إللى أوله هراء أخره هبل

بص يابنى و بصى يابنتى ......

المدونة دى أنا عاملها علشان دماغى ، علشان متجننش ، علشان زى ما هو باين

من إسمها أصرف فيها الشحنات الكهربية و الأفكار و الكلام إللى لو إتحبس 

دماغى هتضرب و أتجنن 

و إنت أكيد ميخلصكش إنى أتجنن ......مش كدا ...

يعنى إنت هنا ــ و أنا معاك برضه متزعلش كدا ــ فى شبكة صرف عقلية 

فأهلا بك فى عالم الصرف و  المجارى و الهراء .......الذى لا داعى له .

الخميس، 25 فبراير 2010

يوميات الغابة السعيدة


Image and video hosting by TinyPic



قال القرد و هو يرمي السلامات علي جاره الفهد الأسود :

ـــ صباح الخير يا أبو راوية.

فرد الأخير :

= خير و هيجي الخير منين يا بوز القرد إنت ؟

إنزعج القرد كثيرا من رد جاره و عشرة عمره و سأله مندهشا :

ـــ ليه بس كدا يا جدع في إيه ؟

= يعني إنت مش عارف في إيه ؟

أصدر القرد صوت الصراخ المستفذ الخاص به و قال :

ــــ و غلاوة (( محروس )) إبني أنا ما أعرف ، مالك بس زعلان ليه ؟

زأر الفهد قائلا :

= أهو إبن الكلب دا هو السبب .

ـــ متغلطش في الواد يا أبو راوية ، دا قرد متربي كويس و إبن قرود طيبين و متربي علي شجرة

من أعلي أشجار الغابة .

= و هو برده المتربي يعمل كدا مع جيران الشجرة إللي جنبه ؟ إنت لو مربيه كويس و لو طمر

فيه الموز و الكيوي مكانش عاكس (( راوية )) بنتي و بعتلها أوراق شجر غرامية .

خبطت (( سنية )) زوجة القرد علي صدرها لدي سماعها ذلك بينما كانت في الفرع

العلوي من الشجرة ـــ المخصص لإعدادا الطعام ـــ و شهقت قائلة :

__ إبني ...!!! إبني (( محروس )) يعمل كدا .

قال الفهد :

= شوفتي يا ست سنية يرضيكي كدا ؟

ردت (( سنية )) :

ــــ لأ يا أخويا أنا مصدقش حاجة زي دي علي إبني أبدا ......دا متربي أحسن تربية .

= يعني إيه يا أختييييييييييييي ؟ ........

كانت هذه أم راوية زوجة الفهد التي إتخذت وضعية الردح و أكملت

= يعني إحنا بنتبلي علي بسلامته و لا إيه ؟

ــــ أنا عارفة ياختي شوفي بنتك بقي مين إللي بعتلها الورق دا

زأرت أم راوية قائلة :

= نعم نعم يا روح أمك .......!!!........ أنا بنتي أشرف من الشرف .

و دخلت السيدتان في وصلة الردح المعتادة بين ربات الأشجار في هذه الغابة الشعبية .

إلا أن زأر الفهد قائلا :

ــــ أصمتااااااااااااااااااااا ...................

ثم أحضر مجموعة من أوراق الشجر و أعطاها للقرد قائلا :

= إتفضل يا سيدي ........مش دا خط إبنكم ؟؟

قرأ القرد و زوجته أوراق الشجر و تعرفا علي خط إبنهما (( محروس )) و كانت الأوراق تحتوي علي كثير

من كلمات الحب الملتهبة التي وجهها القرد المراهق لمحبوبته ذات المخالب .

هنا أحس القرد الكبير بالغضب و إحمر وجهه ــ الأحمر أساسا ـــ حتي قارب في إحمراره مؤ ..... البطيخة

الكبيرة و قال :

ـــ طيب لما أشوفه إبن الكلب دا ........ لما يرجعلي هنا أنا هقطعه ........محروم من الموز لمدة أسبوع

ثم إلتفت للفهد و زوجته قائلا :

ــــ و إنت يا أبو راوية أنا أسف حقك عليا أنا يا أخويا .

= يا أبو محروس الكلام دا مينفعش ......... هي دي برضه أصول الجيرة ؟

ـــ معلش يا أخويا أنا هعرف أتصرف معاه إزاي .

ثم إلتفت القرد لزوجته و سألها :

ـــ إبنك فين يا ست هانم ؟ يا تري بيصيع في أنهي مصيبة ؟

= متقولش كدا علي الواد يا أخويا ، أنا إبني مش صايع ........... ربنا يحميه راح مه زملاته يقدموا علي شغل

في السيرك إللي جنب الغابة و زمانه راجع و نبقي نستفسر منه كويس

المهم بس ربنا يوفقه في الشغلانة دي و ـ يشبط ـ فيها ، دي شغلانة مستقبلها تمام .

ـــ طيب يا أختي و أنا لما يرجع هشوف شغلي معاه .

هناك 11 تعليقًا:

  1. Kalila O Demna :D:D

    bas e7m..mosh adra atla3 bel 7ekma bsara7a :D

    heya law 3la en el 2erd by7b ontha el fahd, zat el ma5aleb fa howa hyshta3'al fel circ after all :D:D

    ردحذف
  2. ههههههههههههههههههههههههه

    طب سين سؤال

    لو أهل الغابة السعيدة ما وقفوش في مستقبل قصة الحب الملتهبة دي

    واتجوزوا هيخلفوا ايه ؟؟؟

    بس بجد جميلة اوي

    في باقي ولا لأ ؟؟

    ياريت يكون في باقي

    ردحذف
  3. Sarah Sobhi

    bas e7m..mosh adra atla3 bel 7ekma bsara7a :D


    *****

    هو الحقيقة ولا أنا كمان

    بس عادة مش بحطلها هدف القصص دى

    أغلب الظن بتبقى تنفيس شحنات خيال و مرح و هراء مش أكتر

    يمكن الهدف بيبقى فى المقالات و الصالونات التاريخية أكتر

    ردحذف
  4. سمو الأميرة سارة



    (( طب سين سؤال

    لو أهل الغابة السعيدة ما وقفوش في مستقبل قصة الحب الملتهبة دي

    واتجوزوا هيخلفوا ايه ؟؟؟

    في باقي ولا لأ ؟؟

    ياريت يكون في باقي ))

    ********

    الصراحة مفكرتش فى الموضوع دا

    يمكن لإنى متوقع إن إصحاب السيرك مش هيدوا محروس مرتب يقدر يفتح بيه شجرة ...قصدى بيت ، دا غير إن أكيد الفهد الأب عايز أى ـ حيوان ـ جاى من مراعى السافانا الغنية أو الغابات الصنوبرية و يتجوز بنته علشان ينقل العيلة نقلة طبقية




    بالنسبة للباقى فأنا بقالى سنتين بكتب حكايات الغابة السعيدة على شكل مواقف و صور متقطعة كدا بدون تسلسلات



    و دى منها هنا على المدونة

    http://ghallab55.blogspot.com/2010/02/blog-post_23.html

    ردحذف