إللى أوله هراء أخره هبل

بص يابنى و بصى يابنتى ......

المدونة دى أنا عاملها علشان دماغى ، علشان متجننش ، علشان زى ما هو باين

من إسمها أصرف فيها الشحنات الكهربية و الأفكار و الكلام إللى لو إتحبس 

دماغى هتضرب و أتجنن 

و إنت أكيد ميخلصكش إنى أتجنن ......مش كدا ...

يعنى إنت هنا ــ و أنا معاك برضه متزعلش كدا ــ فى شبكة صرف عقلية 

فأهلا بك فى عالم الصرف و  المجارى و الهراء .......الذى لا داعى له .

الاثنين، 15 مارس 2010

لقد عملت حادثة !!!





تييييت .......تيييييييييييييييييييييت

إييييييييييييق .......... كرااششششش .....بووووم ، طااااااخ ، تكككككككك


تن تن



دى كانت تفاصيل الحادثة ........ 

بعد حوالى دقيقة عرفت أخرج من العربية من الباب الورانى إللى على اليمين

كان الجنب بتاعى مهشم تماما مع مقدمة السيارة بينما الشيفروليه الدبابة
إللى خبطتنى من الجنب كانت مقلوبة على جنبها من فرط السرعة
و من الحمل إللى كانت شايلاه 


العربية  خدتنى فى سكتها بتاع 5 متر كدا قبل ما سور صغير
على جنب الطريق يوقف عربيتى قبل ما تقع فى الغيط و دفع هذا البطل
حياته ثمنا لذلك إذ تسببت عربيتى فى إنهياره .

 طبعا بما إننا كنا على طريق زراعى فسرعان ما إتجمع الناس فى ثوانى 

ــ و إنت كويس ...فيك حاجة ، طب إشرب ميه 



خرجت مش حاسس غير بجرح صغير فى إيدى بينزف نزف بسيط 

التلاتة إللى كانوا فى العربية التانية خرجوا سلام تماما 





سوسوسوسوسوسوسو......

لأ دا جرس الباب ...متخافوش 

دا أكيد بابا ..... شوية وراجعلكم 















سورى إتأخرت عليكم ..........

أصل بابا لسة جاى من المنصورة حالا كان هناك فى المستشفى
علشان يعمل عملية ، العملية إتأجلت و هو رجع تانى يدوبك 
من شوية لما الجرس رن ... طبعا هو مكانش يعرف حاجة 
عن حادثة إمبارح ...لسا قايلينله أهو ....





 نرجع تانى لما بعد الإستطدام ......

كلمنا النجدة و عملنا محضر 

يمكن متعبتش فى الحادثة قد ما تعبت من القاعدة فى المركز
... إنتظار طويل و روتين فعلا أسطورى

بعدها إتحطت الكلابشات فى إيدينا ــ اه ما هو حوادث المرور جنح ـــ

و إترحلنا على النيابة 

أخيرا حققت أحد أحلام حياتى بإنى أركب عربية الترحيلات
ــ أيوة ........هى الزرقا الكبيرة إللى ليها شبابيك حديد صغيرة دى ـــ

بس أنا كنت بدأت أتعب مع بداية الإحساس بالكدمات و الرضوض 

روحنا النيابة و قعدنا هناك مستنين و فى الأخر دخلنا كدا لشاب
صغنون و حبيب ماما خالص دا كان وكيل النيابة ،
سألنا سؤالين كدا على الماشى و صرفنا 

قبل ما أدخل النيابة خالى اللذيذ ــ أصل أنا عندى خال لذيذ ــ
لقاها مناسبة سعيدة فقرر يصورلى فيديو و أنا لابس الكلابشات فى إيدى
، و أنا برضه تجاوبت معاه و عملت علامة النصر و صرخت فى وش الكاميرا
كل شيء يهون فى سبيل مصر 



الولد إللى خطبنى مش معاه رخصة و لا بطاقة و العربية بتاعتهم
 مش مرخصة و كمان عليه قضية !!!!!



رجعنا تانى المركز فى عربية الترحيلات ــ يا للروعة مرتين فى يوم واحد ....كم أنا سعيد ـــ 


و هناك فكيت الكلابش ــ كنت طول عمرى منتظر يوم الكلابش دا ــ
و أخيرا بعد حوالى 7 ساعات من الحادثة 

روحت البيت 




العربية بتاعتى كويسة ...بس كل حتة فيها لوحدها .....

و بعدين تحس كدا إن النص القدمانى بالجنب بتاع السواق عندى
تعرضوا لعملية تبطيط مبرحة 


و رغم منظر العربية المخيف إلا إنى الحمد لله بأعجوبة كل إللى
عندى كدمات و رضوض فى جنبى و كتفى الشمال 

و ورم فى رجليا الإتنين 


و هنزل النهاردة أكشف على my internal organs 



هناك 21 تعليقًا:

  1. انت بتتكلم بجد ؟؟ ولا زي حوار نابليون ؟؟

    ردحذف
  2. ايه ده هو ممكن تكون بعته يعنى
    ههههههههههههههههههههه

    على العموم الف سلامه عليك لو بجد
    بس لو بتضحك عليييييينا حتشوف اللى حيجرالك
    ههههههههههههههههههههههه

    ردحذف
  3. الف سلامة

    صعب اوى وصف الحادثة دى الحمد لله ىانك خرجت بخير

    بس موضوع الكلبشات دة غريب

    خد يحب الكلبشات؟؟؟
    :):)

    اول زيارة بس اكيد مش الاخيرة

    ردحذف
  4. Sharm


    لا بجد فعلا ...كل دا حقيقى

    كان نفسى يبقى لنابليون دور فى الموضوع بس محصلش

    ردحذف
  5. صيدلانيه طالعه نازله


    الله يسلمك

    الحقيقة أنا كان نفسى يبقى هزار .....بس كل ما أجى أنام على جنبى الشمال و أقول أىىى ....أعرف إنه بجد

    ردحذف
  6. NeVeN

    أنا مكونتش بحب الكلبشات

    أنا كنت نفسى أجرب الكلبشات

    بس الصراحة .....

