكرى .....

هراء فكرى و نفسى و إجتماعى ملينا بيه أوراحهم من صغرهم




دا غير إنه تعرض لتربية قمعية و تسلط فوقى مدى حياته

فى البيت سلطة مش محدودة بحدود العقل و إللى الدين أمر بيه

فى الشارع سلطة عسكرى

فى المدرسة سلطة مدرس

فى الجامعة سلطة دكتور


كلها سلطات لا محدودة ...و غير منظمة ...و الغلط مش فى وجودها لكن فى سوء توجيها و مقدارها


مش عارف بقى أنا سوداوى و دماغى تعبانة فعلا
ولا فعلا إحنا معدناش بنعرف نربى

لا عارفين نربيهم شرقى ولا غربى

لا ربيناهم زى ما الدين قال إزاى نربى

ولا ربيناهم زى ...ما الغرب الناجح عرف يربى



نبتة جميلة خضرا صغيرة
إنت سقيتها نفايات نووية

لا تشتكى إذن عزيزى حينما تتحول لمسخ بشع الهيئة سيء التصرفات



العيال دى كان المفروض يحصلوا على تربية نضيفة و أكل نضيف و تعليم نضيف و معاملة نضيفة ......

ولما يوصلوا سن البلوغ بتاع الكائنات الحية الطبيعية إللى عندها دم و بتحس نجوزهم علشان ميقعدوش مع بعض على سلالم الكلية ثنائيات و شلل نرجع نلومهم عليها و نقول شباب قليل الحيا



فعلا بلد غبية و مقرفة ولا عقلانية .....و بتاعة مجانين .


الشباب دا هو القوة المحركة ، هو الروح فى الجسد ، هو كل حاجة نضرة و حلوة و جميلة سواء فى حياة الإنسان أو فى حياة الأمة


إحنا ببراعة حولناه لفترة ممسوخة ، مشوهة ، معطلة ، وقت ضايع فى حياة الشاب المصرى






أنا بحبك يا أستراليا ..........





السبت، 5 يونيو 2010

كل نكسة و أنت بخير





5يونيو 1967




الأعزاء المصريون ..........



كل نكسة و أنتم طيبون

الاثنين، 3 مايو 2010

هوهوهو


ــ هو

=هو

ــــ هو هو هو

= هو هو

ـــ هوهوهو...هوهو...هوهوهوهوهو

=هوهو

ـــ هوهوهوهوهوهو..........هوهوهو....هوهو....هوهوهوهوهوهوهوهوهو

=هوهوهو....هوهوهوهو.............هو

ـــ هوهوهوهوهوهوهو.......هوهوهوهو....هوهوهوهو....هوهو....هووووووووووووه

=هوهو

ـــ هو...هوهوهو...

= هوهوهوهوهوهوهو.....هوهوهوهوهوهوهو............هوهوهوهوهوهوهوهوهوهو .....

ــــ هوهوهو

= هوهو

ـــ هوهو

= هو

ـــ هو

الأربعاء، 17 فبراير 2010

الضحية ...و تكريس أسلوب حياة الجلاد

من حماقة الضحية إنها تكرس و تكثف ال life style بتاع الجانى عليها

و دا إللى شعوبنا بتعمله


عمليات الإحتلال عاملة زى التفاعلات الكيميائية كدا

مادة بتختلط مع مادة

و إحداهما بتتطغى على الأخرى و بتديلها صفاتها المظهرية و بتغير فى تركيبها الكيمائى


كذلك الإحتلال ...

أولا :

مرحلة الإختلاط بين الثقافتين المحتلة ــ بضم الميم ــ و المحتلة ــ بضم الميم برضه ــ شوف الصدفة القوية الكلمتين ليهم نفس التركيب و كمان نفس التشكيل لكنهم بيدلوا على نقيضين بينهم بون شاسع ــ بون يعنى مسافة كبيرة مش تذكرة مطبخ المدينة ــ

الأولى بتعبر عن الشعب القوى إللى ساد الأخر
و التانية بتعبر عن الشعب إللى تم إحتلاله


نخرج مرة أخرى من سلسلة الإستطرادات تلك عائدين إلى المرحلة الأولى و هى مرحلة رفض الثقافة الجديدة المفروضة على المغلوب على أمره بحكم إن المنتصر ــ فى الغالب بيمتلك من الأدوات و السلطات و التهيئة النفسية ــ لفرض ثقافته على المهزوم

و فى المرحلة دى بتتعرض ثقافة المهزوم لنوع من الإنتكاسة الداخلية و المراجعات الداخلية مع إستمرار الرفض التام لثقافة الأخر بدون دراستها

و علشان نسهل الكلام

هضربلكم مثال بإللى قاله المؤرخين عن الإحتلال الفرنسى لمصر

كان دا أول إختلاط على شكل إحتلال بين ثقافة المسلم المصرى مع ثقافة أوروبية غريبة تماما و مختلفة أشد الإختلاف

و فى أول الأمر قابلها المصريين بالرفض التام و الأنفة ــ ونقصد هنا ...إنه رفض الثقافة الفرنسية و طريقة معيشتهم ..مش الإحتلال بس لإن الإحتلال تم قسرا ــ لكن فى نفس الوقت بجوار حالة الرفض دى بدأت تحصل مراجعات داخلية بين المهزومين و بدأوا يدركوا الحقيقة المرة و هى إن الغرب الكافر الحايد عن الجادة قد تفوق فى كل المجالات العسكرية و الفكرية و الأدبية و العلمية على الشرق المسلم ذو العقيدة الصحيحة

و كل المؤرخين بيتفقوا إن مرحلة الهزيمة النفسية و التبعية الثقافية للغرب بدأت بالإنكسار النفسى الناتج عن الحملة الفرنسية


دا كان مجرد مثال و بيحصل لكل الأمم بإختلاف ديانتها و مكانها

و مع بداية الإنحدار النفسى بنبدأ ندخل فى المرحلة التانية :

مرحلة الإمتصاص و التشرب لثقافة الأخر :

و الدوافع هنا عديدة و بيشترك فى إحداثها كلا من الطرفين

فالمنتصر بيحاول يمرر ثقافته و فكره للأخر لتسهل قيادته و يقل رفضه و مقاومته

أما المهزوم فيفعل ذلك مدفوعا بحاجتين :
ــ إنبهاره بذلك الطرف القوى المنتصر
ــ محاولة تعويض ما فاته و اللحاق بالركب

و برضه للتقريب أعتقد المرحلة دى مرينا بيها فى الفترة ما بين عهد الخديوى إسماعيل لحد دستور 1923


تيجى بقى المرحلة الثالثة :

محاولة الخلط :


بيغلط المتلقى ثقافيا و يسيء تقدير الأمور و بيفتكر إنه ممكن يعمل خليط من الثقافتين يجى لمصلحته لكنه بيكون مثل الخروف الأحمق يساق لقدر معين بطريقة مخططة و مدروسة

و عملية الخلط دائما بتيجى فى عكس مصلحته و بيترتب عليها عملية نسخ و مسخ ثقافى للمهزوم

فيصبح نسخة مشوهة ....لا إلى هؤلاء و لا إلى هؤلاء

لا إحتفظ بثقافته و سمح لها بالتطور الطبيعى الذى بأخذ من الخارج بعقلانية و ترو

ولا إكتسب من ثقافة الأخر ما يساعده على تحسين أوضاعه


و دا بقى إللى حصل معانا حرفيا

حيث أبقينا من ثقافتنا ما هو سيء و أخذنا من ثقافة الغرب ما هو أسوأ

و أصبحنا بدون هوية ثقافية و كل جيل بيجى بيكون ممسوخ أكتر و بعيد عن جذوره و هويته أكثر و بالتالى بيربى الجيل إللى بعديه تربيه تبعده اكثر و أكثر و هكذا تتسارع الأحداث و يزيد التدهور بمتوالية هندسية بتتضاعف من جيل للتانى

لحد بقى ما نوصل للمرحلة الجميلة إللى إحنا فيها دلوقتى :

( مرحلة الدفاع عن ثقافة الأخر ) :