    بعد ما جربتها

    قلبى إنفتحلها كدا و حبتها قوى

    و أنا من مكانى هنا فوق السرير ...أنا بنصح كل شاب و كل فتاه إنهم يجربوا الكليبشات

    ردحذف
  7. kan mafrood ab2a awel comment bas galna dyoof :D yalla ba2a el 7ad...e7mm el post el gay isa :D:D

    alf salama yafandem
    :)
    bas enta 3aref law 7ad mosh mrakez awi 2ra el post momken gedan y2ollak alf mabrouk we 3o2bal kol marra :D:D


    Get Well Soon :)

    ردحذف
  8. أحمد ..

    الف سلامه عليك

    حمد الله على سلامتك

    هو خالوا صورك ؟؟ طيب كويس عشان آخد منه الصور بقى ( انا لذيذ انا كمان )

    على فكره المفروض تروح تعمل سونار

    احنا جينالكو بس انت كنت نايم


    بالمناسبه
    http://b7l2a.net/net/1926.html

    ردحذف
  9. Sarah Sobhi

    الله يسلمك

    فعلا الواحد لما رجع قرا البوست تانى

    لقيت روح المرح بتشع كدا منه و لا كأنه توبيك عيد ميلاد

    ردحذف
  10. قبلاوى

    الله يسلمك

    أيوة يا أخويا صورنى بالكلابش

    مش بقولك العيلة دى دماغها مش مظبوطة

    بس كويس إنه صور ....أهه حاجة للتأريخ و التوثيق

    *****

    (( على فكره المفروض تروح تعمل سونار ))

    بكرة إن شاء الله


    *******
    ((بالمناسبه
    ((http://b7l2a.net/net/1926.html


    مفيش مشكلة ...تم إعلامى قبلا

    و متشكر ليهم و ليك

    شكلها مجلة لطيفة

    ردحذف
  11. حمدالله على سلامتك
    والحمدلله انها جت على قد كده
    بس ايه سر سعادتك فى ركوبك عربية الترحيلات:)

    ردحذف
  12. حمدالله علي السلامة.. كوييس ان العربية بخير...

    ردحذف
  13. موناليزا


    الله يسلمك

    بس أنا شايف إن أى تجربة جديدة على الإنسان هى إضافة لرصيد خبراته و مشاهداته

    و بعدين لما أجى أركبها تانى فى قضايا أخطر مش هبقى خايف منها بقى و بتاع لإنى جربتها قبلكدا و بقيى عندى خبرة فيها

    دا غير إن الإحساس جواها كان فعلا لطيف

    ردحذف
  14. سمع هوص (Abo 3li

    الله يسلمك

    بس فعلا العربية محتاجةنص عربية جديد


    أهو الشركة هتبعتلى بكرة واحد ياخدها من مكان الحادثة علشان يصلحوها

    ربنا معاهم بقى قصاد شركة التأمين

    ردحذف
  15. انا بعد النص الأولاني من البوست ها اقول
    ألف حمد لله على السلامة وفداك العربية وسور الغيط

    وبعد النص التاني وبعد ما ضحكت للركب
    ها اقول لك
    كفارة

    ربنا يسترها معانا يارب
    اول مرة اعرف قصة جنحة وكلبش دي
    طب والستات برضه ها يبقوا مساواة والا في دي ها يقولوا ناقصات ويرحمونا؟ :)

    ردحذف
  16. ستيتة حسب الله الحمش


    الله يسلمك و أهلا بيكى...نورتى المنطقة بتاعتى على النت



    بالنسبة للجنحة و الكلابش

    فالقانون لا يعرف فاطمة

    دا غير إن الكلابش للجميع


    بس فى حاجة غريبة

    المفروض فى أى بلاغ بيتم كلبشة المدعى و المدعى عليه مع بعض فى كلابش واحد

    فمش عارف هيبقى إيه الوضع مع واحدة خبطها سواق توك توك سوابق مثلا.....هيتكلبشوا مع بعض ولا لأ

    ردحذف
  17. ياعم الف سلامة
    وفيها ايه كلنا لها

    ردحذف
  18. لا الف سلاااااامة


    والحمد لله بخير دلوقتى

    ياااااااااااااه ده انا جاية متاخر

    تلاقيك خفيت دلوقتى
    هههههههههههههههههههه

    ردحذف
  19. صوت من مصر

    الله يسلمك ....و فعلا الحجر الداير لابد من خبطه


    ***************

    star in the sky

    الحمد لله أنا بقيت كويس و نزلت الشغل كمان

    شكرا ....

    ردحذف
  20. حمدلله علي السلامة

    والله طريقة سردك للاحداث جامدة جدا
    حسيت زي فيلم
    ومفيش ملل
    تمنياتي بالشفاء العاجل

    ردحذف
  21. متشكر ليكى


    يمكن ما زالت بعض أثار الحادثة موجودة بجسمى

    بس الحمد لله بقوم بأنشطتى العادية بشكل طبيعى

    ردحذف