و دى بقى واضحة و متجلية بشدة فى مجتمعنا الحالى

أصبحت ثقافة الأخر جزء مننا بل و أصبحنا نحن من يدافع عنها

حاجة كدا زى حالة نادرة جدا الباثولوجى فيها بيخش الفيرس للجنين عن طريق المشيمة من أمه فى أول 3 شهور من الحمل قبل الجهاز المناعى بتاعه ما يتكون

و لما تتكون خلايا الجهاز المناعى و تبدأ تلف أول دورة ليها على جميع خلايا الجنين علشان تتعرف عليها التعرف الأول ....بتكون الخلايا المفيرسة ساعتها فى نظر الخلايا المناعية الهابلة إللى لسا مش فاهمة حاجة هى بالفعل جزء طبيعى من خلايا الجنين و بالتالى الجنين بيتولد حامل الفيرس و بيموت بعدها بفترة بسيطة


أصبح مفيش فرق واضح بين ما هو أصيل فى ثقافتك و ما هو مدسوس عليها

هى الشيلة كلها بقت تبعك لإنها ورثتها كدا

و بالتالى طبيعى تدافع عن تركتك
و بالتالى مش غريبة لما تلاقى الممسوخين و المنسوخين بيدافعوا عن أجزاء أصيلة فى ثقافة الأخر على إنها أشياء لا غنى عنها فى حياة مجتمعنا


و كمان طبيعى بما إنك شايل حاجات متناقضة الأصل و المضمون بيحصل لدى المجتمعات إللى زى كدا حالة نقدر نشبهها بال auto immune disease

الجسم بياكل نفسه و المجتمع كذلك يفعل نفس الأمر



و المجتمعات الحمقاء إللى زى دى فى الحالة دى بتكون ضحية
لكنها ضحية حمقاء و مغممة تدافع عن أسلوب حياة و ثقافة محتلها


علشان كدا فى مجتمع زى مجتمعنا

تلاقى الدين مهمش و مركون على الرف خالص ــ و رغم ذلك بيضحكوا على نفسهم و يقولك دا شعب متدين ــ و دا لإن الأخر ركنه................ ( ضحية وجلاد )

تلاقى الحريات مسلوبة لإن الحكام إكتسبوا سلوك الجلاد من المحتل و حلوا محله
.............( ضحية و جلاد )

تلاقى سن الجواز متأخر ...لإن أسيادنا فى المجتمعات الصناعية المتقدمة بيأخروه ....يبقى إحنا كمان لازم نعمل زيهم لإنهم ناس بتفهم ................( ضحية وجلاد )

تلاقى اللغة العربية بتموت بالبطيء فى وسط متحدثيها و مدارس اللغات و الكليات الأجنبى بتملى الدنيا ....لإن دى لغات العالم إللى بتفهم ................( ضحية و جلاد )

تلاقى الناس يوم ما يجوزوا إبنهم أو بنتهم عايزين يحولوا الشقة ــ الكبيرة ــ لقصر فاخر .....لإنهم ببساطة مزروع فى وجدانهم الجمعى صورة الباشا التركى فى قصره الفاخر لما كان جدودهم بشتغلوا عنده خدامين ..................( ضحية و جلاد )

تلاقى الكل بيحاول يخرج بالإستفادة القصوى من خيرات البلد بأى طريقة و دا بالظبط نفس تفكير المحتل لما كان بيحول كل حاجة على بلده .......( ضحية و جلاد )

تلاقى الناس كلها متفقة إن أسلوب حكم حكامهم هو السبب فى معظم مشاكل حياتهم و جعلها مستحيلة و رغم ذلك تجدهم يتسابقوا لحمل كارنيهات الحزب و إعتناق الفكر الجديد و بيع الكلمة و الرأى بالمقابل و بدون مقابل ...........( ضحية و جلاد )

تلاقى إن بعد سنين طويلة من الإستقلال ــ المزعوم ــ ما زلنا تابعين خاضعين للمحتل بإرادتنا و بإختيارنا و بنحاول نخلى حياتنا نسخة منه و بشكل أفضل مما قد يكون خطط ليه ............... ( ضحية و جلاد )






غلاب 55
حديث الخميس ( 2 )